Read Pashto (Nangahari) — د پښتو مقدس کتاب لاويان 14 Bible Online

لاويان 14 - Pashto (Nangahari) — د پښتو مقدس کتاب bible

لاويان 14

²”دا مقررات د هغه نفر د پاکېدلو په باره کې دي چې د پوستکي د ساري ناروغۍ څخه روغ شوی وي. په هغه ورځ چې د هغه پاکوالی اعلانيږي بايد هغه کاهن ته راوستل شي.

³کاهن دې د کمپ څخه دباندې لاړ شي او هغه دې معاينه کړي. که چېرې هغه نفر د پوستکي د ساري ناروغۍ څخه روغ شوی وي،

⁴کاهن به داسې حکم وکړي چې دوه ژوندۍ پاکې مرغۍ، د صبر لږ لرګي، سور تار او د ويلني بوټی دې د پاکوالي د مراسمو دپاره راوړل شي.

⁵بيا به کاهن داسې حکم وکړي چې له دې مرغيو څخه دې يو د خټو د لوښي دپاسه چې د چينې تازه اوبه په کې وي، حلاله شي.

⁶هغه دې بله ژوندۍ مرغۍ د صبر د لرګي، سور تار او د ويلني د بوټي سره واخلي او د هغې مرغۍ په وينه کې دې غوټه کړي کومه چې د تازه اوبو دپاسه حلاله شوې وه.

⁷کاهن به اوه ځلې په هغه نفر باندې چې د ساري ناروغۍ څخه پاکيږي هغه وينه وشيندي او هغه به پاک اعلان کړي. بيا دې هغه ژوندۍ مرغۍ په صحرا کې خوشې کړي.

⁸کوم نفر چې پاکيږي، هغه بايد خپل کالي ومينځي، خپل ټول ويښتان دې وخرايي او غسل دې وکړي، بيا به هغه پاک شي. له دې وروسته هغه کولی شي چې کمپ ته ورننوزي، مګر اوه ورځې بايد د خپلې خېمې څخه دباندې واوسيږي.

⁹هغه بايد په اوومه ورځ بيا خپل سر، ږيره، وروځې او د بدن پاتې ويښتان وخرايي. خپل کالي دې ومينځي او غسل دې وکړي، نو هغه به پاک شي.

¹⁰هغه بايد په اتمه ورځ دغه شيان راوړي: دوه وري او يوه يو کلنه مېږه چې په هر يو کې عيب نه وي، د غلې دانې د نذرانې دپاره درې کيلوګرامه ښه اوړه چې د زيتونو تېل ورسره ګډ وي او يوه پياله د زيتونو تېل.

¹¹کاهن بايد هغه نفر چې پاکيږي د دې نذرانو سره د مقدسې خېمې د دروازې په خوله کې د څښتن حضور ته ورولي.

¹²بيا به کاهن يو وری د يوې پيالې تېلو سره واخلي او هغه به د تاوان د نذرانې په توګه وړاندې کړي. کاهن به دا پورته ونيسي ترڅو دا وښايي چې هغه څښتن ته وقف شوي دي.

¹³هغه دې وری په هغه مقدس ځای کې حلال کړي چېرته چې د ګناه د نذرانو او سوزېدونکو نذرانو دپاره حيوانات حلاليږي. هغه بايد داسې وکړي ځکه چې د تاوان نذرانه د ګناه د نذرانې په شان د کاهن ده او هغه ډېره مقدسه ده.

¹⁴کاهن دې د وري له وينې څخه لږه وينه واخلي او د هغه نفر چې پاکيږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې دې وسولوي.

¹⁵بيا به کاهن لږ تېل راواخلي او د خپل چپ لاس په ورغوي کې به يې توی کړي،

¹⁶خپله ښي ګوته به په خپل ورغوي کې غوټه کړي او لږ تېل به په خپلې ګوتې سره د څښتن په حضور کې اوه ځلې وشيندي.

¹⁷کاهن دې لږ تېل چې د هغه د لاس په ورغوي کې پاتې دي راواخلي او د هغه نفر چې پاکيږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې وسولوي.

