Read Pashto (Nangahari) — د پښتو مقدس کتاب يشعياه 55 Bible Online

يشعياه 55 - Pashto (Nangahari) — د پښتو مقدس کتاب bible

يشعياه 55

¹مالِک خُدائ وائى، ”هر څوک چې تږى وى، راشئ اوبۀ وڅکئ! څوک چې مال دولت نۀ لرى، نو راشئ، واخلئ او وې خورئ! راشئ، د انګورو شراب او پئ واخلئ، دا مفت دى!

²چې په څۀ باندې تاسو نۀ مړېږئ نو په هغې باندې پېسې ولې خرچ کوئ؟ چې فائده نۀ درکوى نو په هغه خوراک پېسې ولې ورکوئ؟ غور سره ما ته غوږ شئ او ښۀ خوراک کوئ. تاسو به د ډېرو مزيدارو خوراکونو نه خوند واخلئ.

³اوس غوږ ونيسئ او ما له راشئ، نو تاسو به ژوندى اوسئ! زۀ به ستاسو سره يو نۀ ختمېدونکے تړون وکړم او زۀ به تاسو له هغه نۀ ختمېدونکې مينه درکړم چې ما يې د داؤد سره تړون کړے وو.

⁴ګوره، ما هغه د قومونو ګواه جوړ کړو، ما هغه د قومونو مشر او فوجى آفسر جوړ کړو.

⁵اوس به تاسو د بل مُلک هغه قومونه راوغواړئ، چې په يو وخت کښې هغوئ تاسو نۀ پېژندئ، خو اوس به هغوئ په منډه منډه تاسو له راشى. زۀ مالِک خُدائ ستاسو خُدائ پاک، د بنى اِسرائيلو مقدس ذات به دا هر څۀ وکړم، او تاسو له به عزت درکړم.

⁶د مالِک خُدائ لټون وکړئ کله چې هغه موندے شئ، هغۀ ته آواز وکړئ کله چې هغه نزدې دے.

⁷بدعمله خلق دې خپلې د ژوند طريقې بدلې کړى او شرپسند دې خپل خيالونه بدل کړى. او هغوئ دې مالِک خُدائ زمونږ خُدائ پاک ته راوګرځى، نو هغه رحم کوُونکے دے او کولاو زړۀ سره معاف کوى.“

⁸مالِک خُدائ وائى، ”زما خيالونه ستاسو د خيالونو په شان نۀ دى، او زما لارې ستاسو نه بدلې دى.

⁹لکه څنګه چې آسمانونه د زمکې نه اُوچت دى، نو هم دغه شان زما لارې او سوچونه هم ستاسو نه اُوچت دى.

¹⁰لکه څنګه چې باران او واوره د آسمان نه راوريږى او هسې واپس نۀ ځې بلکه زمکه اوبۀ کوى. دې سره فصلونه راشنۀ کېږى زميندار له تخم او اوږى له خوراک ورکوى.

¹¹زما کلام هم، هم دغسې دے. چې زما د خولې نه وځې نو خالى لاس به واپس نۀ راځى. دا به زما مرضى پوره کوى او په هغه هر څۀ کښې به کامياب وى د څۀ دپاره چې ما ليږلے وى.

¹²تاسو به خوشحالۍ سره وځئ، او سلامتئ سره به بوتلے شئ. غرونه او د غرونو غونډۍ به په تېز آواز سندرې وائى، او په پټى کښې ټولې ونې به د خوشحالۍ نه لاسونه پړقوى.

¹³چرته چې اوس د غنو بوټى دى نو هلته به د سبر ونې راوشى، او د ازغو په ځائ کښې به د نختر ونې راوشى. دې سره به د مالِک خُدائ نوم ته جلال ملاويږې، دا به د هغۀ د قدرت او د مينې يو نۀ ختميدونکې نښه وى.“