Read Pashto (Nangahari) — د پښتو مقدس کتاب يشعياه 19 Bible Online

يشعياه 19 - Pashto (Nangahari) — د پښتو مقدس کتاب bible

يشعياه 19

¹دا پېغام د مِصر په باره کښې دے. ګورئ، مالِک خُدائ مِصر ته د تېزې وريځې دپاسه راروان دے. د مِصريانو بُتان د هغۀ په وړاندې لړزېږى او د مِصر خلق خپله حوصله بائيلى.

²مالِک خُدائ وائى، ”زۀ به په مِصر کښې خانه جنګى راولم نو ورور به د ورور خِلاف شى او ګاونډى به د ګاونډى خِلاف شى. ښار به د ښار خِلاف شى او بادشاهى به د بادشاهۍ خِلاف شې.

³مِصريان به حوصله بائيلى او زۀ به د هغوئ منصُوبې ګډې وډې کړم. هغوئ به د بُتانو، د مړو د روحُونو والا نه او فالګرو نه مشورې اخلى.

⁴زۀ به مِصر يو ظالِم مالِک ته حواله کړم، يو طاقتور بادشاه به په هغوئ حکومت کوى. ما مالِک خُدائ، رب‌الافواج دا وئيلى دى.“

⁵د نيل په درياب کښې به اوبۀ کمې شى او درياب به مکمل اوچ شى.

⁶کله چې د درياب نِهرونه په کميدو شى او اوچېږى نو د دې نه به خراب بوئ ځى. لوښې او جاړې به اوچې شې،

⁷او د نيل درياب په غاړه چې څومره بوټې دى هغه به اوچ شى. او د درياب سره نزدې ټول کَرلے شوې پټې به اوچ شى او په هوا کښې به والوځى.

⁸ماهې ګير به فرياد کوى او ژاړى به، د کُنډو او د جالونو واله به غمژن وى.

⁹جولاګان او څوک چې د لټې جامې جوړوى به نااُميده وى.

¹⁰د کپړې جوړوُونکى به سخت مايُوسه وى، او ټول کاريګر به پرېشانه وى.

¹¹د ضُعن ښار مشران کم عقل دى! د مِصر د بادشاه ښۀ هوښيار مشيران کم عقلې مشورې ورکوى! چې تاسو دا جرأت څنګه کولے شئ چې فِرعون بادشاه ته ووايئ چې، ”مونږ عالمانو شاګردان او د پخوانو بادشاهانو اولاد وُو“؟

¹²اے د مِصر بادشاه، ستا هغه هوښيار مشيران چرته دى؟ هغوئ دې معلوم کړى او تا ته دې ووائى چې مالِک خُدائ رب‌الافواج د مِصر دپاره څۀ منصُوبې لرى.

¹³د ضُعن مشران کم عقل دى او د ميمفِس مشرانو دوکه خوړلې ده. دغه مشرانو مصر بې لارې کړے دے.

¹⁴مالِک خُدائ هغوئ کم عقل کړى دى، نو د هغوئ ټولې مشورې غلطې دى. هغوئ مِصر داسې ګډ وډ کړے دے لکه چې يو شرابى په نشه کښې په خپلو اُولټو کښې ښوئيږى.

¹⁵مِصر به هيڅ هم نۀ شى کولے، که مشر وى او که کشر، که لوئ وى او که وړوکے.

¹⁶په هغه ورځ به مِصريان د ښځو په شان کمزورى وى. چې مالِک خُدائ رب‌الافواج هغوئ له د سزا ورکولو دپاره لاس اُوچت کړى نو هغوئ به د يرې نه ولړزېږى.

¹⁷او د يهوداه مُلک په وجه به په مِصريانو باندې يره راشى، هر چا ته چې د يهوداه نوم واخستلے شى نو هغه به ويريږى، دا د هغه منصُوبې په وجه چې مالِک خُدائ رب‌الافواج د هغوئ خِلاف تياره کړې ده.

¹⁸په هغه وخت کښې به د مِصر په پينځو ښارونو کښې عبرانى ژبه وئيلے شى. د هغه ځائ خلق به د مالِک خُدائ رب‌الافواج په نوم باندې د وفادارۍ قسمونه کوى. په هغه ښارونو کښې به د يو ښار نوم ”د نمر ښار“ وى.

¹⁹په هغه وخت کښې به د مِصر د مُلک په مينځ کښې د مالِک خُدائ دپاره يوه قربان ګاه وى او د مِصر په سرحد باندې به د کاڼى يو يادګار وى چې هغۀ ته وقف شوے وى.

²⁰دا به په مِصر کښې د مالِک خُدائ رب‌الافواج د موجودګۍ نښې وى. کله چې هلته د خلقو سره ظلم زياتے کېږى او د مدد دپاره مالِک خُدائ ته آواز وکړى، نو هغه به د هغوئ د بچ کولو دپاره خلاصونکے ورلېږى.

²¹مالِک خُدائ به د مِصر خلقو ته خپل ځان څرګند کړى او هغوئ به يې قبول کړى او د هغۀ عِبادت به کوى او هغۀ ته به قربانۍ او نذرانې پېش کوى. هغوئ به د هغۀ سره پاخۀ لوظونه وکړى او خپلې وعدې به ورسره پوره کوى.

²²مالِک خُدائ به مِصريانو له سزا ورکړى، خو هغه به يې بيا روغ کړى. هغوئ به هغۀ ته راوګرځى او هغه به د هغوئ سوال قبول کړى او هغوئ به روغ کړى.

²³په هغه وخت کښې به د مِصر او اسور په مينځ کښې يوه لويه لار وى. او د دواړو مُلکونو خلق به د يو بل مُلک ته ځى راځى او د مِصر او اسور قومونه به په يو ځائ عِبادت کوى.

²⁴په هغه وخت کښې به بنى اِسرائيل د مِصر او اسور سره ملګرے شى او دا درې واړه قومونه به د ټولې دنيا دپاره د برکت سبب جوړ شى.

²⁵مالِک خُدائ رب‌الافواج به دې قومونو له برکت ورکړى او ووبه وائى، ”اے مِصريانو، زما خلقو، اے اسوريانو، تاسو ما پېدا کړى يئ، اے بنى اِسرائيلو، تاسو زما غوره شوى خلق يئ نو تاسو له زۀ برکت درکوم.“