Read Pashto (Nangahari) — د پښتو مقدس کتاب يشعياه 58 Bible Online

يشعياه 58 - Pashto (Nangahari) — د پښتو مقدس کتاب bible

يشعياه 58

¹”په زوره چغې ووهئ، رو رو خبرې مۀ کوئ! د بيګل په شان په اوچت آواز سره زما خلقو بنى اِسرائيلو ته د هغوئ د ګناه او بغاوت په حقله ووايئ!

²هغوئ هره ورځ زما لټون کوى او زما لارې پيژندلو باندې خوشحاليږى. داسې لکه چې هغه يو ډير صادق قوم وى او د خپل خُدائ پاک حکمونه يې رد کړې نۀ وى. هغوئ زما نه د اِنصاف فيصلې غواړى، او داسې څرګندوى چې خُدائ پاک ته نزدې راتلو باندې خوشحاليږى.

³هغوئ وائى، ”کله چې مونږ روژې نيسو نو تۀ پرې ولې نۀ خوشحاليږې؟ مونږ ځانونه دومره عاجز کړو او تۀ هډو توجو نۀ کوې!“ ګورئ، حقيقت دا دے چې کله تاسو روژه نيولې وى نو هم په هغه وخت تاسو په خپلو فائدو پسې ګرځئ او د خپلو مزدورانو سره ظلم زياتے کوئ.

⁴د داسې روژې نۀ څۀ فائده چې تاسو پکښې جنګ جګړې کوئ؟ که تاسو داسې قسمه روژې ساتئ نو د دې توقع هم نۀ شئ کولے چې ستاسو آواز به آسمان ته ورسى.

⁵ولې زۀ داسې روژه خوښوم څۀ چې انسان دې پکښې يوې ورځې دپاره خپل ځان عاجز کړى؟ او د لوښې د پاڼې په شان خپل سرونه ټيټ کړې او د ټاټ په جامو کښې په ايرو باندې څملې؟ تاسو دې ته روژه وايئ؟ دا ورځ به مالِک خُدائ ته قبوله وى څۀ؟

⁶نه، زۀ چې څنګه روژه غواړم هغه داسې ده: د بې اِنصافۍ په زنځيرونو کښې راګير خلق آزاد کړئ، د خپلو ماتحتو بوج کم کړئ. مظلومان آزاد کړئ، هر جغ مات کړئ.

⁷اوږې خلق په خپل خوراک کښې شريک کړئ، او بې کوره غريبانانو له پناه ورکړئ. چا ته چې د جامو حاجت نو هغوئ له جامې ورکوئ او د خپلو خپلوانو سره د مدد کولو نه پټيږئ مۀ.

⁸نو بيا به تاسو لکه د سحر د نمر په شان ځلېږئ، او ستاسو زخمونه به زر زر جوړ شى. او ستاسو صداقت به ستاسو نه مخکښې روان وى، او د مالِک خُدائ جلال به د وروستو نه ستاسو حِفاظت کوى.

⁹نو بيا به تاسو آواز کوئ او مالِک خُدائ به جواب درکوى، تاسو به د مدد دپاره سوال کوئ او مالِک خُدائ به فرمائى، ”زۀ حاضر يم.“ که تاسو ظلم زياتے، بل ته ګوته نيول او د چُغلئ خبرې پرېږدئ،

¹⁰که تاسو اوږو خلقو له روټۍ ورکړه او د مظلومانو مدد مو وکړو، نو بيا به ستاسو رڼا په تيارۀ کښې وځليږى، او چې ستاسو نه ګېرچاپېره کومه تيارۀ وى نو هغه به د غرمې په رڼا بدله شى.

¹¹نو زۀ به همېشه ستاسو لارښوونه کوم او په اوچ بيابان کښې به هم ستاسو حاجتونه پوره کوم. او زۀ به ستاسو وجود مضبوط کړم. تاسو به د يو داسې باغ په شان يئ چې ډېرې تېرې اوبۀ لرى، د هغه چينې په شان چې هيڅ کله نۀ اوچېږى.

¹²او ستاسو هغه پخوانى کنډرات به دوباره آباد کړے شى. تاسو به تيرو نسلونو بُنيادونه بيا آباد کړئ. او بيا به تاسو ديوالونه دوباره جوړولو والا، او لارې کوڅې دوباره آبادولو والا ياديږئ.“

¹³”که تاسو د سبت ورځ يعنې زما په مقدسه ورځ باندې کاروبار نۀ کوئ، او دې ته د خوشحالۍ ورځ وايئ، دا د مالِک خُدائ مقدسه ورځ ګڼئ، د دې ادب کوئ او په دې ورځ خپل د روزانه کارونه نۀ کوئ او په خپلو فائدو پسې نۀ ګرځئ، او فالتُو خبرې نۀ کوئ،

¹⁴نو بيا به تاسو د مالِک خُدائ سره په تعلق باندې خوشحاله شئ. او زۀ به تاسو له لوئ عزت درکړم او په هغه ميراث به مو ماړۀ کړم د کوم لوظ چې ما ستاسو پلار نيکۀ يعقوب سره کړے دے. ما، مالِک خُدائ دا وئيلى دى.“