Read Pashto (Nangahari) — د پښتو مقدس کتاب يشعياه 2 Bible Online

يشعياه 2 - Pashto (Nangahari) — د پښتو مقدس کتاب bible

يشعياه 2

¹دا هغه پېغام دے چې خُدائ پاک د آموص زوئ يشعياه باندې د يهوداه او يروشلم په باره کښې نازل کړو:

²په راتلونکې وخت کښې، په کوم غر باندې چې د خُدائ پاک کور جوړ دے، هغه به د ټولو نه اُوچت غر وى، د غرونو په ټولو غونډو باندې به دا د برج په شان اُوچت وى. او ټول قومونه به د سېلاب په شان ورروان وى،

³او د ډيرو قومونو خلق به راشى او وبه وائى: ”راځئ چې د مالِک خُدائ غر ته وخېژُو، او چې د بنى اِسرائيلو د خُدائ پاک کور ته لاړ شو، هلته به هغه مونږ ته خپلې لارې وښائى، او مونږ به د هغۀ په لارو ځو.“ ځکه چې د صِيون نه به د هغۀ تعليمات راوځى، او د هغۀ کلام به د يروشلم نه راځى.

⁴مالِک خُدائ به د قومونو اِنصاف وکړى او د هغوئ په مينځ کښې به لانجې هوارې کړى. هغوئ به د خپلو تُورو نه د يوې خولې جوړې کړى او د خپلو نېزو نه به د بوټو قينچيانې جوړې کړى. قومونه به هيڅ کله بيا جنګ له لاړ نۀ شى، او نۀ به بيا دوئ د جنګ تربيت حاصلوى.

⁵نو اے د يعقوب اولاده، راځئ چې مونږ د مالِک خُدائ په رڼا کښې ګرځو!

⁶اے مالِکه خُدايه، تا خپل خلق، د يعقوب اولاد رد کړے دے! ځکه چې هغوئ خپل مُلک د نَمرخاتۀ د طرف د جادوګرئ نه ډک کړے دے. د فلستيانو په شان هغوئ هم فالګرو له ځى او د بل مُلک خلقو سره غاړه غټئ اوسيږى.

⁷د هغوئ مُلک د سپينو زرو او سرو زرو نه ډک دے او د هغوئ خزانې نۀ ختمېږى. د هغوئ مُلک د اسونو نه ډک دے او د هغوئ جنګى ګاډۍ بې شميره دى.

⁸د هغوئ مُلک د بُتانو نه ډک دے او هغوئ داسې څيزُونو ته سجدې لګوى چې هغوئ په خپلو لاسونو جوړ کړى دى.

⁹نو په دې وجه به هغوئ بې‌عزته او سپک شى! اے مالِکه خُدايه، هغوئ مۀ معاف کوه.

¹⁰په غارونو کښې ورننوزئ او د مالِک خُدائ د يرې نه او د هغۀ د شان او شوکت نه ځان په خاورو کښې پټ کړئ!

¹¹د انسان مغروره سترګې به ټيټى کړے شى او د انسان لويى به په عاجزۍ بدله شى. نو په هغه ورځ به صرف د مالِک خُدائ ثناء صِفت کېږى.

¹²په هغه ورځ به مالِک خُدائ رب‌الافواج ټول طاقتور خلق او هغه هر څوک چې مغروره يا لوئ وى، هغه ټول به عاجزه کړى.

¹³هغه به د لبنان لوړ لوړ دِيار او د بسن د مُلک د څېړۍ ټولې ونې تباه کړى.

¹⁴هغه به اُوچت غرونه او د غرونو اُوچتې غونډۍ هوارې کړى،

¹⁵هغه به هر يو اُوچت برج او د هرې قلعې مضبوط دېوالونه هوار کړى.

¹⁶هغه به ټول لوئې سمندرى جهازُونه او ټولې ښائسته کشتۍ ډُوبې کړى.

¹⁷۱۷‏-۱۸ د انسان غرور به په عاجزۍ بدل شى او د انسان لويى به خاورې ايرې شى. بُتان به په مکمله توګه ورک شى او په هغه ورځ به صرف د مالِک خُدائ ثناء صِفت کېږى.

¹⁹چې کله مالِک خُدائ د دنيا يرولو دپاره پاڅى نو خلق به د غرونو په غارونو کښې پټېږى او په زمکه کښې به په سوړو کښې پټېږى، د دې دپاره چې د مالِک خُدائ د دهشت او جلال نه وتښتى.

²⁰کله چې هغه ورځ راشى، نو هغوئ چې کوم د سپينو زرو او سرو زرو بُتان جوړ کړى وى چې عبادت يې وکړى نو هغه به وغورزوى. او هغوئ به منږکانو او ښاپېرکانو ته پرېږدى.

²¹چې کله مالِک خُدائ د دنيا يرولو دپاره پاڅى نو خلق به د غرونو په غارونو کښې پټېږى او په زمکه کښې به په سوړو کښې پټېږى، د دې دپاره چې د مالِک خُدائ د دهشت او جلال نه وتښتى.

²²په انسان باندې توکل مۀ کوه، د هغوئ ژوند د يوې لحظې دے او د هغې قدر څۀ دے؟