Read Pashto (Nangahari) — د پښتو مقدس کتاب يشعياه 1 Bible Online

يشعياه 1 - Pashto (Nangahari) — د پښتو مقدس کتاب bible

يشعياه 1

¹په دې کِتاب کښې د يهوداه او د يروشلم په باره کښې هغه پېغامونه دى کوم چې خُدائ پاک د آموص زوئ يشعياه باندې په هغه وخت کښې څرګند کړل کله چې عُزياه، يوتام، احاز او حزقياه د يهوداه بادشاهان وُو.

²مالِک خُدائ ووئيل، ”اے زمکې او آسمانه، زۀ چې څۀ وايم نو هغه واورئ! ما چې د کومو بچو پالنه کړې ده او خيال مې ساتلے دے نو هغوئ زما خِلاف بغاوت کړے دے.

³غوَيے خپل مالِک پېژنى او خر د خپل مالِک اخور پېژنى. خو بنى اِسرائيل خپل مالِک نۀ پېژنى، زما خلق د عقل نه خلاص دى.“

⁴اے ګناهګار قومه، تاسو خپلو ګناهونو رالاندې کړى يئ. بدعمله نسله، بدکرداره بچو، تاسو خپل مالِک خُدائ رد کړے دے! کوم چې د بنى اِسرائيلو مقدس خُدائ پاک دے او تاسو د هغۀ نه مخ اوړلے دے.

⁵تاسو خپله سرکشى ولې نۀ پرېږدئ؟ تاسو غواړئ چې نوره سزا هم درته مِلاو شى؟ ستاسو سرونه په زخمونو باندې پټ دى او ستاسو زړونه بيمار دى.

⁶د سر نه واخله تر پښو پورې ستاسو په بدن کښې يو ځائ هم روغ نشته. تاسو ټول ټکيدلې يئ، زخمى يئ او تغمې درباندې ولاړې دى. نۀ ستاسو زخمونه صفا کړے شوى دى، او نۀ ورباندې مرهم پټۍ شوې ده.

⁷ستاسو مُلک شاړ شوے دے، ستاسو ښارونه سوزولے شوى دى. ستاسو په وړاندې د پردى مُلک خلق ستاسو پټى لوټ کوى، او هر څۀ چې وينې هغه تباه کوى.

⁸صرف يروشلم باقى پاتې دے، لکه چې د انګورو په باغ کښې د څوکيدار جومپړئ پاتې وى يا د بادرنګو په پټى کښې يو څپر بې اسرې وى، او د محاصرې لاندې بې اسرې ښار وى.

⁹که مالِک خُدائ رب‌الافواج يو څو کسان ژوندى نۀ وے پرېښے، نو يروشلم به د سدوم او عموره په شان تباه شوے وو.

¹⁰اے يروشليمه، ستا حکمرانان او ستا خلق د سدوم او د عموره په شان دى. چې مالِک خُدائ درته څۀ وائى نو هغې ته غوږ ونيسه او چې خُدائ پاک درته څۀ ښودنه کوى نو هغې ته توجو وکړه.

¹¹مالِک خُدائ فرمائى، ”که تاسو بې شميره قربانيانې پېش کړئ نو زما پرې څۀ؟ زۀ د ښو ځناورو وازګې او د ګډانو د سوزيدونکو قربانو نه پوزې له راغلے يم. په دې زۀ نۀ خوشحاليږم چې تاسو ما ته د غوَيانو، ګډو او د چېلو وينې پېش کوئ.

¹²کله چې تاسو زما حضور ته راځئ نو ولى ستاسو خيال دا دے څۀ چې زۀ دا غواړم چې ستاسو ځناور دې زما په دربار کښې ګرځى؟

¹³تاسو چې ما له کومې نذرانې راوړئ دا بې فائدې دى. تاسو چې د خوشبويئ کومې مصالحې سوزوئ نو د هغې نه زۀ نفرت کوم. زۀ ستاسو د نوې مياشتې اخترونه، ستاسو د سبت ورځې او ستاسو مذهبى اجتماعګانې نۀ شم برداشت کولے، دا هر څۀ ستاسو د ګناهونو په وجه خراب شوى دى.

¹⁴ستاسو د نوې مياشتې د اخترونو او ستاسو د مقدسو ورځو نه زۀ نفرت کوم، دا په ما باندې يو بوج جوړ شوے دے او د دې برداشت کولو نه زۀ تنګ راغلے يم.