¹⁸کاهن به پاتې تېل چې د هغه په ورغوي کې دي د هغه چا په سر باندې توی کړي څوک چې پاکيږي او د هغه دپاره به د څښتن په حضور کې کفاره ادا کړي.

¹⁹بيا دې کاهن د ګناه نذرانه قرباني کړي او د هغه چا دپاره دې کفاره ادا کړي چې د خپلې ناپاکۍ څخه پاکيږي. له هغې څخه وروسته به د سوزېدونکې نذرانې دپاره حيوان حلال کړي

²⁰او د غلې دانې د نذرانې سره به يې په قربانګاه باندې وړاندې کړي. په دې ډول به د هغه نفر دپاره کفاره ادا کړي او هغه به پاک شي.

²¹که چېرې هغه نفر غريب وي او نور څه نشي اخيستلی، بايد يو وری د تاوان د نذرانې په توګه راوړي. کاهن به هغه څښتن ته د وقف کولو دپاره پورته ونيسي او د هغه نفر دپاره به کفاره ادا کړي. هغه به يو کيلوګرام ښه اوړه چې د زيتون تېل ورسره ګډ وي د غلې دانې د نذرانې دپاره راوړي او يوه پياله تېل.

²²همدارنګه هغه نفر به دوه کوترې يا دوه قمري ګانې راوړي، يوه د ګناه د نذرانې دپاره او بله د سوزېدونکې نذرانې دپاره.

²³هغه بايد په اتمه ورځ دا شيان د خپل ځان د پاکېدلو دپاره د مقدسې خېمې د دروازې په خوله کې کاهن ته راوړي.

²⁴کاهن به وری او د زيتونو تېل د تاوان د نذرانې دپاره واخلي او څښتن ته به يې د وقف کولو دپاره پورته ونيسي.

²⁵هغه به وری د تاوان د نذرانې په توګه حلال کړي او د هغه لږه وينه به واخلي او د هغه نفر چې پاکيږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې به يې وسولوي.

²⁶بيا دې کاهن لږ تېل راواخلي او د خپل چپ لاس په ورغوي کې دې توی کړي.

²⁷هغه دې په خپله ښي ګوته د خپل ورغوي څخه لږ تېل اوه ځلې د څښتن په حضور کې وشيندي.

²⁸د خپل ورغوي څخه دې لږ تېل په هماغو ځايونو باندې وسولوي چې د تاوان د نذرانې وينه يې ورباندې سولولې وه، يعنې د هغه نفر چې پاکيږي د هغه د ښي غوږ په نرمۍ، د ښي لاس په غټې ګوتې او د ښي پښې په غټې ګوتې دې هغه وسولوي.

²⁹کاهن به هغه تېل چې د هغه په ورغوي کې پاتې دي د هغه نفر په سر باندې چې پاکيږي توی کړي او په دې ډول به د هغه دپاره د څښتن په حضور کې کفاره ادا کړي.

³⁰۳۰‏-۳۱ بيا به هغه نفر د هغو کوترو يا قمري ګانو څخه يوه د ګناه د نذرانې په توګه او بله د سوزېدونکې نذرانې په توګه د غلې دانې د نذرانې سره يوځای قرباني کړي. په دې ډول به کاهن د هغه نفر دپاره چې پاکيږي د څښتن په حضور کې کفاره ادا کړي.

³¹

³²دا مقررات د هغه چا دپاره دي چې د پوستکي په ساري ناروغۍ باندې اخته وي او د خپل ځان د پاکوالي دپاره هغه نذرانې چې رواج وې نشي اخيستلی.“

³³څښتن حضرت موسیٰ او حضرت هارون ته وفرمايل:

³⁴”کله چې تاسو د کنعان خاورې ته چې تاسو ته يې ستاسو د ملکيت په توګه درکوم، ورننوزئ او د هغه ځای په يو کور کې خپرېدونکې چڼاسکه پيدا کړم،

³⁵د هغه کور خاوند بايد لاړ شي او کاهن ته داسې ووايي چې ما په خپل کور کې يو شی ليدلی دی چې د چڼاسکې په شان ښکاري.

