Read Pashto (Nangahari) — د پښتو مقدس کتاب مُعلِم 8 Bible Online

مُعلِم 8 - Pashto (Nangahari) — د پښتو مقدس کتاب bible

مُعلِم 8

¹څوک د هوښيار په شان دے؟ څوک د خبرو د صحيح تشريح علم لرى؟ حِکمت د هغوئ مخونه روښانه کوى او د هغوئ سخت مزاج نرموى.

²زۀ وايم، د بادشاه حُکم منه، ځکه چې تا د خُدائ پاک سره د دې وعده کړې ده.

³د بادشاه په حضور کښې د تلو نه جلدې مۀ کوه. او په بد کار کښې حصه مۀ اخله، ځکه چې بادشاه درسره څۀ غواړى هغه کولے شى.

⁴ځکه چې د بادشاه خبره وزن لرى او هيڅ څوک ترې نه دا تپوس نۀ شى کولے چې، ”تۀ څۀ کوې؟“

⁵هغه کس څوک چې شاهى حُکم منى هغوئ ته به سزا نۀ ملاوېږى. هوښيار کس د هر څيز په وخت او سبب باندې پوهيږى.

⁶ځکه چې د هر څيز دپاره يو وخت او يوه طريقه وى، خو انسان له ډير غمونه برداشت کول دى!

⁷هيچا ته پته نشته چې څۀ به کيږى، نو بيا څوک دا وئيلے شى چې په مستقبل کښې څۀ کيدو واله دى؟

⁸هيڅ څوک خپل ځان د مرګ نه نۀ شى بچ کولے او نۀ څوک د اجل ورځ وروستو کولے شى. دا يو داسې جنګ دے چې مونږ ترې نه نۀ شو خلاصېدلے، او بدعملى يو بدعمله کس د مرګ نه نۀ شى بچ کولے.

⁹ما ټولو څيزونو ته غور سره وکتل او په مخ د زمکې چې څۀ کېږى د هغې په حقله مې سوچ وکړو، خلق په نورو خلقو باندې اختيار لرى او ورته نقصان رَسوى.

¹⁰او ما وليدل چې بدعمله د عزت سره ښخ شوى وُو او هغوئ به د خُدائ پاک مقدس کور ته تلل راتلل، خو چې په کومو ښارونو کښې هغوئ بدعملى کوله نو هلته خلقو د هغوئ صِفت بيانولو. دا هم بې معنې دى.

¹¹د بدو عملونو سزا زر نۀ ورکولے کيږى، نو ځکه د خلقو زړونه بدعملۍ ته تيار دى.

¹²يو ګناهګار به د بدعملۍ نه ډک ژوند تيروى خو بيا به هم تر ډيره وخته پورې ژوندې وى. بې شکه ما ته دا هم پته ده چې کوم خلق د خُدائ پاک نه يريږى هغوئ به خير سره اوسيږى، يعنې هغه خلق د چا په زړۀ کښې چې د خُدائ پاک يره وى.

¹³او د بدعمله خلقو به خير نۀ وى او نۀ به اوږد ژوند ولرى. او دا ځکه چې هغوئ د خُدائ پاک نه نۀ يريږى.

¹⁴خو په مخ د زمکې يوه بله خبره هم ده چې بې معنې ده. ښو خلقو ته داسې سزا ملاويږى لکه چې هغوئ بدعمله وى او بدعمله خلقو ته داسې اجر ملاويږى لکه چې هغوئ ښۀ خلق وى. نو زۀ تاسو ته دا وايم چې دا بې معنې دى.

¹⁵نو زما مشوره دا ده چې مونږ له د ژوند نه خوند اخستل په کار دى، ځکه چې په دې ژوند کښې هم دا يوه مزه ده چې خوراک څښاک کوُو او خوشحاله اوسو. نو داسې سخت محنت، کوم چې په مخ د زمکې خُدائ پاک مونږ له راکړے دے هغې سره سره څۀ لږه خوشحالى هم وکړو.

¹⁶کله چې ما پوره کوشش وکړو چې هوښيار شم او په هغې غور وکړم چې خلق يې په مخ د زمکې کوى، نو ما وکتل چې د داسې محنت په وجه هغوئ شپه او ورځ خوب نۀ شى کولے.

¹⁷نو ما ته پته ولګېده چې خُدائ پاک په دنيا کښې څۀ کوى نو هېچا ته هم د هغې پته نۀ لږى. کيدے شى چې يو هوښيار کس دا دعوىٰ وکړى چې زۀ په دې پوره پوهه شوم، خو دا به داسې نۀ وى هغه د دې بيخ ته نۀ شى رسيدے.