Read Pashto (Nangahari) — د پښتو مقدس کتاب يشعياه 15 Bible Online

يشعياه 15 - Pashto (Nangahari) — د پښتو مقدس کتاب bible

يشعياه 15

¹دا پېغام د موآب په باره کښې دے. په يوه شپه د موآب ښار عار تباه شوے دے. په يوه شپه د موآب ښار قير تباه شوے دے.

²د ديبون خلق غر ته ختلى دى چې په خپله عبادتخانه کښې ژړا وکړى. د موآب خلق به د نبو او ميدبا په ښارونو باندې د خفګان نه ژړا کوى، هغوئ د خفګان نه خپل سرونه او ګېرې کلې کړې دى.

³په لارو کُوڅو کښې خلقو د ټاټ جامې اغوستې دى، د ښار په چوکونو کښې او د کورونو په چتونو باندې خلق ژړا او ماتم کوى.

⁴د حسبون او اليعالى خلق په ژړا دى او د هغوئ ژړا تر يهض پورې اورېدلے شى. د موآب فوجيان په يره کښې نعرې وهى، او هغوئ بې‌حوصلې شوې دى.

⁵زما زړۀ د موآب دپاره ژاړى! خلق د ضُعر ښار او عجلت شليشياه ښار ته تښتېدلى دى. خلق په ژړا کښې د لوحيت په طرف خيژى، هغوئ د حورونايم په لار په چغو چغو ژاړى.

⁶د نِمريم اوبۀ اوچې شوې دى او د دې واښۀ اوچ شوى دى ټول شينکے ختم شوے دے او يو شين بوټے هم پاتې نۀ دے.

⁷نو په دې وجه خلق د خپل ټول مال دولت او سامان سره خاروَلو د وادۍ نه تيريږى.

⁸د موآب د حد ټولو پولو سره د ژړا آوازونه راتمبيږى. دا ژړا د اجلائم او بير ايليم په ښارونو کښې اورېدلے شى.

⁹د ديبون ښار سره سيند په وينه باندې سور دے او خُدائ پاک به د هغه ځائ په خلقو باندې د هغې نه هم زيات مصيبت راولى. ازمرى به په هغوئ حمله وکړى چې څوک د موآب نۀ بچ وتې وى او په هغوئ هم څوک چې لا په مُلک کښې وى.