Read Pashto (Nangahari) — د پښتو مقدس کتاب يشعياه 39 Bible Online

يشعياه 39 - Pashto (Nangahari) — د پښتو مقدس کتاب bible

يشعياه 39

¹تقريباً هم په هغه وخت د بابل بادشاه د بله دان زوئ مرودک بله دان خبر شو چې حزقياه بادشاه بيمار وو او اوس روغ شوے دے، نو مرودک بله دان ورله يو خط او يوه تُحفه ولېږله.

²حزقياه پېغام وړُونکو ته په خېر راغلے ووئيل او هغوئ ته يې خپل سرۀ زر، سپين زر، خپلې مصالحې او قيمتى تېل او ټول فوجى سامان او اسلحه وښودل. د هغۀ د ګودام په کوټو کښې يا د هغۀ د بادشاهۍ په بل ځائ کښې هم داسې څۀ پاتې نۀ شول چې هغۀ ورته ښودلى نۀ وُو.

³بيا يشعياه پېغمبر حزقياه بادشاه له لاړو او تپوس يې ترې نه وکړو چې، ”دا سړى د کوم ځائ نه راغلى دى او هغوئ تا ته څۀ ووئيل؟“ حزقياه ورته ووئيل، ”هغوئ د يو لرې مُلک، بابل نه راغلى دى.“

⁴هغۀ ورته ووئيل، ”هغوئ په محل کښې څۀ وليدل؟“ حزقياه ورته ووئيل چې، ”هغوئ هر څۀ وليدل. د ګودام په کوټو کښې داسې څۀ نشته چې ما ورته ښودلى نۀ وى.“

⁵بيا يشعياه بادشاه ته ووئيل، ”مالِک خُدائ رب‌الافواج داسې وائى:

⁶يو داسې وخت راروان دے چې ستا په محل کښې هر يو څيز، چې ستا پلار نيکۀ تر ننه پورې جمع کړى دى، نو هغه به بابل ته يوړے شى. هيڅ به هم پاتې نۀ شى.

⁷ستا د خپل اولاد نه به څۀ بوتلے شى او هغوئ به د دې دپاره هيجړګان کړے شى چې د بابل بادشاه په محل کښې خِدمت کوى.“

⁸نو حزقياه بادشاه د دې په مطلب پوهه شو چې د هغۀ په ټول ژوند کښې به آمن او سلامتيا وى، نو هغۀ ورته ووئيل، ”تا چې ما له د مالِک خُدائ نه کوم پېغام راوړے دے هغه ښۀ دے.“