Read Pashto (Nangahari) — د پښتو مقدس کتاب يشعياه 18 Bible Online

يشعياه 18 - Pashto (Nangahari) — د پښتو مقدس کتاب bible

يشعياه 18

¹په هغه مُلک افسوس په کوم کښې چې د وزر آواز اورېدلے شى، او چرته چې د کوش سيندونه بهيږى.

²د هغه مُلک نه د نيل درياب ته سفيران په داسې کشتو کښې ځى چې د لوښو نه جوړې وى. اے تېزو پېغام‌ وړُونکو ځئ! هغه لوړو لوړو او د هوارې څرمنې خلقو له پېغام يوسئ د چا نه چې ټوله دنيا يريږى، هغه مضبوط او جنګيالى قوم له پېغام يوسئ، د چا مُلک چې په سيندونو باندې تقسيم دے.

³څوک چې په زمکه اوسېږى نو هغوئ ټول دا واورئ! هغه نښې ته وګورئ چې د غرونو په سرونو به ښکاره شى! او چې بيګل غږېږى نو غوږ ورته ونيسئ!

⁴مالِک خُدائ ما ته ووئيل، ”زۀ به خپل د استوګنې ځائ نه په خاموشئ سره ګورمه. خو زما دا خاموشى به داسې وى لکه د تکڼې غرمې د شغلې په شان يا د لَو په وخت د سحر د پرخې په شان.“

⁵د انګورو راټولولو نه مخکښې، کله چې دا ټول ګلونه وغورزوى او انګور په پخېدو وى، نو مالِک خُدائ به حبشيان داسې په آسانۍ سره تباه کړى لکه چې د بوټو قينچيانې د انګورو د بوټى نه څانګې پرې کوى.

⁶د هغوئ د فوجيانو لاشونه به مارغانو او ځنګلى ځناورو ته پراتۀ وى. په اوړى کښې به هغوئ د مارغانو خوراک وى او په ژمى کښې به د ځناورو خوراک وى.

⁷يو داسې وخت راروان دے چې مالِک خُدائ رب‌الافواج ته به د دې مُلک نه نذرانې ملاوېږى، د هغه لوړو لوړو او د هوارې څرمنې خلقو نه، د چا نه چې ټوله دنيا يريږى، هغه مضبوط او جنګيالې قوم نه د چا مُلک چې په سيندونو باندې تقسيم دے. هغوئ به د صِيون ښار ته راشى، چرته چې مالِک خُدائ رب‌الافواج استوګنه کوى.