Read Pashto (Nangahari) — د پښتو مقدس کتاب يشعياه 23 Bible Online

يشعياه 23 - Pashto (Nangahari) — د پښتو مقدس کتاب bible

يشعياه 23

¹دا پېغام د صور په باره کښې دے. اے د ترسيس سمندرې جهازونو وژاړئ! ځکه چې په صور کښې قلعه او کورونه تباه دى، په قبرص کښې چې تاسو کومه خبره آوريدلې وه هغه رښتيا ده.

²اے د سمندر د غاړې اوسيدونکو ماتم وکړئ! اے د صيدا سوداګرو، تاسو ماتم وکړئ! ستاسو تاجران به د سمندر نه تېريدل

³او په ژورو اوبو باندې به يې صفر کولو او د مصر غله به يې تاسو له رارسوله ولې چې تاسو به د نيل د درياب د غاړې نه. او داسې تاسو د ټولو قومونو دپاره د تجارت مرکز جوړ شوئ.

⁴خو اوس تۀ شرميدلے يې، اے د صيدا ښاريې. د سمندر قلعه بند ښار صور وائى، ”زۀ بې بچو يمه، زما هيڅ زامن او لوڼه نشته.“

⁵کله چې مِصريانو ته د صور خبر مِلاو شى نو هغوئ به په غم اخته شى.

⁶اے د سمندر د غاړې خلقو، تاسو د خفګان نه وژاړئ! او ترسيس ته د تښتېدو کوشش وکړئ!

⁷آيا دا ستاسو خوشحاله ښار دے کوم چې ډېر د پخوا نه آباد دے؟ آيا دا هغه ښار دے چې خپل اوسېدونکى يې لرى مُلکونو ته ولېږل چې کورونه جوړ کړى.

⁸په صور باندې دا آفت چا راوستے دے، هغه صور ښار چې به يې بادشاهيانې جوړولې؟ د هغې سوداګر شهزادګان وُو او د هغې تاجران عزتمند ګڼلے شول.

⁹خو دا د مالِک خُدائ رب‌الافواج منصُوبه وه چې هغه به ټول د شان او شوکت واله خلق سپک کړى، او عزتمند کسان به وشرموى.

¹⁰اے د ترسيس خلقو، د خپلې علاقې نه خوارۀ شئ لکه څنګه چې د نيل درياب د غاړو نه اوړى. نور تاسو پابند نۀ يئ.

¹¹مالِک خُدائ په سمندر باندې لاس اُوچت کړے دے او بادشاهۍ يې لړزولې دى. هغۀ حُکم کړے دے چې ستاسو قلعې دې تباه شى.

¹²هغۀ ووئيل، ”اے د صيدا خلقو، ستاسو خوشحالى ختمه شوې ده او ستاسو خلقو سره ظلم زياتے شوے دے. که هغوئ قبرص ته هم وتښتى، نو آرام به ورته مِلاو نۀ شى.“

¹³د بابل مُلک ته وګورئ. د دې مُلک خلق برباد شوى دى. اسوريانو د هغوئ مُلک د ځنګلى ځناور کور جوړ کړے دے. اسوريانو د محاصرې برجونه جوړ کړل او د هغوئ قلعې يې بربادې کړې. او د ملبې ډيرے يې ترينه جوړ کړے دے.

¹⁴اے د ترسيس سمندرې جهازونو د خفګان نه وژاړئ! ولې چې ستاسو قلعه تباه شوې ده.

¹⁵يو داسې وخت راروان دے چې صور به اويا کاله دپاره هېر کړے شى، چې اويا کاله د يو بادشاه د عُمر برابر وى. کله چې هغه کالونه ختم شى، نو صور به بحال شى لکه څنګه چې سندره د کنجرې په حقله وئيلے شى:

¹⁶”اے غريبې هېرې شوې کنجرې! خپله بينجو واخله او په ښارکښې وګرځه، ساز غږوه او خپلې سندرې بيا بيا وايه، نو چې داسې يو ځل بيا ياده کړے شې.“

¹⁷کله چې هغه اويا کاله تېر شى، نو مالِک خُدائ به صور له موقع ورکړى چې هغه بيا د کنجرې په شان پخوانے کاروبار شروع شى او د صور لېن دېن به د زمکې په مخ د ټولو بادشاهو سره وى.

¹⁸خو دا ښار چې په تجارت کښې کومه ګټه کوى نو هغه به مالِک خُدائ ته وقف کېږى. دا پېسه به نۀ شى جمع کولے، خو چې څوک د مالِک خُدائ په حضور کښې پاتې کيږې نو هغوئ به په دې پېسو باندې ښۀ کافى خوراک او ښائسته لباس اخلى.