Read Pashto (Nangahari) — د پښتو مقدس کتاب لاويان 12 Bible Online

لاويان 12 - Pashto (Nangahari) — د پښتو مقدس کتاب bible

لاويان 12

¹څښتن حضرت موسیٰ ته وفرمايل:

²”اسرائيليانو ته ووايه چې کله يوه ښځه اميدواره شي او زوی وزېږوي، هغه به اوه ورځې د خپلې مياشتينۍ ناروغۍ په شان ناپاکه وي.

³په اتمه ورځ دې هلک سنت شي.

⁴بيا بايد هغه ښځه د وينې د بهېدلو څخه د پاکېدلو دپاره دري دېرش ورځې صبر وکړي. هغه بايد هيڅ يو پاک شي ته لاس ورنه وړي او نه دې د پاکېدلو د ورځو د پوره کېدو پورې مقدسې خېمې ته ورننوزي.

⁵که چېرې هغه لور وزېږوي، دا ښځه به څوارلس ورځې ناپاکه وي، لکه څنګه چې د مياشتينۍ ناروغۍ په دوران کې ناپاکه کيږي. بيا بايد هغه ښځه د وينې د بهېدلو څخه د پاکېدلو دپاره شپږشپېته ورځې صبر وکړي.

⁶کله چې د يو زوی يا د يوې لور د زېږولو دپاره د پاکېدلو ورځې خلاصې شي، هغه دې د مقدسې خېمې د دروازې په خوله کې کاهن ته ورشي. هغه دې يو يو کلن وری د سوزېدونکې نذرانې دپاره او يوه قمري يا يوه کوتره د ګناه د نذرانې دپاره راوړي.

⁷کاهن به د هغې دپاره د کفارې د ادا کولو په خاطر هغه د څښتن په حضور کې وړاندې کړي او هغه ښځه به د وينې د بهېدلو څخه پاکه شي. دا مقررات د هغې ښځې دپاره دي چې يو هلک يا يوه انجلۍ وزېږوي.

⁸که چېرې دا ښځه يو وری نشي اخيستلی، نو دوه کوترې يا دوه قمري ګانې دې راوړي، يوه د سوزېدونکې نذرانې دپاره او بله د ګناه د نذرانې دپاره او کاهن به د هغې د ناپاکۍ د لېرې کولو دپاره مراسم سرته ورسوي او هغه به پاکه شي.“