Read Pashto (Nangahari) — د پښتو مقدس کتاب يشعياه 29 Bible Online

يشعياه 29 - Pashto (Nangahari) — د پښتو مقدس کتاب bible

يشعياه 29

¹اے رى ايل، اے رى ايل، په تا باندې افسوس! په هغه ښار باندې افسوس کوم کښې چې داؤد خېمې لګولې وې! اوس کال په کال خپل اخترونه کوئ.

²خو بيا به زۀ په هغه ښار باندې يو آفت راولم هلته به ژړا او ماتم وى. او ټول يروشلم به داسې شى لکه څنګه چې د هغې د اے رى ايل نوم معنىٰ ده ”يوه داسې قربان ګاه چې په وينو لت پت وى“.

³ولې چې زۀ به تا د هر طرف نه راګير کړم او ستا د محاصرې به پوره بندوبست وکړم.

⁴بيا به تۀ د زمکې لاندې نه خبرې کوې، د خاورو نه به ستا غلے آواز راوځى. څنګه چې د يو مړى روح د قبر نه د خبرو کولو کوشش کوى، دغه شان به ستا آواز غلے شان راځى.

⁵نو سمدستى به ستا دشمنان لکه د دوړې په شان والوځى، په تا باندې حمله کوونکى به داسې وشړلے شى لکه هوا چې بهوس زغلئ. ولى چې اچانک په يوه لحظه کښې به

⁶مالِک خُدائ رب‌الافواج په هغوئ باندې حمله وکړى. هغه به د لوئ تندر، زلزلې، لوئ شور، تېزې سيلۍ، طوفان او سوزونکې اور سره راځى،

⁷نو بيا د هغه ټولو قومونو لښکرې کوم چې د خُدائ پاک د اے رى ايل په ښار باندې حمله کوى، د هغوئ ټوله وسلحه او ساز و سامان به د يو خوب ليدو په شان فنا شى، داسې به فنا شى لکه چې دا د شپې يو خيال وى.

⁸هغه ټول قومونه چې په يروشلم باندې د حملې کولو دپاره راجمع شوى دى د هغوئ مثال به د يو اوږى کس په شان وى چې خوب وينى چې هغه خوراک کوى خو چې راپاڅى نو پته ورته ولګى چې هغه هم هغسې اوږے دے، يا د هغه تږى کس په شان وى چې په خوب کښې ګورى چې اوبۀ څښى خو چې راپاڅى نو پته ورته ولګى چې هغه هم هغه شان د تندې د لاسه بې دمه دے.

⁹حيران شئ او اريان دريان شئ. ځان نه ړاندۀ جوړ کړئ او ړاندۀ شئ. نشه شئ خو د انګورو په شرابو نه، زنګيږئ خو په بير نه.

¹⁰نو ځکه مالِک خُدائ تاسو خوبَولى کړى يئ او په دروند خوب باندې په اُودۀ کېدو بدل يئ. هغۀ د پېغمبرانو او د رويا ليدونکو سترګې بندې کړى دى.

¹¹د هرې پېغمبرئ د وحې مطلب به ستاسو نه پټ وى، دا به د يو بند کِتاب په شان وى. که تاسو دا يو داسې کس له يوسئ چې هغه يې لوستلے شى او هغۀ ته ووايئ چې دا ولولى، نو هغه به وائى چې زۀ دا نۀ شم لوستلے ځکه چې دا پوخ بند دے.

¹²که تاسو دا يو اَن پړ کس له ورکړئ چې وې لولى، نو هغه به جواب درکړى چې زۀ اَن پړ يم.

¹³مالِک خُدائ وفرمائيل، ”دا خلق تش په خولهٔ زما عزت کوى خو زړونه يې رانه ډير لرې دى. خو دوئ بې فائدې زما عبادت کوى ځکه چې دوئ د انسانانو حکمونه د تعليم په ډول ورکوى.

¹⁴نو په دې وجه به په راتلونکې وخت کښې يو ځل بيا زما سلوک د دې قوم سره ډير عجيبه او د حيرانتيا وى. بيا به د هغوئ د هوښيارانو هوښيارتيا ختمه شى او د هغوئ د پوهانو پوهه به غيبه شى.“

¹⁵څوک چې د مالِک خُدائ نه د خپلو منصُوبو د پټولو کوشش کوى نو په هغوئ افسوس! هغوئ په پټه باندې منصُوبې جوړوى او خيال يې دا وى چې، ”څوک به مونږ وينى او څوک به مونږ وپيژنى؟“

¹⁶هغوئ هر يو څيز ګډ وډ کوى. د کُلال اهميت زيات دے که د خټې؟ يو کس چې څۀ څيز جوړ کړى نو هغه څيز خپل جوړېدونکى ته داسې وائى څۀ، ”تا زۀ نۀ يم جوړ کړے،“ او يا دا چې، ”تۀ په هيڅ هم نۀ پوهېږې“؟

¹⁷لږ وخت پس به د لبنان ځنګل نه پټى جوړ شى او پټى به په ځنګل بدل شى.

¹⁸کله چې هغه وخت راشى، نو کاڼۀ به د کِتاب تلاوت اورى او ړاندۀ به د تورتم او تيارۀ نه رابهر شى او وينى به.

¹⁹عاجزان به بيا د مالِک خُدائ ورکړے شوې خوشحالۍ نه په جامو کښې نۀ ځائيږى، او غريبانان به د بنى اِسرائيل د مقدس ذات خوشحالى کوى.

²⁰ظالمان به باقې پاتې نۀ شى، مغروره به ختم شى او څوک چې د بدو منصُوبه جوړوى هغوئ به قتل کړے شى.

²¹خُدائ پاک به هغه خلق تباه کړى چې څوک د دروغو ګواهى کوى، هغه خلق چې څوک چې قاضيان دوکه کوى چې غلطه فېصله وکړى هغه خلق چې څوک دروغ وائى د دې دپاره چې بې ګناه خلقو ته اِنصاف مِلاو نۀ شى.

²²نو ځکه مالِک خُدائ د يعقوب د اولاد خُدائ پاک، چا چې اِبراهيم د مصيبت نه خلاص کړو، داسې وائى، ”زما د خلقو به نوره بې‌عزتى نۀ کېږى او د هغوئ رنګونه به د شرم په وجه نور زېړ نۀ وى.

²³کله چې تاسو هغه بچى ووينئ چې زۀ تاسو له درکوم، نو تاسو ته به بيا پته ولګى چې زۀ د بنى اِسرائيلو مقدس ذات يم. تاسو به زما درناوښت کوئ او د يعقوب د خُدائ پاک رُعب به منئ.

²⁴بدعمله خلق به پوهه حاصله کړى او هغه خلق چې کوم هر وخت فريادونه کوى نو هغوئ به اصُول ومنى.“