Read Pashto (Nangahari) — د پښتو مقدس کتاب لاويان 13 Bible Online

لاويان 13 - Pashto (Nangahari) — د پښتو مقدس کتاب bible

لاويان 13

¹څښتن حضرت موسیٰ او حضرت هارون ته وفرمايل:

²”کله چې د چا په پوستکي باندې زخم، دانه يا پړسوب وي چې کېدای شي هغه د پوستکي په يوې ساري ناروغۍ باندې بدله شي، هغه بايد هارون کاهن يا د هغه يو زوی ته چې کاهن وي راوستل شي.

³کاهن دې د هغه زخم معاينه کړي او که چېرې په هغه کې ويښتان سپين شوي ؤو او زخم د پوستکي څخه ژور ښکاره کېده، نو دا د پوستکي ساري ناروغي ده. نو کاهن به هغه نفر ناپاک اعلان کړي.

⁴که چېرې د هغه د پوستکي زخم سپين ؤ خو د پوستکي څخه ژور نه ښکاره کېده او ويښتان په کې سپين شوي نه ؤو، کاهن دې هغه ناروغه نفر د اوو ورځو دپاره د نورو څخه جدا وساتي.

⁵کاهن به په اوومه ورځ هغه بيا معاينه کړي او که چېرې د هغه په نظر کې زخم هماغه شان ښکاره کېده او خپور شوی نه ؤ، کاهن به هغه د نورو اوو ورځو دپاره جدا وساتي.

⁶په اوومه ورځ دې کاهن هغه د دوهم ځل دپاره معاينه کړي. که چېرې زخم مړاوی شوی ؤ او په پوستکي کې نه ؤ خپور شوی، کاهن به هغه پاک اعلان کړي، دا يوازې يوه ګرمکه ده. هغه نفر بايد خپل کالي ومينځي او هغه به پاک شي.

⁷مګر که چېرې کاهن هغه نفر معاينه کړی وي او هغه يې پاک اعلان کړی وي او له هغې څخه وروسته ګرمکه د هغه په بدن باندې خپره شي، هغه بايد خپل ځان بيا کاهن ته ورښکاره کړي.

⁸کاهن دې هغه معاينه کړي، که چېرې هغه ګرمکه په بدن باندې خپره شوې وه، کاهن به هغه ناپاک اعلان کړي، دا يوه ساري ناروغي ده.

⁹کله چې يو نفر د پوستکي ساري ناروغي ولري، هغه بايد کاهن ته راوستل شي.

¹⁰کاهن دې هغه معاينه کړي، که چېرې په پوستکي کې يو سپين زخم وي چې ويښتان يې سپين کړي وي او که چېرې په پړسوب کې خامه غوښه وي،

¹¹نو دا د پوستکي يوه دوامداره ناروغي ده او کاهن به هغه ناپاک اعلان کړي. کاهن دې هغه د معاينې دپاره جدا ونه ساتي، ځکه چې هغه په ښکاره ناپاک دی.

¹²۱۲‏-۱۳ مګر که چېرې د ناروغۍ موده تېره شوې وي او يوازې داغونه پاتې وي، کاهن به هغه نفر پاک اعلان کړي.

¹³

¹⁴مګر هرکله چې په هغه باندې خامه غوښه راښکاره شي، هغه به ناپاک شي.

¹⁵کله چې کاهن دا خامه غوښه وويني، هغه نفر به ناپاک اعلان کړي. خامه غوښه ناپاکه ده، هغه نفر په ساري ناروغۍ اخته دی.

¹⁶مګر کله چې دا خامه غوښه روغه شي او بيا سپينه شي، هغه نفر بايد کاهن ته ورشي.

¹⁷کاهن دې هغه معاينه کړي، که چېرې د زخم څخه يوازې سپين داغونه پاتې وي کاهن به هغه ناروغه نفر پاک اعلان کړي، بيا به هغه پاک شي.

¹⁸کله چې د يو چا په پوستکي باندې يوه دانه وي او روغه شي

¹⁹او په هغه ځای باندې چې دانه وه، يو سپين پړسوب يا سوربخن سپين داغ راښکاره شي، هغه بايد خپل ځان کاهن ته ورښکاره کړي.

²⁰کاهن دې هغه معاينه کړي، که چېرې هغه د پوستکي څخه ژور وي او ويښتان په کې سپين شوي وي، کاهن به هغه ناپاک اعلان کړي. دا د پوستکي يوه ساري ناروغي ده چې د دانې په ځای منځته راغلې ده.

