Read Pashto (Nangahari) — د پښتو مقدس کتاب متلونو 15 Bible Online

متلونو 15 - Pashto (Nangahari) — د پښتو مقدس کتاب bible

متلونو 15

¹نرم جواب غصه سړوى، خو سخته خبره غصه لمبه کوى.

²د هوښيارانو ژبه علم خوندور کوى، خو د بې وقوفه خولۀ د کم عقلتوب سرچينه ده.

³د مالِک خُدائ سترګې هر چرته موجودې دى، هغه ښهٔ او بد دواړو باندې نظر ساتى.

⁴نرمه ژبه د ژوندون ونه ده، خو ټګماره ژبه روح ماتوى.

⁵کم عقل د خپل پلار تربيت ته سپک ګورى، خو هر هغه څوک چې اصلاح قبلوى نو هغه هوښيار دے.

⁶د صادِق په کور کښې لويه خزانه وى، خو د بدکاره ګټه هغوئ ته تکليف ورکوى.

⁷د هوښيارانو شونډې علم خوروى، خو د بې عقله په زړهٔ کښې داسې څهٔ نهٔ وى.

⁸مالِک خُدائ د بدکارانو د قربانۍ نه نفرت کوى، خو د نېکانو دعا هغه خوشحالوى.

⁹مالِک خُدائ د بدکارانو د چال چلن نه نفرت کوى، خو هغه د هغوئ سره مينه کوى څوک چې صداقت پسې روان وى.

¹⁰د هغه چا به سخت تربيت وشى څوک چې صحيح لاره پريږدى، څوک چې د اِصلاح کولو نه نفرت کوى نو هغه به مړ شى.

¹¹دا چې عالم ارواح او دوزخ دواړه مالِک خُدائ ته ښکارى، نو د انسان زړهٔ به ورته څومره زيات څرګند وى؟

¹²مسخره کوونکى اصلاح نهٔ خوښوى، نو ځکه چې د هوښيارانو سره مشوره نهٔ کوى.

¹³خوشحاله زړهٔ مخ شادابه ښائى، خو پرېشانه زړهٔ د انسان روح ماتوى.

¹⁴د هوښيارانو زړهٔ د علم لټون کوى، خو د کم عقل خولۀ په ناپوهئ کښې څريږى.

¹⁵د مظلومانو د ژوند ټولې ورځې خرابې وى، خو خوشحاله زړهٔ هر وخت جشن کوى.

¹⁶د مالِک خُدائ په يره کښې لږ آمدن غوره دے، د هغه ډير مال دولت نه چې سکون په کښې نهٔ وى.

¹⁷دال ساګ دې وى خو چې مينې سره وى، کۀ چرګ وى او نفرت ورسره وى نو فائده يې څۀ ده.

¹⁸غصه ناک سړے صرف جنجال جوړوى، خو صبرناک سړے جنګونه سړوى.

¹⁹د ناراسته لار د ازغو ډکه وى، خو د نېکانو لارې لکه د پوخ سړک په شان وى.

²⁰هوښيار زوئ د خپل پلار دپاره د خوشحالۍ ذريعه ده، خو بې وقوفه خپلې مور ته سپک ګورى.

²¹کم عقلتوب هغه سړے خوشحالوى څوک چې ناپوهه وى، خو هوښيار سړے په سيدها لار روان وى.

²²چرته چې صلاح مشوره نۀ وى نو هلته منصُوبې ناکامه شى، خو د ډيرو مشوره ورکونکو په ذريعه کاميابې حاصليږى.

²³انسان په مناسب جواب ورکولو خوشحاليږى، په مناسب وخت کښې ټيک خبره کول څومره ښۀ وى!

²⁴د هوښيارانو لار هغه بره د ژوندون طرف ته بوځى، چې هغه قبر ته لاندې د تلو نه وساتى.

²⁵مالِک خُدائ د مغرور کور سر د لاندې راغورځوى، خو هغه د کُنډې جائيداد محفوظ ساتى.

²⁶مالِک خُدائ د بدو منصُوبو نه نفرت کوى، خو هغه په پاکو خبرو خوشحاليږى.

²⁷لالچى خپل خاندان ته مصيبت ور په برخه کوى، خو هغه څوک چې د رشوت نه نفرت کوى هغوئ به ژوندى پاتې شى.

²⁸صادِقان د جواب ورکولو نه وړاندې سوچ کوى، خو د بدکاره خولهٔ فساد نولى.

²⁹مالِک خُدائ د بدعمله خلقو نه لرې وى، خو هغه د صادِقانو دعاګانې اورى.

³⁰روڼ تندے زړهٔ ته خوشحالى ورکوى، او ښهٔ خبر بدن تازه کوى.

³¹هغه څوک چې ښې رټنې ته غوږ نيسى، نو هغوئ به په هوښيارانو کښې شمار شى.

³²هغه څوک چې تربيت رد کوى د خپل ځان سپکاوے کوى، خو هغه څوک چې تربيت قبلوى نو دے عقلمندى حاصلوى.

³³د مالِک خُدائ يره حِکمت پيدا کوى، عاجزى د عزت وړومبے قدم دے.