Read Pashto (Nangahari) — د پښتو مقدس کتاب يشعياه 28 Bible Online

يشعياه 28 - Pashto (Nangahari) — د پښتو مقدس کتاب bible

يشعياه 28

¹په سامريه باندې افسوس چې د شرابى بنى اِسرائيلو شاندار تاج دے. په هغه ښار باندې افسوس چې د بنى اِسرائيلو شان او شوکت وو خو اوس مړاوے کيدونکے ګل دے. په هغه آبادئ باندې افسوس چې په نشه کښې د ډوبو خلقو په زرخيزه وادۍ باندې ولاړه ده.

²ګورئ، مالِک خُدائ به يو قوى او طاقتور راوليږى، لکه د ږلۍ د طوفان په شان او د بربادئ د طوفان په شان، او د سيلاب راوستلو واله تېز باران په شان به پرې حمله وکړى او زور سره به يې دې زمکى له راولى.

³بيا به سامريه د بنى اِسرائيلو شرابيانو شاندار تاج د پښو لاندې ذرې ذرې شى.

⁴بيا به دا مړاوے کيدونکے ګل په زرخيزه وادۍ باندې ولاړ وى او د دې شان او شوکت به ختم شى. د هغوئ حال د موسم د وړومبو اينځرو په شان دے چې څنګه پاخۀ شى نو راوشوکولے شى او وخوړلے شى.

⁵په هغه ورځ به مالِک خُدائ رب‌الافواج د خپلو هغه خلقو دپاره د ګلونو د شاندار تاج په شان وى چې کوم خلق ژوندى پاتې وى.

⁶هغه به هغه کسانو له د اِنصاف جذبه ورکړى چې څوک د قاضيانو په توګه کار کوى او هغوئ له به حوصله ورکړى چې څوک د حملې نه د ښار د دروازو حِفاظت کوى.

⁷تر دې پورې چې پېغمبران او اِمامان هم دومره نشه دى چې تمبېږى. هغوئ د انګورو شراب او بير دومره زيات څښلى دى چې تيندکونه خورى. پېغمبران دومره زيات نشه دى چې خُدائ پاک کومه وحې نازلوى نو په هغې باندې نۀ پوهېږى او اِمامان هم دومره نشه دى چې د فيصلې ورکولو په وخت زنګيږى.

⁸د هغوئ ټول ميزونه په اُولټو ګنده دى او يو ځائ هم په کښې صفا نشته.

⁹هغوئ په خپلو کښې وائى، ”دا سړے زمونږ سره دا قِسم خبرې ولې کوى؟ د تعليم او د خُدائ د پېغام اورولو په وخت مونږ داسې پوهوى لکه چې مونږ واړۀ ماشومان يو او اوس اوس د پيو نه خلاص شوى يو.

¹⁰هغه مونږ ته ټکے په ټکے، کرښه په کرښه او په مزه مزه تعليم راکوى.“

¹¹نو اوس به خُدائ پاک خپلو خلقو سره د پردى مُلک د خلقو په ذريعه خبرې کوى څوک چې عجيبه ژبه وائى.

¹²خُدائ پاک خپلو خلقو ته وئيلى دى، ”دا د آرام ځائ دے. ستړى دې دلته آرام وکړى، ولې چې هم دا ځائ د آرام دے.“ خو هغوئ غوږ نۀ کيښودو.

¹³نو دا ځکه به مالِک خُدائ هغوئ ته ټکے په ټکے، کرښه په کرښه او په مزه مزه تعليم ورکوى. نو هغوئ به تيندکونه وخورى او راپرې به وزى. هغوئ به زخمى شى، په جال کښې به ګېر شى او ګرفتار به شى.

¹⁴نو اے ګستاخه کسانو څوک چې په يروشلم کښې په دې خلقو باندې حکومت کوئ، اوس چې څۀ مالِک خُدائ وائى نو هغې ته غوږ ونيسئ.

