Read Pashto (Nangahari) — د پښتو مقدس کتاب يشعياه 62 Bible Online

يشعياه 62 - Pashto (Nangahari) — د پښتو مقدس کتاب bible

يشعياه 62

¹د صِيون د خاطره به زۀ غلے نۀ کښېنم، د يروشلم د خاطره به زۀ تر هغې پورې آرام نۀ کوم چې د هغې صداقت د سحر د رڼا په شان ونۀ ځلېږى او د هغې خلاصُون د مشال په شان ونۀ ځلېږى.

²قومونه به ستا صداقت ووينى، او ټول بادشاهان به ستا شان او شوکت وګورى. او تا ته به يو نوے نوم درکړے شى، يو داسې نوم چې مالِک خُدائ به په خپله خولهٔ درباندې ايښے وى.

³نو تۀ به د مالِک خُدائ په لاس کښې د شاندار تاج په شان يې او د خپل خُدائ پاک په لاس کښې به د شاهى پټکى په شان يې.

⁴تا ته به بيا هيڅ کله ”پرېښودلے شوے ښار“ نوم نۀ شى اخستلے، او نۀ به ستا زمکې ته ”خوشے مُلک“ نوم اخستلے شى. ستا نوے نوم به ”د خُدائ پاک د خوشحالۍ ښار“ او ”د خُدائ پاک ناوې“ وى، ځکه چې مالِک خُدائ ستا نه خوشحال دے او ستا نه به خپله ناوې جوړه کړى.

⁵لکه څنګه چې يو ځلمے يوې پېغلې سره وادۀ کوى، نو داسې به ستا زامن تا سره تړون وکړى. لکه څنګه چې د وادۀ ځلمے د خپلې ناوې سره خوشحاله وى، نو داسې خُدائ پاک به ستا نه خوشحاله وى.

⁶اے يروشليمه، ستا په دېوالونو باندې ما څوکيداران ودرولى دى، هغوئ به شپه او ورځ مسلسل دعا کوى. تاسو چې څوک مالِک خُدائ ته دعا کوئ هيڅ آرام مۀ کوئ.

⁷او مۀ مالِک خُدائ آرام ته پريږدئ تر څو چې هغۀ يروشلم قائم کړے نۀ وى او د دنيا دپاره يې د فخر باعث جوړ کړے نۀ وى.

⁸مالِک خُدائ په خپل ښى لاس او زورَور مټ باندې قسم خوړلے دے او لوظ يې کړے دے چى، ”زۀ به بيا ستا غله ستا په دشمنانو باندې نۀ خوروم، او نۀ به محنت سره جوړ شوى ستا د انګورو شراب د پردى مُلک خلقو باندې څښوم.

⁹خو چا چې دا غله رېبلې وى نو هغوئ به دا خورى او د مالِک خُدائ ثناء صِفت به کوى. او چا چې دا انګور راټول کړى وى نو هغوئ به په خپله د دې شراب د مالِک خُدائ د کور په دربار کښې وڅښى.“

¹⁰بهر لاړ شئ، د ښار دروازو نه بهر لاړ شئ! او چې کوم خلق واپس راځى نو د هغوئ دپاره يو سړک جوړ کړئ! يو لوئ سړک تيار کړئ، د دې نه کاڼى لرې کړئ! يوه جهنډا ولګوئ چې قومونو ته پته لږى.

¹¹ګورئ، مالِک خُدائ ټولې دنيا ته دا اعلان کوى، ”د يروشلم لور ته ووايئ چې ګورئ، ستاسو خلاصون راتلونکے دے. ګورئ، د هغۀ اجر د هغۀ سره دے، او د هغۀ انعام د هغۀ نه مخکښې مخکښې روان دے.“

¹²هغوئ ته به ”مقدس خلق“ او ”د مالِک خُدائ بچ کړے شوى خلق“ نوم اخستلے شى. او يروشلم ته به ”غوره کړے شوے ښار“، ”هغه ښار چې پرېښودے شوے نۀ وى“ نوم اخستلے شى.