Read Pashto (Nangahari) — د پښتو مقدس کتاب يشعياه 6 Bible Online

يشعياه 6 - Pashto (Nangahari) — د پښتو مقدس کتاب bible

يشعياه 6

¹په کوم کال چې عُزياه بادشاه مړ شو، نو ما مالِک خُدائ وليدو چې په اوچت او د لويى مرتبې په تخت باندې ناست وو. او د هغۀ د چُوغې لمن سره د هغۀ کور ډک شو.

²د هغۀ نه ګېرچاپېره بلېدونکے مخلوق ولاړ وو او د هر يو شپږ شپږ وزر وو. دې هر يو خپل مخ په دوو وزرو باندې پټ کړے وو، په دوو وزرو باندې يې پښې پټې کړې وې او د دوو وزرو نه يې د الوتلو کار اخستلو.

³هغوئ يو بل ته نعرې وهلې: ”مقدس، مقدس! مالِک خُدائ رب‌الافواج مقدس دے! د هغۀ د جلال نه دنيا ډکه ده.“

⁴د هغوئ د آوازونو شور د خُدائ پاک د کور چوکاټونه ولړزول او د مالِک خُدائ کور د لوږى نه ډک شو.

⁵نو ما ووئيل، ”په ما افسوس! زۀ تباه شوم، ځکه چې زما شونډې په ګناه ککړې دى، او د کومو خلقو سره چې زۀ اوسيږم د هغوئ شونډې هم ګنده دى. خو بيا هم ما په خپلو سترګو هغه بادشاه ليدلے دے چې هغه مالِک خُدائ رب‌الافواج دے!“

⁶نو بيا د هغه بليدونکې مخلوق نه يو زما طرف ته راوالوتلو. هغۀ يوه بَله سکروټه راروانه کړى وه، هغۀ دا د قربان ګاه نه د يوې چمټې سره راخستى وه.

⁷هغۀ زما شونډو له بَله سکروټه وروړله او وې وئيل، ”دا سکروټه ستا د شونډو سره لګېدلې ده، نو په دې وجه ستا قصور ختم شو او ستا ګناهونه معاف شول.“

⁸بيا ما د مالِک خُدائ آواز واورېدو چې وې وئيل، ”زۀ څوک ولېږم؟ زمونږ د طرف نۀ به څوک ځى؟“ نو ما ورته په جواب کښې ووئيل، ”زۀ حاضر يم! ما ولېږه.“

⁹نو هغۀ ما ته وفرئيل چې، ”لاړ شه او دې قوم ته دا پېغام ورسوه: هر څومره که تاسو واورئ خو تاسو به پرې پوهه نۀ شئ، هر څومره که ورته ګورئ نو تاسو به پرې پوهيږئ نه.

¹⁰د هغوئ زړونه سخت کړه، د هغوئ غوږونه کاڼۀ کړه او د هغوئ سترګې ړندې کړه، داسې نۀ وى چې هغوئ په خپلو سترګو وګورى او په خپلو غوږُونو واورى او خپلو زړونو کښې پوهه شى او زما طرفته شفا دپاره راتاو شى.“

¹¹ما ترې نه تپوس وکړو، ”اے مالِکه خُدايه، دا به تر کومې پورې وى؟“ هغۀ راته ووئيل، ”دا به تر هغې پورې وى چې ښارونه يې تباه او خوشى شى او چې د کورونو نه يې خلق ختم شى او زمکه يې شاړه شى.

¹²تر هغې چې مالِک خُدائ هغوئ تر لرې لرې پورې وزغلوى او ټول مُلک يې خوشے پاتې شى.

¹³که په هغه مُلک کښې صرف لسمه حصه خلق هم پاتې وى، نو هغه به بيا وسوزولے شى. هغه به د څېړۍ د ونې په شان داسې کټ شې چې صرف مونډ يې باقې پاتې شى.“ دا مونډ به يو مقدس تخم وى.