Read Pashto (Nangahari) — د پښتو مقدس کتاب يشعياه 10 Bible Online

يشعياه 10 - Pashto (Nangahari) — د پښتو مقدس کتاب bible

يشعياه 10

¹په تاسو افسوس! تاسو د بې اِنصافۍ قانون جوړَوئ او د ظلم فتوې ورکوئ.

²او د دې په وجه غريبانانو خلقو له موقع نۀ ورکوئ چې هغوئ ته خپل حق مِلاو شى او د هغوئ سره اِنصاف وشى. او د دې قانون په وجه کُنډې ستاسو په چال کښې راګيرې شى او يتيمان لوټ کوئ.

³د عدالت په ورځ به تاسو څۀ کوئ؟ کله چې د يو لرې مُلک نه په تاسو باندې يو آفت راشى نو تاسو به څۀ کوئ؟ د مدد دپاره به تاسو کوم ځائ ته منډې وهئ؟ تاسو به خپل مال دولت چرته پټوئ؟

⁴هيڅ به پاتې نۀ شى، يا خو به تاسو د قېديانو په مينځ کښې د يرې نه زيړې داړې نيولې وى او يا به په جنګ کښې ووژلے شئ. خو د مالِک خُدائ غصه به بيا هم نۀ سړېږى، هغۀ به تاسو له د سزا درکولو دپاره خپل لاس اُوچت کړے وى.

⁵بيا مالِک خُدائ ووئيل، ”اے اسوريانو، زۀ اسور د چُوکې په توګه استعمالوم چې هغه خلقو له سزا ورکړم چې زۀ چا ته غصه يم.

⁶ما اسوريان ورولېږل چې په دې بې دينه قوم باندې حمله وکړى، دا هغه خلق دى چې زۀ يې غصه کړے يم. ما هغوئ د دې دپاره ورلېږل چې هغوئ وشوکوى او لوټ يې کړى او هغه خلق د لارې د خاورې په شان د پښو لاندې کړى.“

⁷خو د اسور بادشاه په خپل زړۀ کښې د ظلم نه ډکې منصُوبې لرلې. د هغۀ اراده دا وه چې ډير قومونه تباه کړى.

⁸هغۀ وئيل چې، ”زما هر يو فوجى مشر بادشاه دے!

⁹ما د کلنو، کرکميس، حمات او د ارفاد ښارونه فتح کړى دى. ما سامريه او دمشق فتح کړے دے.

¹⁰ما ډير حکومتونه قابو کړى دى د چا معبودان چې د يروشلم او سامريه د بُتانو نه بهتر وو.

¹¹ما سامريه او د دې ټول بُتان تباه کړى دى او اوس به زۀ يروشلم او د هغې ټول بُتان هم تباه کړم.“

¹²خو مالِک خُدائ ووئيل، ”کله چې زۀ هغه کار ختم کړم چې د صِيون غر او د يروشلم سره يې کوم، نو زۀ به د اسور بادشاه له د هغۀ د لافو او ټول غرور په وجه سزا ورکړم.“

¹³د اسور بادشاه به په خپلو لافو کښې وئيل، ”دا هر څۀ ما په خپل لاس کړى دى، ځکه چې زۀ ډير هوښيار يم. ما د قومونو په مينځ کښې سرحدونه ختم کړى دى او د هغوئ خزانې مې لوټ کړى دى او د يو تکړه غوَيى په شان مې د هغې بادشاهان تباه کړى دى.

¹⁴ما د دنيا قومونو نه دولت داسې اخستے دے لکه چې څوک د جالې نه هګئ راوچتوى او ما داسې ټول مُلکونه هم راوچت کړى دى، داسې يو وزر هم نۀ وو چې زۀ يې يرولے وے او نۀ داسې مخُوکه وه چې په ما باندې چغېدلے وے!“

¹⁵خو مالِک خُدائ وائى، ”ولې يو تبر دا دعوىٰ کولے شى چې دا د هغه سړى نه تکړه دے چې څوک دا تبر استعمالوى؟ ولې يو آرا دا دعوىٰ کولے شى چې دا د هغه سړى نه تکړه ده چې څوک دا استعمالوى؟ يو چُوکا سړے نۀ راپورته کوى بلکه سړے چُوکا راپورته کوى.“

¹⁶نو په دې وجه به مالِک خُدائ رب‌الافواج يو داسې مرض راولېږى چې د اسور څربه جنګيالى به اوچ کلک شى. او د هغوئ لوئى به د اور په لمبو وسوزوى.

