Read Pashto (Nangahari) — د پښتو مقدس کتاب يشعياه 27 Bible Online

يشعياه 27 - Pashto (Nangahari) — د پښتو مقدس کتاب bible

يشعياه 27

¹په هغه ورځ به مالِک خُدائ د خپلې زورورې او کلکې تُورې نه کار واخلى چې هغه تختيدونکې بلا له يعنې تاوېدونکې راتاوېدونکې بلا له سزا ورکړى او وې ووژنى کومه چې په سمندر کښې اوسېږى.

²په هغه ورځ، ”د انګورو ښائسته باغ په باره کښې سندره ووايئ،

³زۀ مالِک خُدائ پخپله د دې خيال ساتم او پابندئ سره اوبۀ ورکوم. او شپه او ورځ د دې څوکيدارى کوم چې څوک نقصان ورونۀ رسوى.

⁴زما غصه اوس يخه شوې ده. خو که په دې باغ کښې آزغى او مرکونډئ وشول نو زۀ به ورسره جنګ وکړم او ټول به وسوَزوم.

⁵خو که هغوئ زما نه مدد وغواړى، نو هغوئ دې زما سره روغه وکړى. او پرېږدئ چې هغوئ زما سره صُلح وکړى.“

⁶هغه وخت راروان دے چې د يعقوب اولاد به جرړې وکړى، بنى اِسرائيل به غوټۍ ونيسى او ګلونه به وکړى. او مېوه به يې دنيا ډکه کړى.

⁷ولې مالِک خُدائ بنى اِسرائيل داسې وهلے دے لکه څنګه يې چې د هغۀ دشمنان وهلې دى؟ ولې بنى اِسرائيل داسې قتل شوى دې لکه څنګه چې د هغۀ دشمنان قتل شوى دى؟

⁸نه، بلکه مالِک خُدائ د هغوئ مخالفت وکړو او جلاوطن يې کړل. هغوئ يې د نَمرخاتۀ په طرف د يوې زورورې هوا سره وشړل.

⁹نو داسې به د يعقوب ګناه معاف شى، او چې کله د بنى اِسرائيل ګناهُونه ختم شى نو په نتيجه کښې به هغوئ د غېرو قومونو قربان ګاه د چونې د کاڼى په شان ذرې ذرې کړى او د قربان ګاه خوشبودارې مصالحې او د اشيرې د بُت نښې به پاتې نۀ شى.

¹⁰د قلعې په شان د پَخو دېوالونو ښار کنډر پروت دے. دا د يو خوشى بيابان په شان وران وېجاړ پروت دے. او بيا به په دې کښې څاروى څرېږى آرام به کوى او څانګې به خورى.

¹¹د ونو څانګې اوچې شوې او ماتې شوې دى او ښځې يې د خشاک په توګه راغونډوى. خلق په هيڅ څيز باندې هم ځان نه پوهوى نو په دې وجه چا چې هغوئ پېدا کړى دى ورباندې هيڅ رحم نۀ کوى، چا چې هغوئ تخليق کړې دى ورباندې هيڅ ترس نۀ کوى.

¹²په هغه ورځ به مالِک خُدائ د فرات سيند نه واخله تر مِصر سرحده پورې خپل خلق يو يو کس راغونډ کړى، داسې لکه څوک چې د بوسو نه غنم رابېلوى.

¹³په هغه وخت به يو بيګل وغږولے شى چې د اسور او مِصر نه هغه ټول بنى اِسرائيليان راوغواړى کوم چې په جلاوطنۍ کښې وى. نو هغوئ به راشى او په يروشلم کښې به د مالِک خُدائ عِبادت وکړى، کوم چې د هغۀ مقدس غر دے.