Read Pashto (Nangahari) — د پښتو مقدس کتاب يشعياه 20 Bible Online

يشعياه 20 - Pashto (Nangahari) — د پښتو مقدس کتاب bible

يشعياه 20

¹په کوم کال چې د اسور د بادشاه د سرجون په حُکم باندې د اسوريانو د لښکر فوجى مشر په اشدود ښار باندې حمله وکړه او دا يې قبضه کړو،

²په هغه وخت کښې مالِک خُدائ د آموص زوئ يشعياه ته وئيلى وُو چې هغه څپلۍ او د ټاټ هغه جامې وباسى کومې چې هغۀ اغوستې وې. نو هغۀ دا حُکم ومنلو او بربنډ او بغېر د څپلو نه روان شو.

³نو بيا مالِک خُدائ ووئيل، ”زما خِدمت کوُونکے يشعياه درې کاله بربنډ او بغېر د څپلو نه ګرځېدلے دے. دا د هغې نښه ده چې په مِصر او ايتهوپيا باندې به څۀ کېږى.

⁴د اسور بادشاه چې د دې دوو مُلکونو نه قېديان نيولى دى نو هغوئ به بربنډ بوځى. ځلمى او بوډاګان به د څپلو نه بغېر او بربنډ روان وى، د هغوئ کوناټى به ښکارى، دا به د مِصر دپاره د شرم خبره وى.

⁵چا چې په ايتهوپيا باندې يقين ساتلے وى او په مِصر باندې يې لافې وهلې وى نو هغوئ به مايُوسه شى او وبه شرميږى.

⁶کله چې هغه وخت راشى نو کوم خلق چې د فلستيه د سمندر په غاړه اوسېږى نو هغوئ به ووائى، وګورئ، په هغه خلقو باندې څۀ وشول چې په چا باندې مونږ دا يقين کولو چې مونږ به د اسور د بادشاه نه بچ کړى! خو اوس زمونږ دپاره د خلاصى لار هم نشته!“