Read Pashto (Nangahari) — د پښتو مقدس کتاب لاويان 11 Bible Online

لاويان 11 - Pashto (Nangahari) — د پښتو مقدس کتاب bible

لاويان 11

¹څښتن حضرت موسیٰ او حضرت هارون ته وفرمايل:

²”اسرائيليانو ته ووايئ چې د ټولو حيواناتو له جملې څخه چې په ځمکه باندې ژوند کوي، يعنې هغه حيوانات چې غوښه يې خوړلی شئ هغه دا دي:

³هر حيوان چې خلاص سوم ولري او شخوند وهونکی هم وي.

⁴خو داسې حيوانات شته چې يوازې شخوند وهونکي دي يا يوازې خلاص سوم لري، خو تاسو بايد د هغو غوښه ونه خورئ. لکه اوښ، که څه هم هغه شخوند وهونکی دی، مګر خلاص سوم نه لري. دا ستاسو دپاره ناپاک دی.

⁵غرنۍ سويه، که څه هم هغه شخوند وهونکې ده مګر خلاص سوم نه لري، دا ستاسو دپاره ناپاکه ده.

⁶سويه، که څه هم شخوند وهونکې ده مګر خلاص سوم نه لري. دا ستاسو دپاره ناپاکه ده.

⁷د خوګ غوښه مه خورئ. هغه بايد ناپاک وګڼل شي. هغه خلاص سومان لري، مګر شخوند وهونکی نه دی.

⁸تاسو بايد د دې حيواناتو غوښه ونه خورئ او مه د هغو مړو ته لاس وروړئ، دا ستاسو دپاره ناپاک دي.

⁹تاسو کولی شئ هر ډول ماهيان چې وزرونه او پتري ولري وخورئ،

¹⁰مګر هر حيوان چې په اوبو کې ژوند کوي او وزرونه او پتري نه لري بايد غوښه يې ونه خوړل شي.

¹¹داسې حيوانات بايد حرام وګڼل شي. تاسو بايد د هغو غوښه ونه خورئ او حتیٰ مړو ته يې لاس هم مه وروړئ.

¹²هر شی چې په اوبو کې ژوند کوي او وزرونه او پتري ونلري بايد ونه خورئ.

¹³۱۳‏-۱۹ دا هغه مرغان دي چې تاسو يې بايد حرام وګڼئ: عقاب او ډول ډول ټپوسان، هر ډول باښې، هر ډول کارغان، شترمرغ، ډول ډول ګونګيان، د درياب مرغان، لګ لګ، هر ډول ماهي خوړونکي مرغان، ملاچرګک او شوپرک.

²⁰ټول وزر لرونکي حشرات حرام دي،

²¹بغير د هغو حشراتو څخه چې ټوپونه وهي.

²²له هغو څخه کولی شئ چې ډول ډول چورچورکۍ او ملخان وخورئ.

²³مګر نور ټول وزر لرونکي حشرات چې په پښو باندې هم ګرځي بايد حرام وګڼل شي.

²⁴۲۴‏-۲۸ هرڅوک چې د دغو حيواناتو مړو ته لاس وروړي هغه به تر ماښامه پورې ناپاک وي: ټول سوم لرونکي حيوانات، له هغو پرته چې سومان يې هم جدا وي او شخوند هم وهي او ټول حيوانات چې څلور پښې ولري او پنجې ولري. هرڅوک چې د هغو مړي يوسي بايد هغه خپل کالي ومينځي، خو تر ماښامه پورې به ناپاک وي.

²⁹د هغو حيواناتو څخه چې په ځمکه باندې ګرځي، دغه حيوانات ستاسو دپاره ناپاک دي: ړنده مږه، موږګ، هر ډول سمساره،

³⁰ډول ډول د کور او د شګې چرموښکۍ او کربوړی.

³¹هرڅوک چې د هغو مړو ته لاس وروړي، هغه به تر ماښامه پورې ناپاک وي.

³²که چېرې د هغو مړي په يو شي باندې ولويږي، هغه شی به ناپاک شي. همداسې کار به د لرګي، ټوکر، څرمنې، يا بوجۍ په موادو باندې کيږي او مهمه نه ده چې هغه د څه شي دپاره استعماليږي. هغه دې په اوبو کې غوټه کړای شي خو تر ماښامه پورې به ناپاک پاتې شي.

³³که چېرې د هغو مړي د خټې په يو لوښي کې وغورزيږي، هرڅه چې په هغه کې دي ناپاک به شي او تاسو بايد هغه لوښی مات کړئ.

³⁴کوم خواړه چې په عادي توګه حلال وي، مګر که له داسې لوښي څخه په هغو خواړو باندې اوبه توی شي، هغه به ناپاک شي او د څښلو هرڅه چې په دې لوښي کې وي هغه ناپاک دي.

³⁵په هر شي باندې چې د هغو مړي ولويږي هغه شی ناپاکه کيږي، که په هغو کې نغری يا د پخلي لوښی شامل وي هغه بايد مات شي.

³⁶مګر يوه چينه يا کوهی چې دغه مړه حيوانات په کې پراته وي، هغه پاک پاتې کيږي. ليکن هرڅوک چې د دغو مړو له جملې څخه کوم يو ته لاس وروړي، هغه به ناپاک شي.

³⁷که چېرې يو داسې مړی په هغو تخمونو باندې وغورزيږي چې کرل کيږي، هغه تخمونه پاک پاتې کيږي.

³⁸مګر که چېرې په تخمونو باندې اوبه توی شوې وي او په هغه باندې يو داسې مړی ولويږي، هغه ستاسو دپاره ناپاک دي.

³⁹که چېرې يو حيوان چې ستاسو دپاره پاک وي مړ شي، هرڅوک چې د هغه مړي ته لاس وروړي هغه به تر ماښامه پورې ناپاک وي.

⁴⁰هرڅوک چې د دې مړ حيوان د غوښې څخه لږه غوښه وخوري، بايد خپل کالي ومينځي، خو هغه به تر ماښامه پورې ناپاک وي. هرڅوک چې د هغه مړی راپورته کړي، هغه بايد خپل کالي ومينځي خو هغه به تر ماښامه پورې ناپاک وي.

⁴¹هره خزنده چې په ځمکه باندې ګرځي، بايد ونه خوړل شي.

⁴²ستاسو دپاره هره خزنده حرامه ده، که هغه په سينه باندې ښوئيږي يا په څلورو يا په ډېرو پښو ګرځي.

⁴³د هغو څخه د کوم يو په خوړلو سره خپل ځانونه مه ناپاکه کوئ.

⁴⁴زه ستاسو څښتن خدای يم، تاسو بايد خپل ځانونه پاک کړئ او مقدس اوسئ، ځکه چې زه مقدس يم. خپل ځانونه په هيڅ يوې خزندې باندې مه ناپاکه کوئ.

⁴⁵زه څښتن يم چې تاسو مې له مصر څخه راوويستلئ ترڅو ستاسو خدای اوسم. له دې کبله تاسو بايد مقدس اوسئ، ځکه چې زه مقدس يم.

⁴⁶دا مقررات د حيواناتو، مرغانو او هرڅه چې په اوبو کې ژوند کوي او ټولو خزندو په باره کې دي.

⁴⁷تاسو بايد پام وکړئ چې د پاک او ناپاک او همدارنګه د حلالو او حرامو حيواناتو ترمنځ فرق وکړئ.“