Read Pashto (Nangahari) — د پښتو مقدس کتاب مُعلِم 6 Bible Online

مُعلِم 6 - Pashto (Nangahari) — د پښتو مقدس کتاب bible

مُعلِم 6

¹په مخ د زمکې ما يوه بله خرابه خبره ليدلې ده او دا په انسان باندې يو دروند بوج دے.

²دا د هغه کس خبره ده چا له چې خُدائ پاک مال دولت، عزت او جائيداد ورکړى او هغه هر څۀ ورکړى چې د هغۀ زړۀ يې غواړى، خو خُدائ پاک يې د دې په خوند پوهه نۀ کړى او د هغۀ په ځائ يو پردے کس په دې باندې مزې وکړى. دا بې معنې دى او لوئ مصيبت دے.

³که د يو سړى سل بچى وى او تر بوډاتوبه پورې ژوندې وى، خو که په ژوند کښې څۀ خوشحالى ونۀ وينى او په عزت سره دفن نۀ شى نو زۀ خو به دا وايم چې د دۀ نه خو هغه ماشوم ښۀ دے چې مړ پېدا شوے وى.

⁴د داسې پېدائشى مړ ماشوم دنيا ته راتګ او تګ بې معنې دے، مرګ د هغۀ شناخت زمونږ نه پټ ساتى.

⁵اګر چې هغۀ نمر هم نۀ دے ليدلے او نۀ ورته دا پته لږيدلې ده چې ژوند څنګه وى، خو بيا هم هغۀ ته د هغه مالداره سړى نه زيات آرام حاصِل دے.

⁶فرض کړه که هغه دوه زره کاله ژوندې وى خو چې په ژوند کښې يې څۀ خوشحالى نۀ وى، نو څۀ فائده؟ آخر مرګ خو هر ژوندى له شته.

⁷انسان ټول محنت د خوراک پېدا کولو دپاره کوى، خو د هغۀ لوږه هيڅ کله نۀ ختمېږى.

⁸هوښيار کس د کم عقل نه په څۀ فائده مند وى؟ که غريب کس خلقو سره مناسب سلوک کوى نو په دې کښې د هغۀ دپاره څۀ فائده ده؟

⁹څۀ چې زمونږ سره وى د هغې نه خوند اخستل ښۀ دى په ځائ د دې چې د هغه څيزونو خواهش ولرو چې مونږ سره نۀ وى. دا بې معنې دى، او دا داسې دى لکه چې هوا پسې منډې وهى.

¹⁰هر څۀ چې کيږى هغه د تقدير ليک وى. دا ډير د پخوا نه معلومه وه چې د هر يو کس سره به څۀ کيږى. نو خُدائ پاک سره د دې موضوع په حقله بحث کول فضول دى.

¹¹څومره چې خبرې زياتېږى، نو دومره بې مطلبه کيږى، نو د بحث نه فائده څۀ؟

¹²نو چا ته څۀ پته وى چې زمونږ په دې لنډ او بې فائدې ژوند کښې، زمونږ دپاره څۀ ښۀ دى، داسې ژوند چې د سورى په شان تېرېږى؟ چا ته دا پته ده چې د مرګ نه پس به څۀ کېږى؟