Read Pashto (Nangahari) — د پښتو مقدس کتاب يشعياه 43 Bible Online

يشعياه 43 - Pashto (Nangahari) — د پښتو مقدس کتاب bible

يشعياه 43

¹اے بنى اِسرائيلو، هغه مالِک خُدائ چا چې تاسو پېدا کړى يئ هغه وائى چې، ”يرېږئ مه، ځکه چې ما تاسو په بيعه اخستى يئ. ما تاسو ته په نوم آواز کړے دے، تاسو زما يئ.

²کله چې تاسو د سمندر په ژورو اوبو کښې روان يئ، نو زۀ به ستاسو مل يم، کله چې تاسو د سمندرونو نه تېريږئ نو ډوبيږئ به نه. کله چې تاسو په اور کښې تېرېږئ، نو تاسو به نۀ سوزئ، او د اور شغلې به تاسو له نقصان نۀ درکوى.

³زۀ مالِک خُدائ ستاسو خُدائ پاک يم، زۀ د بنى اِسرائيلو هغه مقدس ذات يم، او ستاسو خلاصونکے يم. ستاسو د آزادولو دپاره زۀ مِصر ورکوم، ستا په ځائ زۀ ايتهوپيا او سِيبا ورکوم.

⁴زما په نظر کښې تاسو قيمتى او عزتمند يئ، او تاسو په ما ګران يئ. نو په دې وجه به زۀ ستاسو په ځائ خلق ورکړم او ستاسو د ژوند په بدله کښې به زۀ قومونه ورکړم.

⁵يرېږئ مۀ، زۀ ستاسو مل يم! زۀ به تاسو او ستاسو خلق د نَمرخاتۀ طرف نه او د نمرپرېواتۀ طرف نه راغونډ کړم.

⁶زۀ به شمال ته ووايم چې هغوئ پرېږده چې لاړ شى او جنوب ته به ووايم چې هغوئ مۀ ايساروه. زما زامن د لرې مُلکونو نه واپس راوله، زما لوڼه د زمکې د هر سر نه واپس راوله.

⁷هغوئ ټول چې زما خپل خلق دى، څوک چې ما د دې دپاره پېدا کړى دى چې زما د جلال سبب جوړ شى.“

⁸هغه خلق راولئ د چا چې سترګې شته، خو هغوئ ړاندۀ دى، د چا چې غوږونه شته، خو هغوئ کاڼۀ دى!

⁹قومونه دې راغونډ شى. د هغوئ د معبودانو نه کوم يو د راتلونکى وخت پېشګوئې ورکولے شى؟ چې څۀ اوس کېږى نو کوم يو د دې په باره کښې مخکښې وئيلى وُو؟ هغه معبودان دې د دې ګواهان راولى چې دا ثابت شى چې هغوئ په حقه دى، او چې ګواهى ورکړى چې د هغوئ خبرې رښتيا دى.

¹⁰مالِک خُدائ ووئيل، ”اے بنى اِسرائيلو، تاسو زما ګواهان يئ، زما خِدمت کوُونکى يئ او ما غوره کړى يئ چې تاسو ما وپېژنئ او په ما به ايمان ولرئ او پته درته ولګى چې صرف زۀ خُدائ پاک يم. زما نه بغېر بل يو خُدائ هم نشته، نۀ د دې نه مخکښې وو او نۀ به د دې نه وروستو وى.

¹¹زۀ، صرف زۀ مالِک خُدائ يم، او زما نه بغير بل څوک خلاصونکے نشته.

¹²هم ما اعلان وکړو او تاسو ته مې خلاصون درکړو. او ستاسو په مينځ کښې يو معبود هم داسې څۀ نۀ دى کړى، څۀ چې ما کړى دى.“ مالِک خُدائ وائى، ”تاسو زما ګواهان يئ چې زۀ خُدائ پاک يم.

