Read Pashto (Nangahari) — د پښتو مقدس کتاب لاويان 16 Bible Online

لاويان 16 - Pashto (Nangahari) — د پښتو مقدس کتاب bible

لاويان 16

¹د حضرت هارون د دوو زامنو د مړينې څخه وروسته چې څښتن ته ورنژدې شول او مړه شول، څښتن د حضرت موسیٰ سره خبرې وکړې.

²هغه وفرمايل: ”خپل ورور هارون ته ووايه چې يوازې په يو مناسب وخت کې دې ډېر مقدس ځای ته چې د پردې شاته دی ورننوزي، ځکه دا هغه ځای دی چې زه په کې په ورېځو کې د لوظ د صندوق د سرپوښ دپاسه راښکاره کېږم. که هغه سرغړونه وکړي نو وبه وژل شي.

³کله چې هارون د ګناه د نذرانې دپاره يو ځوان غويی او د سوزېدونکې نذرانې دپاره يو پسه راوړي، بيا هغه کولی شي چې ډېر مقدس ځای ته ورننوزي.“

⁴بيا څښتن دا لارښودنې وکړې: ”مخکې له دې چې هارون ډېر مقدس ځای ته ننوزي، هغه بايد غسل وکړي او د کاهنتوب دغه مقدس لباس دې واغوندي: د کتان کميس، نيکرونه، پټۍ او لونګۍ.

⁵د اسرائيلو قوم دې هارون ته دوه وزان د ګناه د نذرانې دپاره او يو پسه د سوزېدونکې نذرانې دپاره ورکړي.

⁶هارون دې يو غويی د خپلې ګناه د نذرانې دپاره وړاندې کړي چې د خپل ځان او خپلې کورنۍ دپاره کفاره ادا کړي.

⁷بيا دې هغه دوه وزان واخلي او د مقدسې خېمې د دروازې په خوله کې دې د څښتن په حضور کې وړاندې کړي.

⁸هغه دې د دوو وزانو دپاره پچه واچوي او د دوه تيږو څخه دې کار واخلي، په يوه باندې دې د څښتن دپاره نښه وکړي او په بلې باندې دې د عزازيل * دپاره.

⁹هارون به هغه وز قرباني کړي چې د څښتن دپاره د پچې په وسيله انتخاب شوی وي او هغه به د ګناه د نذرانې په توګه قرباني کړي.

¹⁰کوم وز چې د عزازيل دپاره انتخاب شوی ؤ هغه به څښتن ته ژوندی وړاندې شي او په دښته کې به عزازيل ته ورولېږل شي، د دې په خاطر چې د قوم د ګناهونو دپاره کفاره ادا کړي.

¹¹کله چې هارون يو غويی د خپلې ګناه د نذرانې دپاره حلال کړي چې د خپل ځان او خپلې کورنۍ دپاره کفاره ادا کړي،

¹²نو هغه به د قربانۍ د ځای څخه د اور يو لوښی چې د لګول شويو سکارو څخه ډک وي او دوه موټي ښه ميده شوې خوشبويي راواخلي او هغه دې ډېر مقدس ځای ته راوړي.

¹³هغه به هلته د څښتن په حضور کې خوشبويي په اور باندې واچوي او د خوشبويۍ لوګی به د لوظ د صندوق سرپوښ پټ کړي ترڅو هارون هغه ونه ويني او مړ نشي.

¹⁴د غويي لږه وينه به واخلي او په خپلې ګوتې باندې به يې د سرپوښ مخکينۍ برخې ته وشيندي او بيا به د هغې څخه لږه د لوظ د صندوق مخې ته اوه ځلې وشيندي.

¹⁵بيا به هارون د ګناه د نذرانې وز د قوم په خاطر حلال کړي او د هغه وينه به ډېر مقدس ځای ته يوسي او هماغسې کار به ورسره وکړي چې د غويي په وينه باندې يې کړی ؤ. هغه به د لوظ د صندوق په سرپوښ او د صندوق مخې ته وشيندي.

¹⁶په دې ډول به هغه د پاکولو مراسم سرته ورسوي چې ډېر مقدس ځای د اسرائيلو د قوم د ناپاکۍ او د هغوی د ټولو ګناهونو څخه پاک کړي. هغه دې دا کار د مقدسې خېمې دپاره هم وکړي، ځکه چې هغه د کمپ په منځ کې ولاړه ده او کمپ په مذهبي لحاظ ناپاک دی.

