Read Pashto (Nangahari) — د پښتو مقدس کتاب يشعياه 8 Bible Online

يشعياه 8 - Pashto (Nangahari) — د پښتو مقدس کتاب bible

يشعياه 8

¹مالِک خُدائ ما ته وفرمائيل، ”د ليکلو دپاره يوه لويه تخته واخله او په هغې باندې صفا صفا وليکه چې د تېزۍ مال غنيمت او زر زر لوټ مار.

²ما د اورِياه اِمام او د يبرکياه زوئ زکرياه په وړاندې دا وليکل او دا دواړه کسان ايمانداره ګواهان وُو.“

³بيا زۀ د خپلې پيغمبرې ښځې سره سملاستم هغه اُميدواره شوه او يو زوئ مو پېدا شو، نو مالِک خُدائ ما ته ووئيل، ”په هغۀ باندې ”د تېزۍ مال غنيمت او زر زر لوټ مار“ نوم کېږده.

⁴د هغې نه وړاندې چې ماشوم دومره لوئ شې چې ابو او امى وئيلے شى، نو د دمشق ټول مال دولت او د سامريه ټول مال غنيمت به د اسور بادشاه لوټ کړے وى.“

⁵نو مالِک خُدائ يو ځل بيا زما سره کلام وکړو. هغۀ وفرمائيل،

⁶”دې خلقو د شيلوخ قلارې روانې اوبۀ رد کړې دى او د رضين بادشاه او فقح بادشاه نه يرېدلى دى.

⁷نو په دې وجه به زۀ، مالِک خُدائ د اسور بادشاه او د هغۀ ټول لښکر راولم چې په يهوداه باندې حمله وکړى. د هغۀ لښکر به داسې وړاندې راشى لکه چې د فرات د سيند چې د غاړو نه اوبۀ راوړېدلى وى.

⁸هغوئ به د سېلاب په شکل کښې د يهوداه نه تېر شى، اے عمانوايله، اوبۀ به لکه د مرغۍ د وزرو په شان خوَرې وى او ستا ټول مُلک به يې نيولے وى. او خلق به يې تر مرئ مرئ پورې پټ کړى وى.“

⁹اے قومونو، په يره يره کښې راغونډ شئ! اے د دنيا لرې مُلکونو واورئ. د جنګ دپاره تيار شئ، خو تاسو به چخڼى کړے شئ! آؤ، تيار شئ، خو تاسو به چخڼى کړے شئ!

¹⁰تاسو چې څۀ منصُوبې هم جوړوئ هغه به بې فائدې وى. تاسو چې څۀ فېصله هم کوئ هغه به ناکام کېږى، ځکه چې خُدائ پاک زمونږ مل دے.

¹¹مالِک خُدائ زۀ کلک ونيولم او خبردارے يې راکړو چې په هغه لار باندې به نۀ ځې چې په کومه به نور خلق تلل. هغۀ وفرمائيل،

¹²”هره خبره سازش مۀ ګڼه څنګه چې يې دا قوم ګڼى او د هغه څيزُونو نه مۀ يرېږه چې کوم نه دوئ يريږى.

¹³مالِک خُدائ، رب‌الافواج مقدس ګڼئ، د هغۀ نه دهشت خورئ او د هغۀ نه يره کوئ.

¹⁴بيا به هغه تاسو محفوظ ساتى. خو هغه به د بنى اِسرائيلو او د يهوداه دپاره د يو داسې کاڼى په شان شى چې خلق پرې تيندک خورى، د يو داسې تيږې په شان چې دوئ پرې راغورزيږى. او د يروشلم د خلقو دپاره به هغه يو دام او يو جال جوړ شى.

¹⁵په هغوئ کښې به ډېر تيندک وخورى راو به غورزېږى او ټوټې ټوټې به شى. هغوئ به په دام کښې راګېر شى.“

¹⁶د څۀ تعليم چې ما ورکړو، نو هغه دې په تُومار کښې درج کړے شى او زما شاګردانو له دې ورکړے شى.

¹⁷زۀ به د مالِک خُدائ انتظار کوم او د هغۀ نه به اُميد ساتم، اګر چې هغۀ د يعقوب کورنۍ رد کړې ده.

¹⁸زۀ دلته د هغه بچو سره يم چې کوم مالِک خُدائ ما له راکړى دى. هغه مالِک خُدائ، رب‌الافواج چې د هغۀ تخت د صِيون په غر باندې دے، هغۀ مونږ بنى اِسرائيلو له د نښې او خبردارې په توګه رالېږلى يُو.

¹⁹که څوک تاسو ته ووائى چې، ”د قسمت ښودونکو او مړو روحونو سره خبرو واله نه پته وکړئ، د هغوى نه چې په نرى آواز سره يا په ګونګسو کښې خبرې کوى،“ هغوئ به وائى، ”د هر څۀ نه به ښۀ نۀ وى چې خلق د خپلو معبودانو سره مشوره وکړى؟ د ژوندو د خاطره مونږ د مړو د روحُونو سره ولې مشوره ونۀ کړُو؟“

²⁰د مالِک خُدائ هداياتو او تعليماتو ته ګورئ! هغه خلق څوک چې د هغۀ د کلام په مطابق پېغام نۀ آوروى نو د هغوئ مستقبل ښۀ نۀ وى.

²¹هغوئ به په هغه مُلک کښې سرګردانه ګرځى، اوږى او بې‌حوصلې به وى. د لوږې نه به غصه وى او خپل بادشاه او خُدائ پاک ته به کنځل کوى. هغوئ که آسمان ته سترګې پورته کړى

²²يا که زمکې ته ګورى، خو هغوئ ته به د پرېشانۍ، مصيبت او تيارې نه بغېر هيڅ هم نۀ ښکارى، په تکه توره او يروُونکې تيارۀ کښې به وغورزولے شى.