¹³زۀ خُدائ پاک يم او د همېشه دپاره به يم. زما د طاقت نه هيڅ څوک هم نۀ شى بچ کېدلے، زۀ چې کوم کار کوم نو هغه څوک ايسارولے شى؟“

¹⁴د بنى اِسرائيلو مقدس ذات، هغه مالِک خُدائ چا چې تاسو بچ کړئ هغه وائى، ”ستاسو د بچ کولو دپاره، زۀ به د بابل خِلاف يو لښکر درولېږم، زۀ به د ښار دروازې راوغورزوم، او د دې د خلقو د خوشحالۍ چغې به په ژړا بدلې شى.

¹⁵زۀ مالِک خُدائ، ستاسو مقدس خُدائ پاک يم. زۀ د بنى اِسرائيلو خالق ستاسو بادشاه يم.“

¹⁶مالِک خُدائ وايې، ”ما په سمندر کښې يوه لار جوړه کړه، او د زورورو اوبو په مينځ کښې مې يوه لار جوړه کړه.“

¹⁷هغۀ يو طاقتور لښکر د تباهۍ طرف ته بوتلو، يو داسې لښکر چې جنګى ګاډۍ او اسونه يې لرل. هغوئ پرېوتل او بيا راپانۀ څېدل، او د ډيوې د لمبې په شان ختم شول!

¹⁸”د تېر شوى وخت په واقعاتو پورې مۀ نښلئ او چې څۀ وړاندې شوى وى نو د هغې خيال د زړۀ نۀ وباسئ.

¹⁹زۀ چې کوم نوى کارونه کوم نو هغې ته ګورئ. هغه اوس شروع کيدو والا دى، تاسو يې نۀ وينئ څۀ؟ زۀ به په بيابان کښې يوه لار جوړه کړم او هلته به د اوبو نِهرونه جوړ کړم.

²⁰ځنګلى ځناور ګيدړان او شتر مرغ به زما درناوے کوى، ځکه چې زۀ به په بيابان کښې اوبۀ ورکوم او په صحرا کښې به سيندونه روان کړم د دې دپاره چې خپلو خلقو له اوبۀ ورکړم.

²¹دا هغه خلق دى څوک چې ما د خپل ځان دپاره پېدا کړى دى، چې هغوئ زما ثناء صِفت وکړى!“

²²مالِک خُدائ وائى، ”اے بنى اِسرائيلو، ستاسو زړۀ زما نه موړ شوے دے، او تاسو زما عِبادت ونۀ کړو.

²³تاسو ما له د ګډو خپلې سوزېدونکې نذرانې رانۀ وړلې، تاسو د قربانو سره زما درناوے ونۀ کړو. په تاسو مې بوج وانۀ چولو چې نذرانې مې درنه غوښتے وے او تنګ مې نۀ کړئ چې خوشبودارې مصالحې مې درنه غوښتے وے.

²⁴تاسو زما دپاره خوشبودارې مصالحې وانۀ خستلې او نۀ مو د خپلو ځناورو د وازګې سره خوشحاله کړم. خو تاسو په ما باندې ستاسو د ګناهونو بوج کېښودو، تاسو چې کوم بد عمل کړے دے د هغې په وجه مو تنګ کړے يم.

²⁵خو زۀ، او زۀ د خپل خاطره ستاسو جرمونو باندې پرده اچوم او ستاسو ګناهُونه د خپل ذهن نه اوباسم.

²⁶راځئ چې عدالت ته لاړ شو، خپل اعتراض بيان کړئ! خپله خبره پېش کړئ چې ثابته شى چې تاسو په حقه يئ!

²⁷ستاسو مخکښينو پلار نيکۀ ګناه وکړه، ستاسو مشرانو زما خِلاف بغاوت وکړو،

²⁸نو په دې وجه به زۀ د مقدس ځائ مشران رسوا کړم او زۀ به بنى اِسرائيليان مکمل تباهۍ او شرم دپاره مخصوص کړم.“