¹⁵کله چې تاسو د دعا دپاره لاسونه پورته کړئ، نو زۀ به ستاسو نه مخ واړوم. تاسو چې هر څومره دعاګانې وکړئ، نو زۀ به يې نۀ قبلوم، ځکه چې ستاسو لاسونه په وينه رنګ دى.

¹⁶اول ولامبئ او خپل ځان صفا کړئ. خپلې بد عمليانې زما د سترګو نه لرې کړئ! او نور بد عمل مۀ کوئ،

¹⁷نيکى کول ايزده کړئ. او ګورئ چې اِنصاف کيږى، د چا سره چې ظلم شوے وى د هغوئ مدد کوئ، يتيمانانو له خپل حقُونه ورکوئ او د کُنډو د حق دِفاع کوئ.“

¹⁸مالِک خُدائ وائى، ”راځئ چې اوس دا مسئله حل کړُو. اګر چې ستاسو ګناهونو تاسو تک سرۀ داغى کړى يئ، خو زۀ به تاسو صفا کړم او لکه د واورې په شان به مو سپين کړم، اګر چې ستاسو داغونه تک سرۀ دى، خو تاسو به د وړۍ په شان تک سپين شئ.

¹⁹خو که تاسو خپلې رضا سره تابعدار يئ، نو چې زمکه کوم ښۀ څيزُونه پېدا کوى، هغه به تاسو خورئ.

²⁰خو که تاسو اِنکار او سرکشى کوئ، نو د تُورې لاندې به ګير شئ او مړۀ به شئ. دا د مالِک خُدائ د خولې خبره ده.“

²¹هغه ښار چې په يو وخت کښې وفادار وو اوس د کنجرې په شان شوے دے! په يوه زمانه کښې دا د صداقت او اِنصاف نه ډک وو، خو اوس په کښې صرف قاتِلان پاتې دى.

²²اے يروشليمه، ستا خالص سپين زر اوس د ملاوټ نه ډک دى، او ستا بهترينو شرابو کښې اوبۀ ګډې شوى دى.

²³ستا مشران باغيان شوى دى او د غلو ملګرى شوى دى، هغوئ هر وخت تُحفې او رشوتونه اخلى. هغوئ په عدالت کښې هيڅ کله د يتيمانانو دفاع نۀ کوى او نۀ هغوئ ته د کُنډو فرياد رارسى.

²⁴نو هغې ته غوږ ونيسئ څۀ چې مالِک خُدائ رب‌الافواج، د بنى اِسرائيلو خُدائ تعالىٰ فرمائى: ”زۀ به خپلو دشمنانو نه انتقام واخلم، او مخاليفينو نه به بدل واخلم.

²⁵زۀ به ستاسو خِلاف خپل طاقت استعمال کړم. زۀ به تاسو داسې صفا کړم لکه څنګه چې اوسپنه په اور کښې صفا کېږى او زۀ به ستاسو نه ټول ملاوټ لرې کړم.

²⁶زۀ به تا له هغه شان قاضيان او مشيران درکړم لکه څنګه چې دې پخوا لرل. نو بيا به يروشلم د صادِقانو او وفادارو خلقو ښار وبللے شى.“

²⁷مالِک خُدائ به اِنصاف سره يروشلم بيا آباد کړى او چې څوک هلته توبه وباسى هغه به بچ کړى.

²⁸خو مالِک خُدائ به هغه هر يو کس ريزې ريزې کړى څوک چې ګناه کوى او د هغۀ خِلاف بغاوت کوى، او څوک چې مالِک خُدائ ته شا کړى نو هغه به تباه شى.

²⁹د څېړۍ د مقدسو ونو عِبادت سره به چې تاسو خوشحاليدئ نو د هغې په وجه به تاسو وشرمېږئ، او کوم باغونه چې تاسو د بُت پرستئ دپاره غوره کړى دى نو د هغې په وجه به تاسو وشرمېږئ.

³⁰تاسو به د څېړۍ د داسې ونې په شان يئ چې پاڼې يې اوچې شوى وى او د يو داسې باغ په شان به يئ چې هيڅ اوبۀ پکښې نۀ وى.

³¹نو هغه تکړه سړى به لکه د بوسو په شان وى او د هغوئ بد عملونه به د اور د بڅرکې په شان وى. دواړه به يو ځائ داسې اور واخلى چې هيڅ څوک به يې مړ کولے نۀ شى.