Read Pashto (Nangahari) — د پښتو مقدس کتاب لاويان 10 Bible Online

لاويان 10 - Pashto (Nangahari) — د پښتو مقدس کتاب bible

لاويان 10

¹د حضرت هارون زامنو ناداب او ابيهو هر يو خپل د اور لوښی راواخيست او په هغې کې يې بل شوي سکاره واچول، خوشبويي يې ورزياته کړه او هغه يې څښتن ته وړاندې کړل. مګر دا اور مقدس نه ؤ، ځکه چې څښتن په هغوی باندې د هغه د وړاندې کولو امر نه ؤ کړی.

²نو څښتن يوناڅاپه اور نازل کړ او هغوی يې په خپل حضور کې وسوزول او مړه شول.

³بيا حضرت موسیٰ هارون ته وفرمايل: ”څښتن د دې په هکله خبرې کولې او دا يې فرمايل: هغه خلک چې خدمت کوي زما بايد وکړي احترام د مقدس توب زما د ټول قوم په نظر کې به زه دروند يم“ مګر حضرت هارون غلی پاتې شو.

⁴حضرت موسیٰ ميشائيل او الصافان چې د حضرت هارون او حضرت موسیٰ د تره عزيئيل زامن ؤو، راوغوښتل او ورته ويې فرمايل: ”دلته راشئ، د خپل تره د زامنو مړي د مقدس ځای څخه لېرې له کمپ څخه دباندې يوسئ.“

⁵نو هغوی راغلل او څنګه چې حضرت موسیٰ حکم کړی ؤ، د هغوی مړي يې له کاليو څخه ونيول او د کمپ څخه يې دباندې يوړل.

⁶بيا حضرت موسیٰ هارون او د هغه زامنو العازار او ايتامار ته وفرمايل: ”خپل ويښتان ګډوډ مه پرېږدئ او خپل کالي مه شلوئ چې دا وښايي چې تاسو غمجن يئ. که چېرې داسې وکړئ نو تاسو به مړه شئ او څښتن به په ټول قوم باندې په قهر شي. مګر نور ټول اسرائيليان کولی شي چې د هغو دوو نفرو دپاره چې څښتن د اور په وسيله له منځه وړي دي وژاړي.

⁷د خېمې د دروازې له خولې څخه مه ځئ که نه، نو تاسو به مړه شئ، ځکه چې تاسو د څښتن د مسح کولو په تېلو باندې پاک شوي يئ.“ نو څنګه چې حضرت موسیٰ فرمايلي ؤو هغوی هماغسې وکړل.

⁸څښتن حضرت هارون ته وفرمايل:

⁹”ته او ستا زامن د شرابو يا بيرو د څښلو څخه وروسته مقدسې خېمې ته مه ورننوزئ، که چېرې داسې وکړئ نو مړه به شئ. دا يو دايمي قانون دی چې ستاسو ټوله اولاده به ورباندې عمل کوي.

¹⁰تاسو بايد د هغه شيانو ترمنځ فرق وکړئ چې کوم د خدای دي او کوم د عمومي استعمال دپاره دي او کوم پاک دي او کوم ناپاک.

¹¹بايد د اسرائيلو قوم ته هغه ټول قوانين ورزده کړئ چې ما تاسو ته د موسیٰ په وسيله درکړي دي.“

¹²بيا حضرت موسیٰ هارون او د هغه پاتې زامنو العازار او ايتامار ته وفرمايل: ”د غلې دانې هغه نذرانه چې څښتن ته په اور باندې د تيارېدونکو نذرانو څخه پاتې شوې ده واخلئ، له هغې څخه فطيره ډوډۍ پخه کړئ او د قربانۍ د ځای په څنګ کې يې وخورئ ځکه چې دا نذرانه ډېره مقدسه ده.

¹³هغه په يو مقدس ځای کې وخورئ، ځکه چې دا ستا او ستا د زامنو د هغو نذرانو برخه ده چې څښتن ته په اور باندې تياريږي. دا هغه څه دي چې څښتن يې په ما باندې امر کړی دی.

¹⁴مګر سينه او شاتنۍ پښه چې پورته نيول کيږي هغه دې په داسې ځای کې چې په مذهبي لحاظ پاک وي وخوړل شي. دا برخه تاسو، ستاسو زامنو او لورګانو ته ستاسو د برخې په توګه د سلامتۍ د هغو نذرانو څخه چې د اسرائيلو د خلکو له خوا وړاندې کيږي درکول کيږي.

¹⁵شاتنۍ پښه او سينه بايد د هغو نذرانو د وازګې سره چې په اور باندې تياريږي څښتن ته پورته ونيول شي. بيا لکه څنګه چې څښتن امر کړی دی، هغه به د همېش دپاره ستاسو او ستاسو د اولادې برخه وي.“

¹⁶حضرت موسیٰ د هغه وز په باره کې پوښتنه وکړه چې د ګناه د نذرانې دپاره ؤ او خبر شو چې هغه سوزول شوی دی. په دې خبره هغه په العازار او ايتامار باندې په قهر شو او پوښتنه يې وکړه:

¹⁷”تاسو ولې د ګناه نذرانه په يو مقدس ځای کې ونه خوړله؟ هغه ډېره مقدسه ده او څښتن د دې دپاره تاسو ته درکړې وه چې د کفارې په ادا کولو سره د قوم څخه ګناه لېرې شي.

¹⁸په دې خاطر چې د هغه وينه مقدسې خېمې ته نه وه وړل شوې، نو تاسو بايد د وز غوښه هلته خوړلې وای، لکه څنګه چې ما درته امر کړی ؤ.“

¹⁹حضرت هارون په ځواب کې وفرمايل: ”که چېرې ما د ګناه نذرانه نن خوړلې وای، آيا څښتن به هغه قبوله کړې وای؟ قوم خپله د ګناه نذرانه نن څښتن ته وړاندې کړه او خپله سوزېدونکې نذرانه يې راوړله، مګر بياهم په ما باندې دا هيبتناکه پېښې وشوې.“

²⁰کله چې حضرت موسیٰ دا خبرې واورېدلې، هغه قانع شو.