Read Pashto (Nangahari) — د پښتو مقدس کتاب يشعياه 54 Bible Online

يشعياه 54 - Pashto (Nangahari) — د پښتو مقدس کتاب bible

يشعياه 54

¹مالِک خُدائ وايې، ”اے شنډې ښځې د چا چې اولاد نشته! د خوشحالۍ نه چغې ووهه، د خوشحالۍ نه سندرې ووايه، ولې چې تا د ماشوم د راوړو درد نۀ دے تير کړے. ولې چې د شنډې ښځې بچى اوس د وادۀ شوې ښځې نه زيات دى.

²تاسو چې په کومه خېمه کښې اوسېږئ هغه لويه کړئ او پردې يې خوَرې کړئ، بچت مۀ کوئ، د خېمې پړى اُوږدۀ کړئ او موږى يې کلک کړئ!

³ځکه چې تاسو به خپل سرحدونه هر طرف ته خوارۀ کړئ، ستاسو اولاد به قومونه فتح کړى او چې کوم ښارونه خوشى دى نو هغه به دوباره آباد کړى.

⁴يرېږئ مه، تاسو به نور د شرم سره نۀ مخ کېږئ. شرميږئ مۀ، تاسو به نۀ بې‌عزته کيږئ. تۀ به خپل د ځوانۍ شرم هېر کړې او د کُنډيدو رسوائى به ستا د ذهن نه ختمه شى.

⁵ځکه چې ستاسو خالِق به ستاسو خاوند وى، د هغۀ نوم مالِک خُدائ رب‌الافواج دے. د بنى اِسرائيلو مقدس ذات ستاسو خلاصونکے دے، هغه د ټولې دنيا خُدائ پاک دے.

⁶مالِک خُدائ به تاسو بيا راوغواړى داسې لکه چې خاوند ښځه پرېښې وى او سخته پرېشانه وى. تاسو د داسې ښځې په شان يئ چې ځوانه وادۀ شوى وى او خاوند رد کړې وى. ستاسو خُدائ پاک داسې وائى،

⁷د يوې لحظې دپاره ما تاسو پرېښودلئ، خو اوس ډير لوئ رحم سره به تاسو بيا راجمع کړم.

⁸ما د غصې په تاو کښې د لږ ساعت دپاره ستاسو نه مخ واړولو، خو زۀ به د تل مينې سره تاسو باندې رحم کوم.“ ستاسو خلاصونکے مالِک خُدائ داسې فرمائى.

⁹”لکه څنګه چې د نوح په وخت کښې ما وعده کړې وه چې بيا به هيڅ کله په زمکه داسې سېلاب نۀ راځى. نو هغسې ما قسم کړے دے چې زۀ به بيا تاسو ته نۀ غصه کېږم، او نۀ به تاسو رټم.

¹⁰اګر که غرونه لرې کړے شى او غونډۍ غيبې شى، خو زما وفاداره مينه به ستاسو سره هيڅ کله نۀ ختمېږى، او زما د آمن تړون به هيڅ کله تاسو سره نۀ ختميږى.“ هغه مالِک خُدائ داسې وائى څوک چې په تاسو رحم کوى.

¹¹مالِک خُدائ وائى، ”اے يروشليمه، تا باندې سخت طوفان تير شو او هيچا هم تسلى در نۀ کړے شوه. زۀ به تا د قيمتى کاڼو نه بيا آباد کړم او ستا بنيادونه به د قيمتى کاڼو نه بيا جوړ کړم.

¹²ستا مينارې به زۀ د ځلېدونکو ياقوتو نه جوړې کړم، ستا دروازې به د پړقېدونکُو جواهراتو نه جوړې کړم، او ستا دېوالونه به د قيمتى کاڼو نه جوړ کړم.

¹³زۀ په خپله به ستاسو ټولو بچو ته ښودنه کوم، او هغوئ به خېر خېريت سره وى.

¹⁴ستا د بادشاهت بنياد به په اِنصاف باندې وى، د ظلم زياتى نه به په امان يې، نۀ به تۀ يريږې، او نۀ به يره تا ته نزدې راځى.

¹⁵که څوک په تاسو باندې حمله کوى نو دا به زما د طرف نه نۀ وى. نو هر څوک چې ستاسو خِلاف جنګ کوى هغه به شکست خورى.

¹⁶ما لوهار پېدا کړے دے، څوک چې هوا سره کوئله سره کوى او وسله جوړوى. د تباهۍ دپاره ما تباه کار هم پېدا کړى دى.

¹⁷داسې وسلحه به نۀ وى چې تاسو ته ضرر ورسوى، او څوک چې په تاسو الزام لګوى نو تاسو به د هغوئ خولې ټپې کړئ. د مالِک خُدائ خادمان به د دې فائدو نه خوند اخلى، زۀ به د هغوئ حق څرګند کړم.“ مالِک خُدائ داسې فرمائى.