Read Pashto (Nangahari) — د پښتو مقدس کتاب يشعياه 11 Bible Online

يشعياه 11 - Pashto (Nangahari) — د پښتو مقدس کتاب bible

يشعياه 11

¹د يَسى مونډ به راوټوکيږې، او د هغې د جرړو نه به څانګه راوخيژى.

²د مالِک خُدائ روح به د هغۀ سره وى، او دا به د پوهې او حِکمت روح وى، د مشورى او د قوت روح، د علم او د مالِک خُدائ نه د يرې روح،

³او هغۀ ته به د مالِک خُدائ په تابعدارۍ کښې خوشحالى ملاوېږى. هغه به د خلقو په ظاهر صورت او د اورېدو په خبرو باندې عدالت نۀ کوى،

⁴هغه به اِنصاف سره د غريبانانو عدالت کوى، او هغه به اِنصاف سره د بې اسرې خلقو فېصله کوى. د هغۀ د کلام زور سره به زمکه رپيږى او د هغۀ د خولې يو پوکے به بدعمله تباه کوى.

⁵صداقت به د هغۀ ملاتړ وى او وفادارى به د هغۀ کمربند وى.

⁶شرمخان او ګډې به په يو ځائ په سکُون سره اوسېږى، او پړانګ به د چېلو د بچو سره ملاست وى. د غواګانو او زمرو بچى به په يو ځائ خوراک کوى، او يو وړُوکے ماشوم به دا بوتلے راوستے شى.

⁷غواګانې او مېلوګان به په يو ځائ خوراک کوى، او د هغوئ بچى به په يو ځائ په آمن سره پراتۀ وى. او زمرے به د غوَيى په شان بوس خورى.

⁸د پيو ماشوم به د مار سوړې سره لوبې کوى او لږ لوئى ماشوم به د زهرژن مار سوړه کښې لاس اچوى.

⁹د خُدائ پاک په مقدس غر باندې به هيڅ تباهى نۀ کيږى او نۀ به چا ته نقصان رسى، ځکه چې هغه مُلک به د مالِک خُدائ د علم نه داسې ډک وى لکه سمندرونه چې د اوبو نه ډک دى.

¹⁰په هغه وخت به د يَسى جرړې نه راټوکيدلې څانګه د قومونو دپاره د يوې جنډې نښه وى. قومونه به د هغۀ نه رهنمايى غواړى، او د هغۀ د استوګنې ځائ به جلالى وى.

¹¹کله چې هغه ورځ راشى، نو مالِک خُدائ به يو ځل بيا د خپل طاقت نه کار واخلى او خپل هغه خلق به خپلو کورونو ته راولى کوم چې په اسور، مِصر، فتروس، ايتهوپيا، عيلام، بابل او د حمات په مُلکونو کښې او د سمندر په غاړو کښې پاتې شوى وُو.

¹²مالِک خُدائ به د نښې دپاره يوه جنډا راواخلى چې قومونو ته وښائى چې هغه يو ځل بيا د بنى اِسرائيلو او د يهوداه خوارۀ وارۀ خلق راغونډوى او د دنيا د څلورو واړو سرونو نه يې واپس راولى.

¹³د بنى اِسرائيلو حسد به ختم شى او د يهوداه د دشمنانو نام و نشان به ختم شى. بنى اِسرائيل به د يهوداه نه نور نفرت نۀ کوى او نۀ به يهوداه د بنى اِسرائيل سره دشمنى کوى.

¹⁴هغوئ به په يو ځائ د نمرپرېواتۀ طرف په فلستيانو باندې حمله وکړى او چې د نَمرخاتۀ طرف ته کوم خلق اوسېږى نو هغوئ به لوټ کړى. هغوئ به د ادوم او موآب په خلقو باندې فتح حاصله کړى او د عمون خلق به د هغوئ تابعدار شى.

¹⁵مالِک خُدائ به بحرِقُلزم اوچ کړى او هغه به خپل لاس د فرات سيند طرف ته اوچت کړى او يوه ګرمه هوا به راولېږى او د دې نه به اووۀ واړۀ نِهرونه جوړ کړى، چې هغوئ په اوچه زمکه باندې په آسانۍ تېر شى.

¹⁶هلته چې د هغۀ کوم خپل خلق يعنې بنى اِسرائيليان ژوندى پاتې وى نو د هغوئ دپاره به يو لوئ سړک وى چې د اسور نه به ووځى، هغسې لکه څنګه چې د هغوئ پلار نيکۀ دپاره يوه لار جوړه وه کله چې هغوئ د مِصر نه روان شول.