Read Pashto (Nangahari) — د پښتو مقدس کتاب يشعياه 24 Bible Online

يشعياه 24 - Pashto (Nangahari) — د پښتو مقدس کتاب bible

يشعياه 24

¹ګوره مالِک خُدائ به زمکه ورانه وېجاړه کړى او هم داسې شاړه به يې پرېږدى. هغه به د زمکې مخ کندې کپرى کړى او د دې خلق به خوارۀ وارۀ کړى.

²هيڅ څوک به بچ پاتې نۀ شى، که هغه اِمامان وى يا عام خلق، مالِک وى که نوکر، مالِکه وى که نوکره، خرڅوُونکى وى يا اخستُونکى، قرض ورکوُونکى يا قرض اخستُونکى، که قرضدار وى او که مالدار وى.

³زمکه به په مکمل طور ورانه وېجاړه او لوټ کړے شى، مالِک خُدائ دا هر څۀ وئيلى دى.

⁴زمکه اوچېږى او خُشکېږى، ټوله دُنيا به اوچه شى او مړاوې به شى، د دې لوئ لوئ خلق به فنا شى.

⁵خلقو دُنيا پليته کړې ده ځکه چې هغوئ د خُدائ پاک قانون مات کړے دے او هغه تړون يې مات کړے دے کوم يې چې د همېشه دپاره ورسره کړے وو.

⁶نو په دې وجه به زمکه لعنتى شى او نقصان به ورته ورسى، او چې د دې خلقو څۀ بد عمل کړے دے نو د هغې بدله ورته ملاوېږى. نو په دې وجه د دنيا خلق کم شول او ډېر لږ خلق ژوندى پاتې شول.

⁷د انګورو بوټى اوچ شوى دى او د انګورو شراب کم شوى دى. هر څوک چې مخکښې خوشحاله وو نو هغه اوس خفه دى،

⁸او د هغوئ د رباب او د تمبل خوشحالۍ نه ډک سازُونه او د جشن آوازونه بند شوى دى.

⁹اوس خلق سندرې نۀ وائى او نه د انګورو شراب څښى، بلکه بير په هغوئ باندې تراوۀ لګى.

¹⁰شاړ ښار برباد شوے دے او د هر يو کور دروازه کلکه بنده ده چې څوک ورننه نۀ وځى.

¹¹په کُوڅو کښې خلق چغې وهى چې د انګورو شراب ختم شوى دى. هره خوشحالى ختمه شوې ده، خوشحالى د زمکې نه ورکه شوې ده.

¹²ښار په کنډر بدل شوے دے او د دې دروازې زرې زرې شوې دى.

¹³نو په ټوله دنيا کښې هر يو قوم سره به هم داسې کېږى. صرف لږ خلق به پاتې شى داسې لکه چې د زيتُونو راټولولو نه پس هم لږ پاتې وى او يا د انګورو د راشوکولو نه پس هم په باغ کښې يو څو دانې پاتې وى.

¹⁴خو چې کوم لږ کسان ژوندى پاتې وى نو هغوئ به د خوشحالۍ سندرې وائى. څوک چې د نمرپرېواتۀ طرف ته وى هغوئ به د مالِک خُدائ لوئى بيانوى،

¹⁵د نَمرخاتۀ په طرف مُلکونو کښې د مالِک خُدائ ثناء صِفت کوئ. کوم خلق چې د سمندر په غاړه اوسېږى نو هغوئ دې د مالِک خُدائ ثناء صِفت بيانوى، کوم چې د بنى اِسرائيلو خُدائ پاک دے.

¹⁶مونږ د دنيا د آخرى سرونو نه سندرې اورو، هغه سندرې چې صادق خُدائ ته لوئى ورکوى. خو زما زړۀ د غمه ډک دے. زما دپاره ژاړئ ځکه چې زۀ دوړيږم. دوکې تر اوسه موجودى دى او هر طرف ته دوکه باز دى.

¹⁷اے د دنيا خلقو واورئ! يره، کندې او دامونه ستاسو دپاره تيار دى.

¹⁸هر څوک چې د يرې نه تښتېدل غواړى نو هغه به په کنده کښې پرېوزى او هر څوک چې د کندې نه ځان خلاصوى نو په دام کښې به ګېرېږى. د آسمان نه به ډير دروند باران ورېږى او د زمکې بنيادونه به ولړزېږى.

¹⁹زمکه به وچوى، خوزيږى به او زنګيږى به.

²⁰زمکه به د نشائې شرابى په شان زنګيږى او داسې رپيږى لکه چې په طوفان کښې چې چوپال ښوزېږى. دا د ګناه په وجه درَنه شوې ده، دا به راوغورزېږى او بيا به هيڅ کله پا نۀ څى.

²¹په هغه وخت به مالِک خُدائ آسمانى طاقتُونو له او د زمکې بادشاهانو له سزا ورکړى.

²²هغوئ به ګرفتار کړے شى او په يوه قېدخانه کښې به بند کړے شى او ښۀ موده پس به ورته سزا ورکړے شى.

²³نو سپوږمۍ به توره شى او د نمر رڼا به کمه شى، ځکه چې مالِک خُدائ رب‌الافواج به حکومت کوى. هغه به په يروشلم کښې د صِيون په غرۀ باندې د مشرانو په وړاندې شان او شوکت سره بادشاهى کوى.