Read Pashto (Nangahari) — د پښتو مقدس کتاب يشعياه 47 Bible Online

يشعياه 47 - Pashto (Nangahari) — د پښتو مقدس کتاب bible

يشعياه 47

¹اے د پيغلې په شان بابله، د خپل تخت نه راکُوز شه، او په زمکه باندې په خاورو کښې کښېنه. ځکه چې ستا په تخت باندې د ناستې وخت ختم دے. اے بابله تۀ به بيا د شهزادګئ په شان نرم او نازک نۀ يې.

²د ژرندې کاڼے واخله او اوړۀ مېده کړه! نقاب لرې کړه! خپلې ښائسته جامې وباسه! پېنڅې اُوچتې کړه چې د نِهرونو نه پورې وځى!

³خلق به تا وګورى چې بربنډ يې، هغوئ به ستا شرمګاه وګورى. زۀ به بدله واخلمه او هيڅ څوک به نۀ پريږدم.

⁴د بنى اِسرائيلو مقدس ذات مونږ په بيعه آخستې يُو، د هغۀ نوم مالِک خُدائ رب‌الافواج دے.

⁵اے د بابليانو لورې، په تيارۀ کښې خاموش کښېنه، نور به تا ته څوک د قومونو مَلِکه نۀ وائى!

⁶زۀ خپلو خلقو ته غصه وم، ما هغوئ له داسې سزا ورکړه چې تا ته مې حواله کړل. او تا په هغوئ باندې هيڅ رحم ونۀ کړو، او په بوډاګانو باندې دې هم ډير دروند بوج کيښودو.

⁷تا وئيل، ”زۀ به همېشه مَلِکه يم!“ او هيڅ کله دې فکر نۀ دے کړے او نۀ دې د دې په انجام باندې غور وکړو.

⁸نو اوس دا خبره واوره، اے د عېش سره مينه لرونکې، تۀ خپل ځان محفوظ ګڼې او وايې، ”هم زۀ يم. او زما نه بغير بل څوک نشته. زۀ به نۀ کله کُنډه شم او نۀ بې اولاده.“

⁹خو په يوه لحظه او هم په يوه ورځ کښې به دا دواړه کارونه درسره وشى. تۀ چې هر څومره د جادو نه کار واخلې، خو ستا خاوند او بچى به ختم شى.

¹⁰تا خپل ځان په بدعملۍ کښې محفوظ وګڼلو، ستا خيال دا وو چې هيڅ څوک دې نۀ وينى. خپل حِکمت او پوهې تۀ بې لارې کړې، او تا د خپل ځان سره ووئيل چې، ”هم زۀ يم. او زما نه بغير بل څوک نشته.“

¹¹آفت به په تا باندې راشى، او ستا يو جادو به هم دا رايسار نۀ کړى. تباهى به په تا باندې راشى او هيڅ منخته به دا بندولے نۀ شى. وبا به په تا باندې ناڅاپه راشى، او تۀ به د هغې دپاره تياره نۀ يې.

¹²خپل جادو او کوډې ځان سره وساته، تا د وړُوکوالى نه دا استعمال کړى دى. کېدے شى چې دا ستا دپاره مدد ګار ثابت شى، او ستا نه څوک ويريږى.

¹³تا له چې کومې مشورې درکړے کېږى نو د هغې نه تۀ ستړے يې. ستا نجوميان چرته دى، چې ستورو ته ګورى او مياشت په مياشت پېشګويانې کوى هغوئ دې راشى او څۀ چې کېدونکى دى تا دې د هغې نه بچ کړى.

¹⁴هغوئ په اور کښې د سوزيدونکې بوسو په شان دى چې خپل ځان د دې د لمبو نه نۀ شى بچ کولے. دا به د کوئلې اور نۀ وى چې انسان ورته کښينى او ځان ګرم کړى.

¹⁵هغوئ به تا مايوسه کړى، چا سره چې تۀ د ځوانۍ نه په وفادارۍ چليدلے يې. هر يو به درنه په خپله مخه لاړ شى، او داسې به هيڅ څوک پاتې نۀ وى چې تاسو بچ کړى.