²¹مګر که چېرې کاهن هغه معاينه کړي او سپين ويښتان په کې نه وي او د پوستکي څخه ژور نه وي او مړاوی شوی وي، بيا دې کاهن هغه نفر د اوو ورځو دپاره جدا وساتي.

²²که چېرې هغه زخم په پوستکي کې خپريږي، کاهن به هغه نفر ناپاک اعلان کړي، دا ساري ناروغي ده.

²³مګر که چېرې هغه بدل شوی او خپور شوی نه وي، دا يوازې د دانې داغ دی او کاهن به هغه نفر پاک اعلان کړي.

²⁴کله چې د يو چا پوستکی سوزېدلی وي او د سوزېدلي ځای په خامه غوښه کې يو سوربخن سپين يا سپين داغ راښکاره شي،

²⁵نو کاهن دې هغه داغ معاينه کړي. که چېرې په هغه کې ويښتان سپين شوي ؤو او د پوستکي څخه ژور ښکارېده، دا د پوستکي يوه ساري ناروغي ده چې په هغه سوزېدلي ځای کې پيل شوې ده. کاهن به هغه نفر ناپاک اعلان کړي.

²⁶مګر که چېرې کاهن هغه معاينه کړي او په داغ کې سپين ويښتان نه وي او هغه د پوستکي څخه ژور نه وي او مړاوی شوی وي، بيا دې کاهن هغه نفر د اوو ورځو دپاره جدا وساتي.

²⁷په اوومه ورځ دې کاهن هغه معاينه کړي. که چېرې هغه خپريږي، کاهن به هغه نفر ناپاک اعلان کړي، دا د پوستکي يوه ساري ناروغي ده.

²⁸خو که چېرې بياهم التهاب بدل شوی نه وي او خپور شوی نه وي مګر مړاوی شوی وي، نو دا د سوزېدلي ځای پړسوب دی او کاهن به هغه نفر پاک اعلان کړي. دا يوازې د سوزېدلي ځای داغ دی.

²⁹که چېرې د يو سړي يا د يوې ښځې په سر يا په زنه باندې زخم وي،

³⁰نو کاهن دې هغه زخم معاينه کړي. که چېرې هغه د پوستکي څخه ژور ښکاري او ژيړ نري ويښتان په کې وي، نو کاهن به هغه نفر ناپاک اعلان کړي. دا يو خارښت دی او د سر يا د زنې ساري ناروغي ده.

³¹مګر کله چې کاهن د ناسور دا ډول زخم معاينه کړي، که چېرې هغه د پوستکي څخه ژور نه ښکاره کېده، خو بياهم تور ويښتان په کې نه ؤو، نو کاهن دې هغه ناروغه نفر اوه ورځې جدا وساتي.

³²په اوومه ورځ دې کاهن هغه زخم معاينه کړي. که چېرې خارښت خپور شوی نه ؤ او ژيړ ويښتان په کې نه ؤو او د پوستکي څخه ژور نه ښکارېده،

³³نو د هغه نفر ټول سر بايد وخرايل شي بغير له زخمي ځای څخه. کاهن دې هغه نورې اوه ورځې جدا وساتي.

³⁴په اوومه ورځ دې کاهن هغه خارښت بيا معاينه کړي، که چېرې هغه په پوستکي کې خپور شوی نه ؤ او د پوستکي څخه ژور نه ښکاره کېده، کاهن به هغه پاک اعلان کړي. هغه نفر بايد خپل کالي ومينځي او پاک به شي.

³⁵مګر که چېرې د هغه د پاکوالي د اعلان څخه وروسته خارښت خپور شي،

³⁶کاهن دې هغه معاينه کړي او که چېرې خارښت په پوستکي کې خپور شوی وي، کاهن دا اړتيا نه لري چې ژيړ ويښتان ولټوي، هغه نفر ناپاک دی.

³⁷خو که چېرې د هغه په نظر کې هغه بدل شوی نه وي او تور ويښتان په کې راشنه شوي وي، دا خارښت روغ شوی دی. هغه نفر پاک دی او کاهن به هغه همداسې پاک اعلان کړي.

