Read Pashto (Nangahari) — د پښتو مقدس کتاب يشعياه 48 Bible Online

يشعياه 48 - Pashto (Nangahari) — د پښتو مقدس کتاب bible

يشعياه 48

¹اے د يعقوب خاندانه، دا خبره واورئ، تاسو چې د يهوداه اولاد يئ او د بنى اِسرائيلو په نامه ياديږئ، متوجو شئ! تاسو چې د مالِک خُدائ په نوم باندې قسم کوئ او وايئ چې د بنى اِسرائيلو د خُدائ پاک عِبادت کوئ، غور وکړئ! اګر چې ستاسو خبره نۀ د اِنصاف ده او نۀ رښتيا ده.

²تاسو د مقدس ښار اوسېدونکى يئ او وايئ چې تاسو د بنى اِسرائيلو په خُدائ پاک باندې بهروسه کوئ، د چا نوم چې مالِک خُدائ رب‌الافواج دے، هغه وائى،

³”ما ډېر پخوا پېشګوئې ورکړې وه چې څۀ به کېږى، او بيا مې ناڅاپه هم دغه شان وکړل. او زما ټولې پېشن ګويۍ رښتيا شوې.

⁴ما ته پته وه چې تاسو به څومره ضديان يئ، ستاسو د مرئ رګونه به د اوسپنې په شان کلک او ستاسو تندى به لکه د مټکور غوز په شان وى.

⁵نو ما ډېر پخوا ستاسو د راتلونکى وخت پېشګوئې وکړه، د حالاتو بيان مې د وړاندې نه وکړو، د دې دپاره چې تاسو دا دعوه ونۀ کړئ چې ستاسو بُتانو او تراشلے شوؤ مجسمو د دې حُکم کړے وو.

⁶ما چې د څۀ پېشګوئې ورکړې وه نو هغه هر څۀ شوى دى، خو تاسو د هغې منلو نه انکار وکړو. اوس به زۀ تاسو ته د نوو خبرو په باره کښې ووايم، دا هغه رازونه دى چې تاسو تر اوسه پورې نۀ دى اوريدلى.

⁷په تېره زمانه کښې داسې څۀ نۀ وو شوى، بلکه هم اوس اوس دا ستا په علم کښې راغلل. داسې ځکه وشول چې تاسو ونۀ شئ وئيلے، چې مونږ ته مخکښې نه د دې پته وه.

⁸ما ته پته وه چې تاسو ناقابل اعتماد يئ، ځکه چې تاسو د وړُوکوالى نه په باغيانو باندې مشهُور وئ. او هم دا وجه ده چې تاسو هيڅ کله د دې په حقله نۀ دى اوريدلى، او دا ځکه د دې يوه خبره هم ستاسو غوږونو ته نۀ ده رارسيدلې.

⁹زما د نوم د خاطره زۀ خپله غصه په قابو کښې ساتم، زما د ثناء صِفت د خاطره زۀ خپل ځان ستاسو د تباهۍ نه رايساروم.

¹⁰ما تاسو صفا سترا کړى يئ، خو داسې نه لکه چې سپين ذر صفا کيږى، بلکه ما تاسو صفا سترا کړى يئ، د مصيبت په بهټئ کښې مې آزمائيلى يئ.

¹¹زۀ چې څۀ کوم نو هغه زۀ د خپل خاطر په وجه کوم، زۀ نۀ غواړم چې زما د نوم بې‌عزتى وشى او نۀ به په خپل جلال کښې چا له برخه ورکړم دا به زما وى او صرف زما به وى.“

¹²”اے بنى اِسرائيلو، زما غوره کړے شوؤ، ما ته غوږ ونيسئ! صرف زۀ خُدائ پاک يم، زۀ اولين او آخرين يم!

¹³ما په خپل لاس باندې د زمکې بنيادونه لګولى دى او زما ښى لاس آسمانونه خوارۀ کړى دى. کله چې زۀ آواز ورکړم نو دوئ ټول يو ځائ حاضر شى.

¹⁴ټولو خلقو، راغونډ شئ او واورئ! په معبودانو کښې کوم يو د دې پېشګوئې ورکړې ده؟ ما چې کوم سړے خوښ کړے دے هغه به په بابل حمله وکړى، او د بابليانو خلاف به خپل زور استعمالوى.

¹⁵زۀ هغه څوک يم چې هغۀ ته مې آواز وکړو او راومې غوښتلو، د هغۀ مې لارښوونه وکړه او هغه به کاميابيږى.

¹⁶نو اوس ما له رانزدې شئ او چې زۀ څۀ وايم هغې ته غوږ ونيسئ. ما د شروع نه صفا خبره کړې ده، او ما همېشه خپله خبره رښتيا کړې ده.“ او اوس مالِک خُدائ تعالىٰ او د هغۀ روح زۀ رالېږلے يم.

¹⁷د بنى اِسرائيلو مقدس ذات، مالِک خُدائ ستاسو خلاصونکے وائى، ”زۀ مالِک خُدائ ستاسو خُدائ پاک يم، هغه ذات چې ستاسو د خپلې فائدې دپاره تاسو ته ښودنه کوى او هغه لار درته ښائى چې په کومه باندې درله تلل په کار دى.

¹⁸خو که صرف تاسو زما حُکمونو ته پام کړے وے! نو ستاسو امن به لکه د سيند په شان وو، او ستاسو صداقت به د سمندر د چپو په شان وو.

¹⁹ستاسو اولاد به د شګو په شان ډېر او بې شميره وے، او ما به هيڅ امکان نۀ وے پريښے چې د هغوئ نام و نشان زما د وړاندې نه ختم شى.“

²⁰د بابل نه ووځئ! او د بابليانو نه وتښتئ! د خوشحالۍ سره د دې خبر چغه ووهئ، او د دنيا تر ګټ ګټه پورې دا خبره مشهُوره کړئ چې، ”مالِک خُدائ خپل خِدمت کوُونکى بنى اِسرائيليان بچ کړى دى!“

²¹کله چې مالِک خُدائ خپل خلق په خُشکه صحرا کښې روان کړل، هغوئ د تندې په وجه د تکليف سره مخ نۀ شول. د هغوئ دپاره يې د ګټ نه اوبۀ راوويستلې، هغۀ ګټ په مينځ بېل کړو او اوبۀ ترې نه راوبهېدلې.

²²مالِک خُدائ وائى، ”د شريرانو دپاره سلامتى نشته.“