Read Pashto (Nangahari) — د پښتو مقدس کتاب متلونو 27 Bible Online

متلونو 27 - Pashto (Nangahari) — د پښتو مقدس کتاب bible

متلونو 27

¹د سبا په حقله لافې مۀ کوئ، ځکه چې چا ته هم پته نشته چې سبا به څۀ کېږى.

²دا به ښۀ وى چې نور خلق ستا صِفت وکړى، نه چې تهٔ په خپله د خپل ځان صِفت کوې، او دا به ښۀ وى چې نابلده خلق ستا ښهٔ ووائى نه چې تهٔ په خپله.

³کاڼې درانهٔ وى شګې درنې وى، خو د يو کم عقل تنګول د دې دواړو نه زيات درانهٔ وى.

⁴قهر خو ظالِم دے او غضب انسان چخڼى کوى خو د حسد په وړاندې څوک ټينګيدلے شى؟

⁵څرګنده رټنه د پټې مينې نه ښۀ ده.

⁶د دوست رټنه د هغهٔ د مينې اظهار دے، خو د دشمن ښُکلول سراسر دوکه ده.

⁷څوک چې موړ وى هغه شهد هم د پښو لاندې کوى، خو د اوږى دپاره تريخ خوراک هم خوږ وى.

⁸لکه څنګه چې يوه مرغۍ د خپلې جالې نه ورکه شوې وى د هغه چا په شان وى لکه څوک د خپل کور نه په صحرا شوې وى.

⁹لکه څنګه چې عطر او خوشبو د انسان زړهٔ خوشحالوى، هم دغه شان ښې مشورې دوستان خوشحالوى.

¹⁰خپل دوستان او د خپل پلار دوستان مۀ هېروه، د خپل ورورکور ته مه ځه کله چې په تا څهٔ مصيبت راشى. ستا نزدې ګاونډى د لرې ورور نه ښهٔ دے.

¹¹زما زويه، هوښيار اوسه او زما زړهٔ خوشحاله کړه، نو بيا به زهٔ هر هغه چا ته جواب ورکولے شم څوک چې ما ته سپک ګورى.

¹²هوښياران خطره د اول نه وينى او د هغې نه ځان بچ کوى، خو کم عقل پرې ورخلاص وى او بيا په تکليف کښې راګير شى.

¹³هر څوک چې د پردى کس د قرض ذمه وارى اخلى نو ضمانت ترې نه واخله، ضمانت ترې نه واخله کۀ چرې دهٔ دا کار د پردى کس دپاره کړے وى.

¹⁴کۀ چرې څوک سحر د وخته په اوچت آواز سره په خپل ګاونډى سلام واچوى، دا به هغه لکه د کنځلو په شان وګڼى.

¹⁵يوه جګړماره ښځه داسې وى لکه چې د باران په ورځ د چت نه مسلسل څاڅکى راپريوزى.

¹⁶د هغې منع کول داسې مشکل وى لکه د هوا بندول او يا تيل په موټى کښې نيول.

¹⁷لکه څنګه چې اوسپنه اوسپنه تيره کوى، نو دغه شان يو انسان بل انسان تيرهٔ کوى.

¹⁸که څوک د اينځر د ونې خيال ساتى نو د هغې ميوه به هم وخورى، او هر هغه څوک چې د خپل نېک خيال ساتى نو هغه به عزتمند شى.

¹⁹لکه څنګه چې په اوبو کښې مخ ښکارى، نو هم دغه شان زړهٔ يو انسان څرګندوى.

²⁰لکه څنګه چې په مرګ او تباهى دنيا نهٔ مړيږى، هم دغه شان د انسان سترګې کله هم نهٔ مړيږى.

²¹سپين او سرهٔ زر په اور آزمائيلے شى، او يو انسان د هغهٔ د صِفت کولو نه وروستو آزمائيلےشى.

²²که تهٔ کم عقل په لنګرۍ کښې د تخم په شان وټکوې، خو کم عقلتوب به د هغهٔ نه لاړ نهٔ شى.

²³د خپلو رمو په حال ځان پوهوه، او خپلو رمو ته زياته توجو ورکوه،

²⁴ځکه چې مال دولت هم د تل دپاره نهٔ پاتې کيږى او نۀ تاج او تخت د ټولو نسلونو دپاره پاتې کيږى.

²⁵کله چې ګياه ختمه شى او نوې ګياه راشنه شى نو ګياه د غرونو نه راجمع کړئ،

²⁶نو بيا به ګډورى تا ته د کپړو دپاره وړئ درکړى، او چېلۍ به درته د پټو د اخيستو قيمت درکړى.

²⁷نو بيا به تا سره د چيلو دومره زيات پئ وى چې په هغې به خپل خاندان او وينځې ساتلے شى.