Read Pashto (Nangahari) — د پښتو مقدس کتاب لاويان 1 Bible Online

لاويان 1 - Pashto (Nangahari) — د پښتو مقدس کتاب bible

لاويان 1

¹څښتن حضرت موسیٰ له مقدسې خېمې څخه راوغوښت او ورته ويې فرمايل:

²”اسرائيليانو ته ووايه: کله چې ستاسو څخه يو څوک څښتن ته يوه نذرانه راوړي، هغه دې د خپلې پادې يا رمې څخه يو حيوان د خپلې نذرانې په توګه راوړي.

³که چېرې هغه د خپلې پادې څخه يو حيوان د سوزېدونکې نذرانې په توګه وړاندې کوي، هغه بايد يو داسې غويی راولي چې څه عيب په کې نه وي. هغه بايد د مقدسې خېمې د دروازې په خولې کې وړاندې کړي، ترڅو څښتن هغه قبول کړي.

⁴هغه به د حيوان په سر باندې خپل لاس کېږدي او دا به د هغه د ګناهونو د لېرې کولو دپاره د کفارې په توګه قبول شي.

⁵هغه بايد د څښتن په حضور کې غويی حلال کړي او د هارون زامن به چې د کاهنانو په توګه خدمت کوي، د هغه وينه راوړي او د قربانۍ د ځای په څلورو خواو باندې چې د مقدسې خېمې د دروازې په مخکې ده وشيندي.

⁶بيا به د هغه حيوان پوستکی وباسي او ټوټې ټوټې به يې کړي،

⁷او کاهنان دې د قربانۍ په ځای باندې لرګي په ترتيب سره کېږدي او اور دې ولګوي.

⁸هغوی دې د حيوان ټوټې د سر او وازګې سره په اور باندې کېږدي.

⁹هغه نفر بايد کولمې او پښې ومينځي او کاهن دې هغه ټول په قربانګاه باندې وسوزوي. دا سوزېدونکې نذرانه ده، يو داسې بوی دی چې په څښتن باندې ښه لګيږي.

¹⁰که چېرې هغه نفر له خپلې رمې څخه يو حيوان وړاندې کوي، هغه بايد نر وي او څه عيب په کې نه وي.

¹¹هغه بايد د څښتن په حضور کې د قربانۍ د ځای شمال خواته حلال کړي او کاهنان به د هغه وينه د قربانۍ د ځای په څلورو خواو باندې وشيندي.

¹²وروسته له دې چې حيوان ټوټې ټوټې شي، کاهن به دا ټولې برخې د سر او وازګې سره په اور باندې کېږدي.

¹³هغه بايد کولمې او پښې ومينځي او کاهن دې دا قرباني وړاندې کړي او هغه ټول دې په قربانګاه باندې وسوزوي. دا سوزېدونکې نذرانه ده، يو داسې بوی چې په څښتن باندې ښه لګيږي.

¹⁴که چېرې هغه يو مارغه د سوزېدونکې نذرانې په توګه وړاندې کوي، هغه بايد يوه کوتره يا قمري وي.

¹⁵کاهن به هغه په قربانګاه باندې وړاندې کړي، د هغې اورمېږ به تاو کړي او سر به يې د قربانۍ په ځای باندې وسوزوي. د هغې وينه به د قربانۍ د ځای په اړخ کې وڅڅيږي.

¹⁶د هغې ججوره به د هرڅه سره لېرې کړي او د قربانۍ د ځای لمرخاته خواته به يې وغورزوي چېرته چې ايرې اچول کيږي.

¹⁷د هغې وزرونه به ونيسي او بدن به يې په منځ کې داسې څيري کړي چې وزرونه يې ورڅخه بېل نشي او بيا به هغه ټول په قربانګاه باندې وسوزوي. دا سوزېدونکې نذرانه ده، يو داسې بوی چې په څښتن باندې ښه لګيږي.