Read Pashto (Nangahari) — د پښتو مقدس کتاب يشعياه 13 Bible Online

يشعياه 13 - Pashto (Nangahari) — د پښتو مقدس کتاب bible

يشعياه 13

¹دا د بابل په باره کښې يو پېغام دے چې د آموص زوئ يشعياه ته څرګند شو.

²”په اوچت غر باندې د جنګ جنډا اوچته کړه! هغوئ ته چغه ووهه او لاسونو سره اشاره ورکړه چې راشى او د هغه مغروره ښار په دروازو کښې ورداخل شى.

³ما مالِک خُدائ دا فوجيان راغوښتى دى، او، ما دا تکړه جنګياليان راغوښتې دى چې زما غصه څرګنده کړى، او چې زما لوئى وشى نو هغوئ به خوشحالى وکړى.

⁴په غرونو باندې شور ته غوږ ونيسئ، د خلقو لوئې ګڼې آوازونو ته غوږ ونيسئ، د قومونو او د بادشاهو د خلقو د راغونډېدو آواز ته غوږ ونيسئ. مالِک خُدائ رب‌الافواج د جنګ دپاره لښکر تياروى.

⁵هغوئ د لرې لرې مُلکونو او د دنيا د سرونو نه راځى. دوئ د مالِک خُدائ اسلحه ده چې د هغۀ غصه څرګنده کړى او هغه ټول مُلک برباد کړى.

⁶ژاړئ او فريادونه کوئ! د مالِک خُدائ ورځ رانزدې ده، هغه ورځ رانزدې ده چې په هغه ورځ به مالِک خُدائ تعالىٰ تباهى راولى.

⁷د هر يو کس لاسونه به کار پرېږدى او ټول خلق به بې‌حوصلې شى.

⁸هغوئ ټول به ويريږى په دردونو کښې به راګير شى، داسې دردونه به وى لکه چې د يوې ښځې ماشوم پېدا کېږى. هغوئ به په يره يره کښې يو بل ته ګورى او د يرې په وجه به د هغوئ مخونه زيړ شى.

⁹ګورئ، د مالِک خُدائ ورځ راروانه ده، د هغۀ د سخت قهر او غصې يوه سخته ورځ راروانه ده. د زمکې نه به بيابان جوړ شى او هر يو ګناهګار به تباه شى.

¹⁰ټول ستورى او د ستورو ډلې به ځلېدل بس کړى، نمر چې راخېژى نو دا به تور وى او د سپوږمۍ رڼا به ختمه شى.

¹¹د دنيا د بدۍ له وجې به زۀ دې له سزا ورکړم، او بدعمله خلقو له به د هغوئ د ګناهونو سزا ورکړم. زۀ به د مغرورانو غرور ختم کړم، او د ظالمانو لوئې به خاورې کړم.

¹²زۀ به انسانان د خالص سرو زرو نه زيات ناياب کړم، او خلق به د اوفير د سرو زرو په شان لږ وى.

¹³په هغه ورځ چې زۀ مالِک خُدائ رب‌الافواج خپله غصه څرګندوم نو زۀ به آسمانونه ولړزوم او زمکه به د خپل ځائ نه وښوزېږى.

¹⁴په بابل کښې به خلق داسې منډې وهى لکه چې هوسۍ د ښکاريانو نه منډې وهى يا ګډې د شپون نه بغېر روانې وى، او هغوئ به خپل وطن او خپل قوم ته واپس د تلو کوشيش کوى.

¹⁵هر څوک چې ګير شى په تُوره به ووهلے شى، او هر څوک چې ونيولے شى نو په تُوره باندې به ووژلے شى.

¹⁶د هغوئ د سترګو په وړاندې به د هغوئ د بچو نه په وهلو وهلو باندې ساه وويستلے شى او د هغوئ کورونه به لوټ کړے شى او د هغوئ د ښځو سره به په زور زنا وشى.“

¹⁷مالِک خُدائ ووئيل، ”زۀ ميديانيان راپارومه چې په بابل باندې حمله وکړى، ځکه چې هغوئ نۀ د سپينو زرو پروا ساتى او نۀ هغوئ دپاره سرۀ زر څۀ معنىٰ لرى.

¹⁸هغوئ به د خپلو غشو او ليندو سره ځلمى ووژنى. هغوئ به په تې رَودونکو ماشومانو او په نورو ماشومانو باندې هيڅ رحم او ترس نۀ کوى.

¹⁹د ټولو نه ښائسته بادشاهى د بابل ده، د هغې ځائ خلق په بابل باندې فخر کوى. خو مالِک خُدائ به بابل هغه شان تباه کړى لکه څنګه چې يې سدوم او عموره تباه کړى وُو!

²⁰هلته به بيا هيڅ څوک هم نۀ اوسېږى. دا به بيا کله هم آباد نۀ شى. نۀ به عرب هلته خېمې لګوى او نۀ به شپانۀ خپلې رَمې ودروى.

²¹دا به يو داسې ځائ وى چرته چې ځنګلى ځناور اوسېږى او چرته چې ګونګا خپلې جالې جوړوى. هلته به شترمرغ اوسېږى او ځنګلى چېلۍ به په هغه کنډرو کښې ټوپونه وهى.

²²د دې په مينارو او محلونو کښې به د ځنګلى سپو او د ګيدړانو آوازونه وى. د بابل وخت رارسېدلے دے! او د دې وخت تقريباً د ختميدو والا دے.“