Read Pashto (Nangahari) — د پښتو مقدس کتاب لاويان 15 Bible Online

لاويان 15 - Pashto (Nangahari) — د پښتو مقدس کتاب bible

لاويان 15

¹څښتن حضرت موسیٰ او حضرت هارون ته وفرمايل:

²”د اسرائيليانو سره خبرې وکړئ او ورته ووايئ: کله چې د يو سړي د تناسلي آلې څخه زوه راووزي، هغه زوه ناپاکه ده.

³که دا زوه د هغه د تناسلي آلې څخه رابهيږي يا دا بهېدل د التهاب په سبب بند شوي وي، هغه به ناپاک کړي.

⁴که داسې سړی چې زوه ورڅخه راوزي، که هغه په هرې بسترې باندې څملي او يا په هر شي باندې کښېني هغه شی به ناپاک شي.

⁵هرڅوک چې د هغه د بسترې سره ولګيږي،

⁶يا په هغه شي باندې کښېني چې هغه سړی ورباندې ناست ؤ، نو هغه نفر بايد خپل کالي ومينځي او غسل دې وکړي، خو هغه به تر ماښامه پورې ناپاک پاتې شي.

⁷هرڅوک چې د هغه سړي سره ولګيږي بايد خپل کالي ومينځي او غسل دې وکړي، خو هغه به تر ماښامه پورې ناپاک پاتې شي.

⁸که چېرې هغه نفر چې زوه ورڅخه راوزي په داسې يو نفر باندې چې هغه پاک وي لياړې واچوي، هغه سړی بايد خپل کالي ومينځي او غسل دې وکړي، خو هغه به تر ماښامه پورې ناپاک پاتې شي.

⁹که دا سړی په کوم زين باندې کښېني، هغه به ناپاک شي

¹⁰او هرڅوک چې د هغه شي سره ولګيږي چې دا سړی ورباندې ناست ؤ، هغه به تر ماښامه پورې ناپاک وي. هرڅوک چې داسې شيان راپورته کړي هغه بايد خپل کالي ومينځي او غسل دې وکړي، خو تر ماښامه پورې به ناپاک پاتې شي.

¹¹که چېرې يو سړی چې زوه ورڅخه راووزي او خپل لاسونه يې نه وي مينځلي، په کوم بل نفر باندې ولګيږي، هغه څوک چې دی ورسره لګېدلی دی بايد خپل کالي ومينځي او غسل دې وکړي، خو هغه به تر ماښامه پورې ناپاک پاتې شي.

¹²که هغه سړی چې زوه ورڅخه راوزي د خټو هر لوښي ته لاس وروړي، هغه بايد مات شي او که د لرګي کوم لوښي ته لاس وروړي، هغه بايد ومينځل شي.

¹³له هغې وروسته چې د زوې د راوتلو څخه د دغه سړي علاج وشي، هغه بايد اوه ورځې صبر وکړي او بيا دې د چينې په تازه اوبو کې خپل کالي ومينځي او غسل دې وکړي نو هغه به پاک شي.

¹⁴هغه بايد په اتمه ورځ دوه کوترې يا دوه قمري ګانې واخلي او د څښتن حضور ته دې د مقدسې خېمې د دروازې خولې ته راشي او هغه دې کاهن ته ورکړي.

¹⁵کاهن دې هغه قرباني کړي، يوه د ګناه د نذرانې دپاره او بله د سوزېدونکې نذرانې دپاره. په دې ډول به کاهن د څښتن په حضور کې د هغه سړي دپاره د هغه د زوې د راوتلو له کبله کفاره ادا کړي.

¹⁶کله چې له يو سړي څخه مني راووزي، هغه بايد خپل ټول ځان ومينځي، خو هغه به تر ماښامه پورې ناپاک پاتې شي.

¹⁷هر هغه شی چې د ټوکر يا څرمنې څخه جوړ شوی وي او مني ورباندې لويدلي وي بايد ومينځل شي، خو هغه به تر ماښامه پورې ناپاک پاتې شي.

¹⁸سړی او ښځه دواړه بايد د يوځای کېدلو څخه وروسته غسل وکړي، خو تر ماښامه پورې به ناپاک پاتې شي.

¹⁹کله چې يوه ښځه مياشتينۍ ناروغي ولري، هغه اوه ورځې ناپاکه پاتې کيږي. هرڅوک چې دې ښځې ته لاس وروړي، هغه به تر ماښامه پورې ناپاک وي.

²⁰که هغه د خپلې مياشتينۍ ناروغۍ په وخت کې په هر شي باندې کښېني يا ورباندې څملي هغه شی به ناپاک شي.

²¹۲۱‏-۲۳ هرڅوک چې د هغې د بسترې يا هر هغه شي سره چې هغه ورباندې ناسته وي ولګيږي، بايد خپل کالي ومينځي او غسل دې وکړي، خو هغه به تر ماښامه پورې ناپاک پاتې شي.

²⁴که چېرې يو سړی د هغې ښځې سره په هغه وخت کې يوځای شي کله چې د هغې مياشتينۍ ناروغي پيل کيږي، هغه سړی به اوه ورځې ناپاک وي. په هرې بسترې باندې چې هغه څملي هغه بستره به ناپاکه شي.

²⁵که چېرې د يوې ښځې څخه د مياشتينۍ ناروغۍ څخه پرته د ډېرو ورځو دپاره وينه بهيږي يا برسېره پر عادي مياشتينۍ ناروغۍ دا وينه بهيږي، ترڅو پورې چې دا وينه بهيږي هغه ښځه د مياشتينۍ ناروغۍ په شان ناپاکه پاتې کيږي.

²⁶په دې موده کې که چېرې هغه په هره بستره باندې څملي او يا په هر شي باندې چې کښېني هغه به ناپاک شي.

²⁷هرڅوک چې دغو شيانو ته لاس وروړي هغه به ناپاک شي. هغه بايد خپل کالي ومينځي او غسل دې وکړي، خو تر ماښامه پورې به ناپاک پاتې شي.

²⁸وروسته له دې چې د هغې وينه ودريږي، بايد اوه ورځې صبر وکړي نو بيا به هغه پاکه شي.

²⁹په اتمه ورځ بايد هغه ښځه دوه کوترې يا دوه قمري ګانې واخلي او هغه دې د مقدسې خېمې د دروازې په خوله کې کاهن ته راوړي.

³⁰کاهن دې يوه د ګناه د نذرانې دپاره او بله د سوزېدونکې نذرانې دپاره قرباني کړي. په دې ډول به هغه د څښتن په حضور کې د هغې ښځې دپاره د هغې د وينې د بهېدلو د ناپاکۍ په خاطر کفاره ادا کړي.

³¹کله چې ستاسو څخه کوم يو ناپاک وي، بايد د اسرائيلو د قوم څخه لېرې واوسيږي. که نه، نو زما مقدسه خېمه به چې د کمپ په منځ کې ده ناپاکه شي او ټول قوم به مړ شي.“

³²۳۲‏-۳۳ دا مقررات د هغه سړي په باره کې دي چې د هغه څخه زوه يا مني راوزي او د هغې ښځې په باره کې چې د مياشتينۍ ناروغۍ په دوران کې وي او يا د هغه سړي په باره کې چې د يوې ناپاکې ښځې سره يوځای شي.