¹⁷هغه مقدس ذات کوم چې د بنى اِسرائيل رڼا ده، هغه به د اور په شان شى. هغه به د يوې لمبې په شان شى، صرف په يوه ورځ کښې به د اسور د ازغو او غنو بوټى وسوزى.

¹⁸لوئ لوئ ځنګلونه او دا زرخېز پټى به بېخى داسې تباه شى لکه چې يو سخت مرض يو کس تباه کوى.

¹⁹صرف د شمېر يو څو ونې به پاتې وى چى يو ماشوم يې هم شميرلے شى.

²⁰په هغه وخت به ژوندى پاتې شوى بنى اِسرائيليان يعنې د يعقوب د خاندان بچ شوې خلق نور په هغه قوم باندې اعتبار نۀ کوى چا چې دوئ تباه کړى وى. هغوئ به د زړۀ د اخلاصه په مالِک خُدائ باندې ايمان ولرى، کوم چې د بنى اِسرائيلو مقدس ذات دے.

²¹باقى پاتې به راوګرځيږى، د يعقوب باقى پاتې حصه به خُدائ تعالىٰ ته راوګرځى.

²²اګر چې بنى اِسرائيليان به د سمندر په غاړه د شګو په شان زيات وى، خو صرف يوه وړه پاتې شوې حصه به راوګرځى. مالِک خُدائ د خپلو خلقو د تباه کولو صحيح فېصله کړې ده.

²³نو بې شکه چې مالِک خُدائ پاک، رب‌الافواج په ټول مُلک باندې تباهى راولى، لکه څنګه چې هغۀ وئيلى دى.

²⁴مالِک خُدائ پاک رب‌الافواج وائى: ”اے په صِيون کښې زما خلقو د اسوريانو نه مۀ يرېږئ، اګر چې هغوئ په تاسو پسې چُوکه او ډنډه راخلى لکه څنګه به چې مخکښې مِصريانو درسره کول.

²⁵ډېر لږ وخت پس به زۀ تاسو له سزا درکول بند کړم او بيا به زۀ هغوئ ته غصه شم او تباه به يې کړم.

²⁶زۀ مالِک خُدائ رب‌الافواج به زما په خپله کوړه هغوئ داسې ووهم لکه څنګه مې چې د ميديان خلق د عوريب ګټ سره وهلى وُو. زۀ به اسوريانو له هغه شان سزا ورکړم لکه څنګه مې چې د مِصريانو لښکر په سمندر کښې ډوب کړے وو.

²⁷کله چې هغه وخت راشى، نو زۀ به تاسو د اسوريانو د زور نه خلاص کړم او د هغوئ جغ به ستاسو د غاړو نه لرې کړم.“

²⁸د دشمن لښکر د عى ښار قبضه کړے دے! هغوئ د مجرون نه تېر شوى دى! او هغوئ خپل سامانونه په مِکماس کښې پرېښې دى!

²⁹هغوئ د درې نه اوړېدلى دى او شپه به په جبعه کښې تېروى! د راما په ښار کښې خلق يرېدلى دى او د ساول بادشاه د ښار جبعې خلق تښتېدلى دى.

³⁰د جليم خلقو چغې ووهئ! د ليس خلقو غوږ ونيسئ! او د عنتوت خلقو جواب راکړئ!

³¹د مدمينه خلق وتښتيدل او جيبيم خلق د پناه دپاره منډې وهى.

³²دشمن نن د نوب په ښار کښې دے او هغه د يروشلم په ښار کښې د صِيون غر ته د دهمکئ دپاره خپل لاس خوَزوى.

³³خو ګورئ، مالِک خُدائ رب‌الافواج به هغوئ داسې لاندې راوغورزوى لکه چې د ونو نه څانګې ماتېږى. د هغوئ لوئ لوئ او مغروره خلق به راوغورزېږى.

³⁴هغه به تبر سره د ځنګل ونې راوغورزوى، داسې لکه څنګه چې د لبنان غټې ونې راغورزولے شوى وى.