Read Pashto (Nangahari) — د پښتو مقدس کتاب يشعياه 33 Bible Online

يشعياه 33 - Pashto (Nangahari) — د پښتو مقدس کتاب bible

يشعياه 33

¹په تاسو اسوريانو باندې افسوس، تاسو نور خو برباد کړل خو پخپله هيڅ کله برباد نۀ شوئ. په تاسو باندې افسوس چې تاسو نورو سره دوکه وکړه حالانکه تاسو سره دوکه نۀ ده شوې. خو ستاسو نمبر به هم راځى. کله چې تاسو تباهى وکړئ نو تاسو به هم تباه شئ. کله چې تاسو د دوکې کار سرته ورسوئ نو تاسو سره به هم دوکه وشى.

²اے مالِکه خُدايه، په مونږ باندې رحم وکړه، مونږ ستا په طمع يُو. هر سحر مونږ له طاقت راکوه! او د مصيبت په وخت کښې زمونږ خلاصونکے شه.

³ستا د تندر په شان آواز اوريدو سره قومونه زغلى، ستا پاڅيدو سره هغوئ خوارۀ وارۀ شى.

⁴ستا د لوټ مال دومره راجمع شى لکه چې ډير چينجى راجمع شوى وى، او خلق په مالِ غنيمت باندې لکه د قحطۍ د مولخانو ټوپونه وهى.

⁵زمونږ مالِک خُدائ څومره لوئ دے! هغه په عرش باندې استوګنه کوى. هغه به يروشلم د اِنصاف او صداقت نه ډک کړى،

⁶په هغه ورځ به هغه ستاسو مضبوط بنياد وى، هغه به تاسو له لوئ خلاصون، پوهه او حِکمت درکوى. د مالِک خُدائ يره به ستاسو خزانه وى.

⁷خو اوس تکړه خلق په لارو کوڅو کښې ژړاګانې کوى. کومو سفيرانو چې د آمن راوستلو کوشش کولو نو اوس هغوئ په چغو چغو ژاړى.

⁸هغه سړکُونه خوشې پاتې دى او هيڅ څوک هم ورباندې سفر نۀ کوى. معاهدې ماتې شوې دى او په لوظُونو باندې عمل نۀ دے شوے. نور د يو کس عزت هم نۀ کېږى.

⁹مُلک خوشے او وران وېجاړ پروت دے. د لبنان ځنګلونه اوچ شوى دى او د شارون آباده وادى د صحرا په شان ده او د بسن او د کرمل د غرۀ د ونو نه پاڼې غورزېږى.

¹⁰نو مالِک خُدائ وائى، ”اوس به زۀ عملى کار کوم. زۀ به تاسو ته وښايم چې زۀ څومره طاقتور يم.

¹¹تاسو اُميد سره يئ خو ستاسو په خيټه کښې اوچه ګيا ده او د پېدايښت په وخت به درنه صرف بوس پېدا کيږى. چې کله تاسو پوکے وهئ نو ستاسو ساه نه به اور جوړ شى او تاسو به ايرې ايرې کړى.

¹²قومونه به په مکمل طور داسې وسوزى، لکه د ازغو د هغه بوټو په شان چې کټ کړے شى او اور ته وغورزولے شى.

¹³اے هغه د لرې علاقو خلقو هغې ته غوږ کيږدئ څۀ چې ما کړى دى، او اے نزدې اوسيدونکو زما طاقت ومنئ.“

¹⁴د صِيون ګناهګار خلق د يرې نه رېږدى. بې دينه خلق رپيږى او وائى، ”د خُدائ پاک تباه کونکې اور په وړاندې څوک ژوندى پاتې کيدے شى؟ زمونږ د خلقو نه به څوک په داسې ابدى اور کښې ژوندى پاتې شى؟“

¹⁵خو هغه کس به ژوندے پاتې شى چې صداقت سره ژوند تيروى او رښتينے وى، غير قانونې منافع او رشوت نۀ اخلى، چې د قتل منصُوبې نۀ جوړوى او د غلطو کارونو نه ځان ساتى.

¹⁶نو بيا به دا خلق په اوچتو ځايونو باندې اوسيږى، هغوئ به دومره محفوظ وى لکه څومره چې په غرونو باندې پَخو قلعو کښې محفوظ وى. هغوئ ته به روټۍ ملاوېږى او د اوبو به هيڅ کمے نۀ راځى.

¹⁷تاسو به وګورئ چې بادشاه به د شان او شوکت سره په يو داسې مُلک باندې حکومت کوى چې تر لرې لرې پورې خور وى.

¹⁸بيا به تاسو د يرې دا تير وخت راياد کړئ او خپل ځان سره به ووايئ، ”د دشمن هغه لوئې آفسران چرته دى؟ محصُول اخستونکى چرته غيب شول؟ هغه افسر چرته دے چې د برجونو حساب کِتاب به يې کولو؟“

¹⁹نو تاسو به نور د پردى مُلک هغه ظالِمان ونۀ وينئ چې هغوئ داسې سخته ژبه وائى چې په هغې باندې تاسو نۀ پوهېږئ.

²⁰صِيون ته وګورئ، دا هغه ښار دے چرته چې مونږ مذهبى اخترونه کوُو. يروشلم ته وګورئ، دا به د اوسېدو دپاره څومره محفوظ ځائ وى! دا به يو داسې خيمه وى چې هيڅ کله به نۀ شى اخوا کولے، د دې موږى به کله هم نۀ راويستلے کيږى، او د دې پړى به هيڅ کله نۀ شلېږى.

²¹هلته به مالِک خُدائ زمونږ لوئ بادشاه وى. هغه به لکه د حفاظت د لوئ سمندر په شان وى چې يو دشمن به هم ترينه نۀ شى اوړيدے او نۀ به پرې د دشمن سمندرى جهازُونه ګرځيدے شى.

²²مالِک خُدائ به په خپله زمونږ قاضى، زمونږ حُکمران، او زمونږ بادشاه وى، هغه به زمونږ خيال ساتى او مونږ به بچ کوى.

²³د سمندرى جهاز پړى ډيله دى، او د بادبان ستن يې خوَزى او بادبان يې خور شوے نۀ دے. مونږ به د خپلو دشمنانو ټول د لوټ مال دولت تقسيم کړوُ او دا به دومره زيات وى چې ګوډ ته به هم په کښې خپله برخه مِلاو شى.

²⁴د صيون يو کس به هم بيا نۀ وائى چې، ”مونږ بيمار يُو،“ او مالِک خُدائ به د هغوئ ګناهونه معاف کړى.