Read Pashto (Nangahari) — د پښتو مقدس کتاب متلونو 9 Bible Online

متلونو 9 - Pashto (Nangahari) — د پښتو مقدس کتاب bible

متلونو 9

¹پوهې خپل کور جوړ کړے دے، او خپل ځان دپاره يې اووۀ ستنې تراشلې دى.

²هغې خپله غوښه تياره کړې ده او شراب يې يو ځائ کړى دى، او دسترخوان يې هم خور کړے دے.

³هغې خپله وينځه وروليږله او هغه د ښار د اوچتو ځايونو نه آوازونه کوى.

⁴”څوک چې ساده ګان وى هغوئ ټول دې دلته راشى.“ او هغه هغوئ ته وينا کوى څوک چې ناپوهه وى،

⁵”راشئ، زما خوراک وخورئ او هغه شراب وڅښئ کوم چې ما ګډ کړى دى.

⁶خپله ساده لار پريږدئ نو تاسو به ژوندى پاتې شئ، او د پوهې په لار تلل وکړئ.“

⁷هر څوک چې د مسخره کوونکى اصلاح کوى نو د خپلې بې‌عزتۍ دعوت ورکوى، هر څوک چې د شرير د شرارت نه ممانعت کوى، نو خپل ځان به سپک کړى.

⁸نو تهٔ کله هم د مسخره کونکى رټنه مه کوه هغه به ستا نه نفرت کوى، هوښيار ته تنبيه ورکړه هغه به ستا سره مينه کوى.

⁹هوښيار ته لارښوونه وکړه نو هغه به نور هم هوښيار شى، صادِق ته تعليم ورکړه نو هغه به د دې نه نور تعليم هم زده کړى.

¹⁰د مالِک خُدائ يره د حِکمت شروع ده، د مقدس ذات پېژندګلو د پوهې اصليت دے.

¹¹نو زما په وجه به ستا د ژوند ورځې ډيرې شى، او ستا د عمر سره به نورکلونه سوا شى.

¹²کۀ چرې تۀ حِکمت لرې نو هغه به تا ته فائده درکړى، او که تهٔ مسخره کوونکے يې نو صرف تاته به د هغې نقصان مِلاو شى.

¹³کم عقله ښځه سرتېزه وى، هغه بې ادبه او بې علمه وى.

¹⁴د هغې کور د ښار په لوړ ځائ کښې دے. د دروازې سره ناسته وى،

¹⁵او څوک چې په خپله لاره سيدها تيريږى نو هغوئ ته آوازونه ورکوى.

¹⁶”اے ساده خلقو ټول دلته راشئ!“ هغه ټولو ناپوهو ته وينا کوى،

¹⁷”د غلا اوبۀ خوږې وى، هغه روټۍ چې په پټه خوړلے شى خوندوره وى.“

¹⁸خو دوئ لږ هم په دې نهٔ پوهيږى چې د هغې ښځې په کور کښې صرف مرګ دے، څوک هم چې د هغې په کور کښې ميلمانهٔ شوې دى نو هغوئ اوس د تورو خاورو لاندې دى.