Read Pashto (Nangahari) — د پښتو مقدس کتاب يشعياه 31 Bible Online

يشعياه 31 - Pashto (Nangahari) — د پښتو مقدس کتاب bible

يشعياه 31

¹کوم خلق چې د مدد غوښتلو دپاره مِصر ته ځى نو په هغوئ باندې افسوس! ځکه چې هغوئ د مِصر په لوئ فوجى طاقت، اسونو، جنګى ګاډو او فوجيانو باندې بهروسه کوى. خو هغوئ په مالِک خُدائ باندې يقين نۀ کوى، کوم چې د بنى اِسرائيلو مقدس ذات دے او نۀ ترې نه مدد غواړى.

²خو خُدائ پاک هم هوښيار دے! هغه په تاسو آفت راولى. هغه خپلې خبرې سر ته رسوى چې بدعمله او هغه خلقو له سزا ورکړى چې څوک د دې بدعمله خلقو حِفاظت کوى.

³مِصريان خو څۀ خُدايان نۀ دى، هغوئ خو بنى آدم دى. د هغوئ اسونه خو څۀ آسمانى مخلوق نۀ دے ځکه چې دا اسونه د غوښې نه جوړ دى. کله چې مالِک خُدائ خپل لاس اُوږد کړى، نو څوک چې د چا مدد کوى نو هغه به راپرېوزى او د چا چې مدد کېږى نو هغه به هم راپرېوزى او دا دواړه به تباه شى.

⁴مالِک خُدائ ما ته ووئيل، ”که د شپانو ډلې هر څومره چغې ووهى يا هر څومره آوازونه وکړى، خو چې يو ازمرى چې کوم ځناور وژلے وى نو هغوئ به يې ترې نه ونۀ شړى، نو هم دغه شان به مالِک خُدائ رب‌الافواج د صِيون په غر باندې راکوز شى او جګړه به کوى.

⁵لکه څنګه چې يو مارغۀ د خپلو بچو د بچ کولو دپاره په خپله جاله باندې الوځى رالوځى، نو داسې به زۀ، مالِک خُدائ، رب‌الافواج د يروشلم دپاسه تېر شم د دې د بچ کولو دپاره او د دې حِفاظت به کوم.“

⁶مالِک خُدائ ووئيل، ”اے بنى اِسرائيلو، تاسو زما خِلاف سرکشى کړې ده. خو اوس، تاسو ما ته راوګرځېږئ!

⁷يو داسې ورځ راروانه ده چې تاسو ټول به د سرو زرو او سپينو زرو نه جوړ شوى بُتان ورغورزوئ کوم چې تاسو په خپلو ګناهګارو لاسونو جوړ کړى دى.

⁸اسوريان به په تُوره تباه شى خو دا تُوره به د انسان نۀ وى. د خُدائ پاک تُوره به هغوئ ووهى او هغوئ به وارخطا شى او تښتى به. د اسوريانو ځوانانو نه به په زور کار اخستلے شى.

⁹د يرې د وجې به هغوئ خپله قلعه پرېږدى، او د هغوئ آفسران به د مالِک خُدائ د جنګى جنډې نه ويريږى.“ دا مالِک خُدائ وئيلى دى، د چا اور چې په صيون کښې بليږى، او د چا تنور چې په يروشلم ګرميږى.