Read Pashto (Nangahari) — د پښتو مقدس کتاب يشعياه 53 Bible Online

يشعياه 53 - Pashto (Nangahari) — د پښتو مقدس کتاب bible

يشعياه 53

¹زمونږ په پېغام باندې چا يقين کړے دے؟ مالِک خُدائ خپل قوت په چا ظاهر کړے دے؟

²د مالِک خُدائ په وړاندې زما خِدمت کوُونکې داسې وده وکړى لکه څنګه چې يو نرم تيغ په زمکه باندې جرړې نيسى. هغۀ څۀ شان شوکت او حُسن نۀ لرلو چې د هغې په وجه مونږ ورباندې پام کړے وے. او نۀ په کښې څۀ داسې کشش وو چې مونږ يې متاثره کړى وے.

³خلقو هغۀ ته سپک وکتل او هغه يې رد کړو، هغه د درد او کړاو سره مخ شو. او خلقو به هغۀ ته دومره سپک کتل چې مخ به يې ترينه اړولو. مونږ د هغۀ هيڅ قدر نۀ کولو.

⁴خو بې شکه چې، هغۀ زمونږ بيمارئ او کمزورئ اوچتې کړې. خو بيا هم زمونږ دا خيال وو چې هغۀ له سزا ورکړے شوه، او دا چې خُدائ پاک هغه ووهلو او د هغۀ د ګناهونه سزا يې ورکړه.

⁵خو زمونږ د ګناه په وجه هغه زخمى شو، زمونږ د بغاوت په وجه هغه چخڼې کړے شو. چې کومه سزا ورکړے شوه نو د هغې په وجه مونږ ته شفا مِلاو شوه، هغۀ چې کوم وهل وخوړل نو د هغې په وجه مونږ روغ شوُو.

⁶مونږ ټول د ورکو ګډو په شان وُو، مونږ د خُدائ پاک د لارې نه اوړېدلى وُو. هر يو کس په خپله مخه باندې روان وو. خو بيا هم مالِک خُدائ زمونږ د ټولو ګناهونه په هغۀ باندې واچول.

⁷هغۀ باندې ظلم زياتے اوشو، خو هغۀ په خولهٔ باندې هيڅ هم ونۀ وئيل. لکه چې يو ګډُورے د حلالولو دپاره بوتلے شى، لکه چې يوه ګډه د وړۍ کلولو واله په مخکښې خاموش وى، نو هم هغسې هغۀ د خولې نه يوه خبره هم نۀ ويستله.

⁸هغه په دروغه باندې مجرم وګرزولے شو او بوتلے شو. او هيچا د دې پرواه ونۀ ساتله چې هغه بې اولاده مړ شو، او هغه د ژوندو د زمکې نه لرې کړے شو. خو هغه زما د خلقو د ګناه په وجه ووژلے شو.

⁹د هغوئ اراده وه چې د بدعمله خلقو سره يې ښخ کړى، خو هغه د مالداره سړى په قبر کښې کېښودلے شو، خو هغۀ هيڅ جرم هم نۀ وو کړے او نۀ يې څوک دوکه کړى وُو.

¹⁰خو دا د مالِک خُدائ رضا وه چې هغه ووهلے شى، او درد ورته مِلاو شى. کله چې د هغۀ ژوند د ګناه دپاره کفاره شى، د هغۀ به ډير اولاد وى. هغه به يو اُوږد عُمر تېر کړى، او د هغۀ په ذريعه به د مالِک خُدائ مقصد پوره شى.

¹¹کله چې هغه وګورى چې د هغۀ د مصيبت اوچتولو په وجه هغۀ څۀ حاصل کړى دى، نو هغه به مطمئن شى. زما صادق خِدمت کوُونکے به ډير خلق صادقان کړى، ځکه چې هغه به د هغوئ ګناه پورته کړى.

¹²نو زۀ به هغۀ له د عزت مقام ورکړم، او زۀ به هغۀ له د جنګ د لوټ مال ورکړم، ځکه چې هغه فاتح دے. هغۀ خپل ځان مرګ ته حواله کړو او په باغى خلقو کښې شمېر شو. د ډېرو خلقو ګناه يې واخستله او د بدعملو د ګناه معافى يې وغوښتله.