³⁸کله چې د يو سړي يا د يوې ښځې په پوستکي باندې سپين داغونه وي،

³⁹نو کاهن دې هغه نفر معاينه کړي. که چېرې دا داغونه مړاوي او سپين وي، هغه يوه بې زيانه ګرمکه ده چې په بدن باندې راختلې ده، هغه نفر پاک دی.

⁴⁰که چېرې يو سړي خپل ويښتان له لاسه ورکړي وي او ګنجی شوی وي، هغه پاک دی.

⁴¹که چېرې هغه د خپلې کوپړۍ يا تندي ويښتان له لاسه ورکړي وي او لوڅ تندی ولري، هغه پاک دی.

⁴²مګر که چېرې د هغه په ګنجي سر يا لوڅ تندي باندې سوربخن سپين زخم وي، دا د پوستکي يوه ساري ناروغي ده.

⁴³کاهن دې هغه معاينه کړي او که چېرې زخم سوربخن سپين وي،

⁴⁴نو هغه سړی ناروغ او ناپاک دی. کاهن به هغه ناپاک اعلان کړي ځکه چې د هغه په سر باندې زخم دی.

⁴⁵هغه نفر چې په داسې ساري ناروغۍ اخته وي بايد شلېدلي کالي واغوندي، خپل ويښتان دې ببر پرېږدي، خپله خوله دې پټه کړي او داسې چيغې دې ووهي: زه ناپاک يم! زه ناپاک يم!

⁴⁶ترڅو پورې چې هغه نفر په دې ناروغۍ باندې اخته وي هغه ناپاک پاتې کيږي. هغه بايد يوازې او د کمپ څخه دباندې واوسيږي.

⁴⁷که چېرې کوم کالي چڼاسکې وهلي وي که هغه د وړيو څخه جوړ شوي وي يا د کتان کالي وي،

⁴⁸د کتان يا وړيو ټوکر، يا څرمن او يا داسې شی وي چې له څرمنې څخه جوړ شوی وي،

⁴⁹که چېرې هغه چڼاسکه شنه بخنه يا سره بخنه وي، نو دا يوه خپرېدونکې چڼاسکه ده او کاهن ته بايد وروښودل شي.

⁵⁰کاهن دې هغه چڼاسکه معاينه کړي او هغه شی دې اوه ورځې جدا کېږدي.

⁵¹په اوومه ورځ دې هغه بيا معاينه کړي. که چېرې چڼاسکه خپره شوې وه نو هغه شی ناپاک دی.

⁵²کاهن بايد هغه کالي وسوزوي، ځکه چې چڼاسکه خرابوونکې ده او هغه دې وسوزول شي.

⁵³مګر کله چې کاهن هغه معاينه کړي او دا معلومه کړي چې چڼاسکه په هغه شي باندې نه ده خپره شوې،

⁵⁴هغه به دا حکم وکړي چې دا خراب شوی شی ومينځل شي. بيا دې هغه د نورو اوو ورځو دپاره جدا کېږدي.

⁵⁵له دې وروسته چې خراب شوی شی ومينځل شي، کاهن دې هغه بيا معاينه کړي. که چېرې چڼاسکې خپل رنګ نه وي بدل کړی، که څه هم هغه خپره شوې نه ده، بياهم هغه ناپاک دی. که دا خرابوالی په مخ کې وي يا شاته، تاسو بايد دا شی وسوزوئ.

⁵⁶مګر کله چې کاهن هغه معاينه کړي، که چېرې د هغه شي د مينځلو څخه وروسته چڼاسکه مړاوې شوې وي، هغه دې خرابه شوې برخه وشلوي.

⁵⁷مګر که چېرې چڼاسکه په پورتنيو شيانو باندې بيا راښکاره شي، نو دا خپرېدونکې ده او په هرڅه باندې چې چڼاسکه وي خاوند يې بايد هغه شی وسوزوي.

⁵⁸که چېرې هغه نفر هغه شی ومينځي او چڼاسکه ورکه شي هغه دې بيا ومينځل شي نو هغه شی به پاک شي.

⁵⁹دا مقررات د هغو کاليو په هکله دي چې چڼاسکې وهلي وي که هغه د وړيو يا کتان څخه جوړ شوي وي، د وړيو يا کتان ټوکر وي يا هغه شيان وي چې د څرمنې څخه جوړ شوي وي. نو په دې ډول به کاهن کولی شي دا فيصله وکړي چې آيا دا شيان پاک دي يا ناپاک.“