Read Pashto (Nangahari) — د پښتو مقدس کتاب يشعياه 52 Bible Online

يشعياه 52 - Pashto (Nangahari) — د پښتو مقدس کتاب bible

يشعياه 52

¹اے يروشليمه، پاڅه، ويښ شه! خپلې د طاقت جامې واغونده! اے مقدسې ښاريې، د شان او شوکت والا جامې واغونده! ناسنته او ناپاک خلق به هيڅ کله ستا په دروازو بيا درننه نۀ وځى.

²اے يروشليمه، د ځان نه خاورې وڅنډه او پاڅه او په تخت کښېنه! اے د صِيون قېد شوو خلقو، د غلامئ زنځيرونه د خپلو غاړو نه وشلوئ!

³مالِک خُدائ وائى، ”کله چې تاسو غلامان شوئ، نو ستاسو په سر پېسې نۀ وې ورکړے شوې، او چې کله تاسو آزادولے شئ نو ستاسو په سر به پېسې نۀ شى ورکولے.“

⁴مالِک خُدائ تعالىٰ وائى، ”ډېره موده وړاندې زما خلق مِصر ته د څۀ مودې دپاره لاړل، خو اوس اسوريان بغېر د څۀ وجې په هغوئ باندې ظلم زياتے کوى.“

⁵مالِک خُدائ وائى، ”او په بابل کښې هم هغه کار شوے دے: زما خلق قېديان دى او د هغوئ په سر هيڅ پېسې نۀ دى ورکړے شوې. څوک چې په هغوئ حکومت کوى نو هغوئ هر وخت زما د نوم سپکاوے کوى.

⁶نو داسې به زما خلقو ته زما د نوم پته وى، او داسې به هم په هغه ورځ هغوئ ته پته ولګى چې هم زۀ کلام کوم او زۀ حاضر يم.“

⁷د هغۀ قدمونه څومره ښُکلې دى چې په غرونو باندې روان دے او زيرے آوروى. ځکه چې هغه به د آمن و امان، پېغام او د خلاصون اعلان کوى، او صِيون ته به وائى، ”ستا خُدائ پاک بادشاه دے!“

⁸څوک چې د ښار حِفاظت کوى نو هغوئ د خوشحالۍ چغې وهى! هغوئ په خپلو سترګو باندې ګورى چې مالِک خُدائ صِيون ته واپس راروان دے،

⁹اے د يروشلم کنډرو، په يو ځائ د خوشحالۍ سندرې ووايئ! مالِک خُدائ به خپل ښار بچ کړى او خپلو خلقو له به تسلى ورکړى.

¹⁰مالِک خُدائ به د خپل مقدس طاقت نه کار واخلى، خُدائ پاک به خپل خلق بچ کړى، او ټول قومونه او ټوله دنيا به په خپلو سترګو دا وګورى.

¹¹ځئ، ځئ، د دغه ځائ نه ځئ! چې يو ناپاک څيز له هم لاس ورنۀ وړۍ، څوک چې د مالِک خُدائ د کور سامان وړى هغوئ خپل ځانونه پاک وساتئ او لاړ شئ.

¹²ضرورى نۀ ده چې تاسو په منډه لاړ شئ، او نۀ تاسو ته اچانک د تېښتې ضرورت شته، ولې چې مالِک خُدائ به ستاسو نه وړاندې ځى، د بنى اِسرائيلو خُدائ پاک به د وروستو نه ستاسو حِفاظت کوى.

¹³ګورئ، زما خِدمت کوُونکے به په خپل کار کښې کامياب شى، د هغۀ به ډېر زيات عزت کېږى.

¹⁴خو کله چې يې هغه وليدو نو ډېر خلق حيران شول، د هغۀ شکل صورت داسې خراب وو چې هغه د نورو انسانانو په شان نۀ ښکارېدو.

¹⁵اوس به ډېر قومونه هغۀ ته حېران شى، او د هغۀ په وړاندې به د بادشاهانو د خولې نه خبرې نۀ وځى. ځکه چې هغوئ به هغه څۀ وګورى چې د څۀ ورته وئيلے شوى نۀ وى، او هغوئ به په هغه څۀ پوهه شى د څۀ چې يې آوريدلې نۀ وى.