Read Pashto (Nangahari) — د پښتو مقدس کتاب مُعلِم 10 Bible Online

مُعلِم 10 - Pashto (Nangahari) — د پښتو مقدس کتاب bible

مُعلِم 10

¹څنګه چې مړۀ مچان خوشبودار عطر خرابوى نو داسې لږ شان کم ‌عقلتوب ډير حِکمت او عزت خرابولے شى.

²د هوښيار سړى زړۀ به صحيح لار غوره کوى او د کم عقل سړى زړۀ به خرابه لار غوره کوى.

³کله هم چې کم عقل په لاره روان وى نو صفا پته لږى چې هغه بې وقوف دے.

⁴که حکمران درته غصه شى نو خپل ځائ مۀ پريږده، ځکه چې ستا سړه رويه د هغۀ سخته غصه قلارولے شى.

⁵ما په مخ د زمکې يو بل خراب څيز ليدلے دے او دا غلطى د حکمرانانو د لاسه کيږى.

⁶او هغه دا چې کم عقل خلق په اُوچتو عُهدو مقرر کړے شى او مالدار خلق په معمولى عُهدو باندې وى.

⁷ما ليدلى دى چې غلامان د شهزادګانو په شان په اسونو سوارۀ وى، او شهزادګان د نوکرانو په شان پېدل ګرځى.

⁸څوک چې کنده کنى کيدے شى په خپله وروغورزېږى، څوک چې دېوال راغورزوى کيدے شى مار يې وچيچى.

⁹څوک چې د کاڼو په کان کښې کار کوى، کيدے شى په کاڼو چخڼى شى. څوک چې لرګى ماتوى، نو کيدے شى چې په دې زخمى شى.

¹⁰که تبر پڅ وى او تېرۀ يې نۀ کړې، نو په دې باندې کار کول ډېر زور غواړى. خو حِکمت سړے هميشه د کاميابۍ طرف ته بوځى.

¹¹که د دم نه مخکښې مار پاړو وچيچى نو بيا د پاړوتوب څۀ فائده نشته.

¹²د هوښيار سړى خبرې د هغۀ د عزت سبب جوړيږى، خو د کم عقل سړى خبرې د هغۀ د تباهۍ سبب جوړيږى.

¹³د هغوئ خبرې کم عقلتوب سره شروع کيږى او خطرناک ليونتوب سره تر سره کيږى.

¹⁴د کم عقل کس خبرې نۀ ختمېږى. هيچا ته دا پته نشته چې په راتلونکې وخت کښې به څۀ کېږى، څوک دا وئيلے شې چې زمونږ د مرګ نه پس به څۀ کېږى؟

¹⁵کار سره کم عقل ډير ستړے شى، او هغۀ ته دا پته هم نۀ لږى چې منزل ته خپله لار پېدا کړى.

¹⁶افسوس په هغه مُلک چې د هغې بادشاه يو ناتجربه‌کاره ځلمے وى او مشران يې سم د سحر نه سر د خيټې نه زار کوى.

¹⁷خوش قسمته وى هغه مُلک چې د چا بادشاه چې د شريف خاندان نه وى او د هغوئ مشران په مناسب وخت خوراک کوى. هغوئ د طاقت حاصلولو دپاره خوراک څښاک کوى د نشې دپاره نه.

¹⁸که يو کس دومره ناراسته وى چې هغه خپل چت هم نۀ مرمت کوى، نو دا به راڅاڅى او هغه کور به راوغورزېږى.

¹⁹د ميلمستيا روټۍ د خوشحالۍ دپاره وى او د انګورو شراب د زړۀ راحت دپاره وى، او په پېسو هر کار کېږى.

²⁰په خيالونو کښې هم په بادشاه پسې بد رد مۀ وايه او په خپله کوټه کښې هم په مالداره کس پسې بد رد مۀ وايه. کېدے شى چې د هوا يوه وړه مرغۍ ستا خبرې واورى او هغۀ ته يې وکړى.