Read Pashto (Nangahari) — د پښتو مقدس کتاب مُعلِم 4 Bible Online

مُعلِم 4 - Pashto (Nangahari) — د پښتو مقدس کتاب bible

مُعلِم 4

¹ما يو ځل بيا نظر واچولو او هغه ټول ظلم مې وليدو کوم چې په مخ د زمکې کيږى. ګوره د مظلومانو وښکې څاڅى خو د تسلئ ورکولو واله هيڅوک نۀ وى. ظالمان ډير زورَور دى او مظلومان ډير بې وسه دى.

²نو ما هغه خلق بختور وګڼل کوم چې مړۀ شوى دى، د هغه خلقو نه کوم چې تر اوسه پورې ژوندې دى.

³خو د ټولو نه بختور هغه دى کوم چې لا پېدا شوى نۀ دى، چې هغوئ هغه بدعملى نۀ ده ليدلې کومه چې په مخ د زمکې کيږى.

⁴بيا ما دا هم وکتل چې ټول خلق دې دپاره محنت کوى او د استاذئ نه کار اخلى ځکه چې هغوئ د يو بل سره حسد کوى. خو دا بې معنى وى. دا داسې دى لکه چې څوک هوا پسې منډې وهى.

⁵کم عقل د لاس مشقت پرېږدى او خپل ځان د لوږې وژنى.

⁶خېر دے چې لږ وى خو چې د آرام سره وى، نۀ چې ډير وى او د بې حده محنت سره وى. حد نه زيات محنت هوا پسې منډى وهل دى‌.

⁷ما په دنيا کښې نور څۀ هم ليدلى دى چې هغه بې معنى دى.

⁸دا د يو سړى خبره ده څوک چې بلکل يواځى وو. د هغۀ نۀ بچى وُو او نۀ يې خپلوان وُو. هغۀ به هر وخت کار کولو، خو بيا هم هغه په خپله ګټه باندې مطمئن نۀ وو. هغۀ د خپل ځان نه تپوس وکړو، ”د چا دپاره زۀ دومره سخت محنت کوم او خپل ځان د خوشحالۍ نه محروم ساتم؟“ دا هم بې معنى دى او د افسوس خبره ده.

⁹د يو نه دوه کسان ښۀ وى، ځکه چې هغوئ د خپل محنت نه ښۀ فائده اخستے شى.

¹⁰که په هغوئ کښې يو کس وغورزېږى، نو هغه دويم به يې راپاڅوى، خو که څوک يواځې وى او وغورزېږى، نو په هغۀ افسوس، ځکه چې داسې به څوک نۀ وى چې هغه راپاڅوى.

¹¹هم داسې، که يخنى وى او دوه کسان يو ځائ څملى نو ګرم به شى، خو يو کس به يواځې څنګه ځان ګرم کړى؟

¹²خو که يو کس يواځې وى نو شکست به وخورى، خو که دوه کسه يوځائ شى نو مقابله کولے شى. د درېو مزو پړے په آسانه نۀ شلېږى.

¹³يو غريب خو هوښيار ځوان ښۀ دے د هغه بوډا او کم عقل بادشاه نه، څوک چې د چا نصيحت ته غوږ نۀ ايږدى.

¹⁴دغه ځوان د غريبئ نه د کاميابۍ طرفته تلے شى، اګر که هغه قيدى وو خو هغه بيا هم بادشاه جوړيدے شى.

¹⁵بيا ما وکتل چې خلق يو بل ځوان پسې روان وو، څوک به چې د هغۀ په ځائ بادشاه شى.

¹⁶بې شميره خلق د هغۀ ګيرچاپيره وُو، خو بيا يوه بله پيړئ راوچته شوه او هغه يې هم رد کړو. نو دا څيزُونه بې معنى دى، دا داسې دى لکه چې څوک هوا پسې منډې وهى.