Read Pashto (Nangahari) — د پښتو مقدس کتاب يشعياه 60 Bible Online

يشعياه 60 - Pashto (Nangahari) — د پښتو مقدس کتاب bible

يشعياه 60

¹پاڅه، وځليږه! ځکه چې ستا نور راغلے دے، او د مالِک خُدائ جلال په تا ځليدلے دے.

²ګورئ، داسې لکه چې په زمکه باندې تيارۀ خوَره وى او قومومونه تکې تورې تيارۀ لاندې پټ وى. خو په تا باندې به د مالِک خُدائ نور ځليږى او د هغۀ جلال به ستا دپاسه ښکارى.

³قومونه به ستا نُور له راشى، او بادشاهان به ستا د سحر راختونکې رڼا له راشى.

⁴خپل ځان نه ګيرچاپيره نظر واچواه او وګوره: هغوئ ټول راغونډېږى او تا له راځى. ستا زامن به د لرې لرې نه راشى، او ستا لوڼه به په غېږ کښې راوستلے شى.

⁵بيا به تۀ دا وګورې او خوشحاله به شې، ستا زړۀ به غټ شى او د خوشحالۍ نه به درزيږى. ځکه چې د لرې مُلکونو خزانې به تاله راوړے شى، او د قومونو دولت به تا له راشى.

⁶د اُوښانو غټې قافلې به تا له راشى، د ميديان او عيفا نه به اُوښان راشى. هغوئ به د شيبا نه راشى او سرۀ زر او خوشبودارې مصالحې به راوړى او د مالِک خُدائ ثناء صِفت به کوى.

⁷د قيدار ټولې ګډې چېلۍ به تا له راوستے شى، او د نبايوت ټول ګډان به ستا خِدمت دپاره حاضر کړے شى. زۀ به د هغوئ قربانيانې په قربانګاه باندې قبولې کړم او خپلې عبادتخانې له به شان او شوکت ورکړم.

⁸دا څوک دى چې د وريځې په شان راالوځى، لکه چې ګوګوشتکې جالې ته راروانې وى؟

⁹دا د ترسيس سمندرى جهازُونه دى چې تا له راروان دى. ځکه چې دا جزيرې په ما يقين ساتى. دا سمندرى جهازونه ستا زامن سره د هغوئ د سروزرو او سپينو زرو د لرې لرې مُلکونو نه رارولى، او داسې به ستا د مالِک خُدائ د نوم درناوے وشى، کوم چې د بنى اِسرائيلو مقدس ذات دے، چا چې تا له شان او شوکت درکړے دے.

¹⁰د پردى مُلک خلق به ستا دېوالونه بيا جوړ کړى، او د هغوئ بادشاهان به ستا خِدمت کوى. ما په غصه کښې تا له سزا درکړه، خو اوس به زۀ خپل فضل سره تا باندې رحم وکړم.

¹¹ستا دروازې به هميشه کولاو وى، شپه او ورځ به دا نۀ بنديږى، ځکه چې د قومونو مال دولت او د هغوئ قيديان کړے شوى بادشاهان به ښار ته دننه راوستے شى.

¹²خو چې کوم قوم او بادشاهې ستا خِدمت نۀ کوى نو هغوئ به برباد شى، هغوئ به په مکمل طور تباه شى.

¹³د لبنان شان او شوکت به تا له راشى. د نختر، د صُندل او د سبر ونې به تا له راشى چې زما کور ښائسته کړے شى او داسې به زۀ خپل کور له جلال ورکوم.

¹⁴کومو خلقو چې به په تا ظلم زياتے کولو نو د هغوئ اولاد به راځى او د عزت نه به تا ته ټيټېږى. هر چا چې ستا سپکاوے کړے دے نو هغه به ستا پښو ته ټيټېږى. هغوئ به تا ته ”د مالِک خُدائ ښار“ يا ”د بنى اِسرائيلو د مقدس ذات صِيون“ نوم اخلى.

¹⁵اول تۀ رد کړے شوے وې او خلقو به تا نه نفرت کولو، او نۀ به څوک په تا کښې تيريدل. خو اوس به زۀ تا د هميشه دپاره ښائسته کړم او د ټولو نسلونو دپاره به د خوشحالۍ ځائ يې.

¹⁶طاقتور بادشاهان او قوتمند قومونه به ستا هر ضرورت پوره کړى، داسې لکه چې تۀ يو ماشوم يې او د مَلکې سينه رُووى. بيا به تا ته پته ولګى چې زۀ مالِک خُدائ ستاسو خلاصونکے، حفاظت کونکے د بنى اِسرائيلو طاقتور حکمران يم.

¹⁷زۀ به ستا زېړ په سرو زرو، اوسپنه په سپينوزرو، لرګې په زېړو او کاڼې په اوسپنه بدل کړم. امن به ستا رهنما او صداقت به ستا حُکمران جوړ کړم.

¹⁸ستا په مُلک کښې به نور د ظلم زياتى، تباهۍ او بربادئ ذکر قدرې نۀ کيږى. تۀ به خپلو ديوالونو ته خلاصون او دروازو ته حمدوثناء نوم اخلې.

¹⁹تا ته به نور د ورځې د نمر ضرورت نۀ وى او د شپې به درته د سپوږمۍ ضرورت نۀ وى، ځکه چې مالِک خُدائ به ستاسو رڼا وى او خُدائ پاک به ستاسو جلال وى.

²⁰ستا نمر به هيڅ کله نۀ پريوزى او نه به دې کله سپوږمۍ کوزېږى. ځکه چې مالِک خُدائ به ستا ابدى نُور وى، او ستا د غم ورځې به ختمې شى.

²¹ستا د قوم ټول خلق به صادقان وى، او هغه مُلک به د همېشه دپاره د هغوئ په قبضه کښې وى. ما هغوئ په خپلو لاسو لکه د ونو په شان کَرلى دى، دپاره د دې چې خپل ځان له جلال ورکړم.

²²ستا ټولو نه وَړه او کمزورې کورنۍ به هم د يو طاقتور قوم په شان لويه شى. په مقرر وخت به زۀ داسې وکړم. زۀ مالِک خُدائ يم!