Read Pashto (Nangahari) — د پښتو مقدس کتاب يشعياه 3 Bible Online

يشعياه 3 - Pashto (Nangahari) — د پښتو مقدس کتاب bible

يشعياه 3

¹مالِک خُدائ، رب‌الافواج به د يروشلم او يهوداه نه هغه هر څۀ لرې کړى چې په هغې پورې د خلقو ژوند تړلے دے. هغه به د هغوئ نه خوراک او د څښلو اوبۀ واخلى،

²د هغوئ نه به باتُوران او فوجيان، قاضيان او پېغمبران، فالګران او مشران،

³فوجى افسران، معتبر کسان، مشيران، ماهر کاريګران او جادوګران واخلى.

⁴زۀ به هلکان د هغوئ مشران جوړ کړم، او ماشومان به په هغوئ حکومت کوى.

⁵خلق به يو بل سره زياتے کوى. هر يو سړے به په بل سړى او هر يو ګاونډې به په بل ګاونډى رُعب اچوى. ځوانان به د خپلو مشرانو بې‌عزتى کوى او بدکرداره خلق به د عزتمندو بې‌عزتى کوى.

⁶په هغه وخت کښې به يو کس خپل ورور ته ووائى، ”تر اوسه پورې تا سره څادر شته نو په دې وجه راشه او زمونږ مشر جوړ شه! او د کنډراتو د دې ډيرى ذمه وارى اوچته کړه.“

⁷خو هغه به ورته په جواب کښې وائى، ”نه، زۀ ستاسو علاج نۀ شم کولے. نۀ زما سره خوراک شته او نۀ زما څادر شته. ما د عوامو مشر مۀ جوړوئ!“

⁸بې شکه چې يروشلم په لړزان دے! او په يهوداه زوال راغلے دے! هغوئ چې هر څۀ وائى او څۀ عمل کوى هغه د مالِک خُدائ خِلاف دے، هغوئ په جار بار باندې د مالِک خُدائ خلاف بغاوت کوى.

⁹د هغوئ مخونو نه د هغئ ملامتيا څرګنده ده. هغوئ د سدوم د خلقو په شان په جار بار ګناه کړې ده. په هغوئ افسوس! هغوئ په خپله تباهى په ځان باندې راوستلې ده.

¹⁰صادِقانو له خوشخبرى ورکړه چې هغوئ بختور دى، ځکه چې هغوئ به د خپلو اعمالو د ښې ميوې نه خوند واخلى.

¹¹خو بدعمله خلق تباه دى، هغوئ چې د نورو خلقو سره څۀ سلوک کړے وى نو هم هغه شان عمل به د هغوئ سره هم وشى.

¹²ځوانان زما د خلقو سره زياتے کوى، او ښځې په هغوئ باندې حکومت کوى. اے زما خلقو، خپلو مشرانو تاسو په غلطه لار باندې روان کړى يئ، او هغوئ ستاسو لارې ستاسو نه ګډې وډې کړى دى.

¹³مالِک خُدائ په خپل عدالت کښې تيار دے، او د خلقو د عدالت دپاره ولاړ دے.

¹⁴مالِک خُدائ د خپلو خلقو آفسران او مشران راولى چې د هغوئ عدالت وکړى. د هغوئ خِلاف د مالِک خُدائ دا اعتراض دے: ”تاسو زما د انګورو باغ تباه کړے دے او د غريبانانو نه لوټ کړے شوے مال ستاسو په کورونو کښې دے.

¹⁵تاسو دا حق نۀ لرئ چې زما خلقو له رګړه ورکړئ او د غريبانانو پوزې زمکې پورې راکاږئ. ما مالِک خُدائ، رب‌الافواج دا وئيلى دى.“

¹⁶مالِک خُدائ فرمائى، ”ګورئ، د يروشلم ښځې څومره مغروره دى! هغوئ هسکه غاړه نيولې وى او روانې وى. هغوئ همېشه نخرې کوى. هغوئ د نازُونو او نخرو قدمونه اخلى او پانزېبونه شړنګوى.

¹⁷زۀ به د هغوئ په سرونو باندې دانې راوخيژوم او ګنجۍ به يې کړم.“

¹⁸داسې ورځ راروانه ده چې مالِک خُدائ به د يروشلم د ښځو نه هغه هر څۀ واخلى په څۀ چې هغوئ ځانونه ښائسته کوى، پانزيبونه، هارونه، د سپوږمئ په شان کالې،

¹⁹والئ، بنګړى، نقابونه،

²⁰لوپټې، ګونګړوګان، کمربندې، د عطرو بوتلې، تعويزونه،

²¹ګوتمې، نتکۍ،

²²ښائسته جامې، چُوغې، شالونه، پرسونه،

²³شيشې، د لټې جامې، پړُونى او بُرقعې.

²⁴د عطرو د خوشبو په ځائ به د هغوئ نه بد بوئ خېژى، د کمربند په ځائ به هغوئ د ځان نه پړى تاو کړى وى، د ښائسته ظُلفو لرلو په ځائ به هغوئ ګنجۍ شى، د قيمتى جامو په ځائ به هغوئ د ټاټ جامې اغوستې وى. د هغوئ حُسن به په شرم بدل شى!

²⁵د ښار سړى به په تُوره وژلے شى، ستاسو تکړه سړى او سپاهيان به په جنګ کښې مړۀ شى.

²⁶د ښار دروازې به ژړا او ماتم کوى او ښار به په خپله د هغه ښځې په شان وى چې يواځې پاتې شى او په زمکه کښينى.