Read Pashto (Nangahari) — د پښتو مقدس کتاب يشعياه 35 Bible Online

يشعياه 35 - Pashto (Nangahari) — د پښتو مقدس کتاب bible

يشعياه 35

¹صحرا او اوچه زمکه به خوشحالى وکړى، او په بيابان کښې به ګلونه غوټۍ شى.

²صحرا به سندرې وائى او د خوشحالۍ چغې به وهى، دا صحرا به د لبنان د غرونو په شان شنه وى او د کرمل غر په شان او شوکت واله او د شارون پټو په شان به زرخېزه وى. نو هر يو کس به د مالِک خُدائ شان او شوکت ووينى، او زمونږ د خُدائ پاک لوئى او عظمت به ووينى.

³کوم لاسونه چې ستړى شوى دى نو هغې له طاقت ورکړه او هغه ګوډو له طاقت ورکړه چې د کمزورۍ په وجه لړزېږى.

⁴څوک چې بې‌حوصلې شوى دى نو هغوئ ته ووايه، ”تکړه شئ او مۀ يرېږئ! خُدائ پاک راروان دے چې تاسو بچ کړى، او ستاسو دشمنانو له سزا ورکړى.“

⁵نو د ړندو به سترګې وغړېږى، او د کڼو به غوږونه اورېدل شروع کړى.

⁶ګوډ به د هوسۍ په شان ټوپونه وهى، او ګونګيان به د خوشحالۍ سندرې وائى. په صحرا کښې به چشمې راوځى او په بيابان کښې به د اوبو نِهرونه بهېږى،

⁷د بلېدونکې شګې نه به تالاب جوړ شى، او اوچه زمکه به د چينو نه ډکه شى. چرته چې ګيدړان اوسېدل، نو هلته به د نمژنې زمکې واښۀ او لوښې راوشى.

⁸هلته به يو لوئ سړک وى، چې نوم به يې ”د پاکوالى لار“ وى. ناپاک خلق به په دې باندې سفر نۀ کوى، ځکه چې دا لار صرف هغه خلقو دپاره محصوص شوى ده کوم چې په نېغه لار ځى، او کم عقل خلق به په دې لار نۀ شى تلے.

⁹هلته به زمريان نۀ وى، بد ځناور به په هغه لار باندې نۀ تېرېږى او نۀ به هلته پاتې کيږى. خو مالِک خُدائ چې څوک بچ کړى وى نو هغوئ به په هغه لار باندې ځى.

¹⁰هغوئ چې د چا فديه مالِک خُدائ ورکړې ده هغوئ به واپس راشى سندرې به وائى ځنګه چې يروشلم ته داخل شى، او د هغوئ زړونه به هميشه د خوشحالۍ نه ډک وى، او هغوئ به دومره زيات خوشحاله وى چې غم او پرېشانۍ به مخکښې مخکښې وتښتى.