³⁶کاهن به داسې حکم وکړي چې مخکې له دې چې هغه د چڼاسکې د معاينه کولو دپاره لاړ شي هرڅه دې له هغه کور څخه راوويستل شي. که نه، نو هرڅه چې په هغه کور کې دي هغه به ناپاکه اعلان شي. له هغې وروسته دې کاهن دننه لاړ شي او کور دې معاينه کړي.

³⁷هغه دې په دېوالونو باندې چڼاسکې معاينه کړي. که چېرې په هغه کې شين بخن يا سوربخن داغونه وي چې دېوال خرابوي،

³⁸نو کاهن به د هغه کور څخه لاړ شي او کور به د اوو ورځو دپاره بند کړي.

³⁹په اوومه ورځ به کاهن بېرته راشي او هغه کور به بيا معاينه کړي. که چېرې چڼاسکه په دېوالونو باندې خپره شوې وي

⁴⁰هغه دې حکم وکړي چې هغه تيږې چې چڼاسکې ورباندې پيدا شوې دي هغه دې لېرې شي او د ښار څخه دې دباندې په يو ناپاک ځای کې وغورزول شي.

⁴¹له هغې وروسته بايد کاهن ټول دنني دېوالونه په يو چا باندې وتوږي او خاوره دې د ښار څخه دباندې په يو ناپاکه ځای کې وغورزوي.

⁴²بيا دې د هغو تيږو په ځای چې لېرې کړای شوې دي د نورو تيږو څخه کار واخيستل شي او دېوالونو ته دې نوی اخېړ ورکړای شي.

⁴³که چېرې د دېوالونو د تيږو د لېرې کولو، توږلو او اخېړولو نه پس بيا په هغه کور کې چڼاسکه راښکاره شي

⁴⁴نو کاهن دې لاړ شي او هغه دې بيا معاينه کړي. که چېرې په کور کې چڼاسکه خپره شوې وي، نو دا يوه خرابوونکې چڼاسکه ده او دا کور ناپاک دی.

⁴⁵هغه کور بايد وران شي او د هغه تيږې، تيرونه او ټوله خاوره بايد د ښار څخه دباندې يو ناپاکه ځای ته يوړل شي.

⁴⁶په هغه دوران کې چې کاهن هغه کور بند اعلان کړی وي نو هرڅوک چې هغه ته ننوزي، هغه به تر ماښامه پورې ناپاک وي.

⁴⁷همدارنګه هرڅوک چې په هغه کور کې خوب کوي يا خوراک کوي بايد خپل کالي ومينځي.

⁴⁸مګر که چېرې کاهن راشي او هغه معاينه کړي، نو که د کور د اخېړولو څخه وروسته چڼاسکه خپره شوې نه وي نو هغه به کور پاک اعلان کړي، ځکه چې چڼاسکه ورکه شوې ده.

⁴⁹هغه دې د کور د پاکولو دپاره دوه مرغۍ، د صبر لرګی، سور تار او د ويلني بوټی راواخلي.

⁵⁰هغه به له دغو مرغيو څخه يوه د خټو د لوښي دپاسه چې د چينې تازه اوبه په کې وي حلاله کړي.

⁵¹بيا دې د صبر لرګی، د ويلني بوټی، سور تار او ژوندۍ مرغۍ راواخلي او هغه دې د مړې مرغۍ په وينه او تازه اوبو کې غوټه کړي او په کور باندې دې اوه ځلې وشيندي.

⁵²په دې ډول به کاهن هغه کور د مرغۍ په وينه، تازه اوبو، ژوندۍ مرغۍ، د صبر په لرګي، د ويلني په بوټي او سور تار باندې پاک کړي.

⁵³بيا دې هغه ژوندۍ مرغۍ د ښار څخه دباندې په صحرا کې خوشې کړي. په دې ډول به هغه د کور دپاره د پاکوالي مراسم سرته ورسوي او هغه به پاک شي.“

⁵⁴دا مقررات د پوستکي د هرې ساري ناروغۍ دپاره دي لکه خارښت،

⁵⁵۵۵‏-۵۶ زخمونه، دانې يا پړسوب او همدارنګه په کاليو يا په کور کې چڼاسکه.

⁵⁶

⁵⁷د دې مقرراتو له مخې دا فيصله کېدای شي چې يو شی په کوم وخت کې پاک دی او په کوم وخت کې ناپاک.