¹⁵تاسو لافې وهلې چې تاسو د مرګ سره تړون کړے دے او د عالمِ ارواح سره مو تړون کړے دے. ستاسو دا يقين دے چې کله آفت راشى نو تاسو به بچ شئ، ځکه چې ستاسو خيال دا دے چې خپل دروغ او دوکه به تاسو بچ وساتى.

¹⁶نو مالِک خُدائ پاک داسې وائى، ”زه په صِيون کښې يو داسې بُنياد ايږدم چې کلک او مضبوط وى. په هغې کښې زۀ د ګوټ يو قيمتى کاڼے لګوم چې په هغې باندې ليکلى وى، څوک چې ايمان لرى نو هغه به نۀ وارخطا کېږى.

¹⁷زۀ به اِنصاف د دې فيته او صداقت د دې د سال مزے کړم. تاسو چې په کومو دروغو باندې يقين ساتئ نو ږلۍ به يې ټول يوسى او سېلابونه به ستاسو د پناه ځايُونه وران کړى.“

¹⁸تاسو چې د مرګ سره کوم تړون کړے دے نو هغه به منسوخ کړے شى او چې د عالمِ ارواح سره تاسو کوم تړون کړے وى نو هغه به ختم کړے شى. هغه زورور آفت به تاسو ووهى او تاسو به ترې نه لاندې شئ.

¹⁹دا آفت به تاسو بار بار وهى او هر سحر به مو وهى. دا به په تاسو شپه او ورځ راځى، تر هغې پورې چې تاسو يې وړى نۀ يئ. دا پېغام به ستاسو په خلقو باندې يره راولى.

²⁰ستاسو کټ دومره لنډ دے چې پښې په کښې نۀ شى غزيدلے او کمبله دومره وړه ده چې څوک په کښې پټېدے نۀ شى.

²¹مالِک خُدائ به داسې راپاڅى لکه څنګه چې هغه د پراضيم غر باندې فلستيانو پسې راپاڅيدلے وو. او څنګه يې چې د جبعون په وادۍ کښې اموريانو باندې حمله کړې وه داسې به په تاسو هم حمله وکړى. او چې کوم کارونه به هغه کوى نو هغه به عجيبه وى. او د هغۀ هر قدم به فرق فرق وى.

²²زۀ چې کوم خبردارے درکوم نو په هغې پورې خندا مۀ کوئ! که تاسو خندا وکړه نو ستاسو دپاره به خلاصېدل ګران شى. ما د مالِک خُدائ رب‌الافواج د ټول مُلک د تباه کولو فېصله اورېدلې ده.

²³زۀ چې درته څۀ وايم نو هغې ته غوږ ونيسئ، زۀ چې درته څۀ وايم هغې ته ښۀ توجو وکړئ.

²⁴ولې زميدار هميشه يَوه کوى او هيڅ کله کر نۀ کوى څۀ؟ ولې هغه هميشه پټې اړوى او هيڅ کله څۀ نۀ کرى؟

²⁵کله چې هغه يو ځل پټے هوار او تيار کړى، نو هغه تخم کرى لکه کاږۀ، د زيرې تخم، غنم او اوربشې په صحيح طريقه او صحيح ځائ باندې کرى.

²⁶زميدار ته پته وى چې څۀ به کوى، ځکه چې خُدائ پاک هغۀ ته پوهه ورکړې ده.

²⁷هغه د کاږو او زيرې د تخم ټکولو دپاره لوئ ډانګ نۀ استعمالوى، بلکه د دې دپاره د يو وړُوکى او برابر لرګى نه کار اخلى.

²⁸هغه غنم په درمند کښې دومره نۀ غوبل کوى چې خراب تُراب شى، ځکه چې هغۀ ته پته وى چې په ګاډۍ باندې به يې څنګه غوبل کړى چې غله خرابه نۀ شى.

²⁹مالِک خُدائ رب‌الافواج ذبردست اُستاذ دے، او هغه دې زميدار له ښۀ پوهه ورکوى.