¹⁷له هغه وخت څخه چې هارون ډېر مقدس ځای ته د کفارې د ادا کولو دپاره ننوزي، د هغه د راوتلو پورې بايد هيڅوک په خېمه کې نه وي. کله چې هغه د خپل ځان، خپلې کورنۍ او ټول قوم دپاره کفاره ادا کوي

¹⁸نو بايد بيا د نذرانو د سوزولو دپاره د قربانۍ ځای ته لاړ شي او هغه پاک کړي. هغه بايد د غويي او د وز لږه وينه واخلي او د قربانګاه په برجونو باندې دې وسولوي.

¹⁹هغه بايد په خپله ګوته لږه وينه واخلي او په قربانګاه باندې دې اوه ځلې وشيندي. په دې ډول دې هغه د اسرائيلو د قوم د ناپاکۍ څخه پاکه او مقدسه کړي.

²⁰کله چې هارون ډېر مقدس ځای، د مقدسې خېمې پاتې برخې او د قربانۍ د ځای د پاکولو مراسم سرته ورسوي، هغه به هغه ژوندی وز څښتن ته وړاندې کوي چې د عزازيل دپاره انتخاب شوی دی.

²¹هغه دې دواړه لاسونه د ژوندي وز په سر باندې کېږدي او په هغه باندې دې د اسرائيلو د قوم د ټولو بدکاريو، ګناهونو او سرکشيو اقرار وکړي او هغه دې د وز په سر باندې واچوي. هغه به دا وز لېرې دښتې ته ولېږي او يو داسې سړي ته دې وسپاري چې د دې کار دپاره ټاکل شوی وي.

²²کله چې هغه سړی هغه وز په دښته کې خوشې کړي نو هغه وز به د هغوی ټول ګناهونه د خپل ځان سره يو شاړ ځای ته يوسي.

²³بيا دې هارون مقدسې خېمې ته ورننوزي او د کتان هغه لباس چې ډېر مقدس ځای ته د ورننوتلو څخه مخکې يې اغوستی ؤ وباسي او هلته دې پرېږدي.

²⁴هغه به په يو مقدس ځای کې غسل وکړي او خپل عادي لباس به واغوندي. بيا به هغه دباندې راووزي او يوه سوزېدونکې نذرانه به د ځان او يوه د قوم دپاره قرباني کړي، د دې په خاطر چې د خپل ځان او د هغوی دپاره کفاره ادا کړي.

²⁵همدارنګه هغه به په قربانګاه باندې د حيوان وازګه چې د ګناه د نذرانې دپاره ده وسوزوي.

²⁶هغه سړی چې وز يې په دښته کې عزازيل ته ورپرېښود، بايد کمپ ته د بېرته راتګ څخه مخکې خپل کالي ومينځي او غسل دې وکړي.

²⁷هغه غويی او وز چې د ګناه د نذرانو دپاره ورڅخه کار واخيستل شو او د هغو وينه د کفارې د ادا کولو دپاره ډېر مقدس ځای ته راوړل شوه، بايد د کمپ څخه دباندې يوړل شي. د هغو پوستکي، غوښه او خوشايي دې وسوزول شي.

²⁸کوم سړی چې هغه سوزوي بايد خپل کالي ومينځي او غسل دې وکړي، له هغې وروسته هغه کمپ ته ننوتلی شي.

²⁹په لاندينيو مقرراتو باندې دې د تل دپاره عمل وشي. د اوومې مياشتې په لسمه ورځ تاسو ټول اسرائيليان او هغه بېګانه خلک چې ستاسو په منځ کې اوسيږي بايد روژه ونيسئ او هيڅ کار بايد ونه کړئ،

³⁰ځکه چې په دې ورځ به ستاسو د پاکولو دپاره کفاره ادا شي. بيا به تاسو د څښتن په حضور کې د خپلو ټولو ګناهونو څخه پاک شئ.

³¹دا به د سبت په شان د آرام ورځ وي، په دې ورځ بايد تاسو روژه ونيسئ. په دغو مقرراتو باندې دې د تل دپاره عمل وشي.

³²هغه کاهن چې مسح شوی وي او د خپل پلار په ځای د مشر کاهن په توګه ټاکل شوی وي، هغه دې کفاره ادا کړي. هغه دې د کتان مقدس کالي واغوندي

³³او دا مراسم دې سرته ورسوي د دې په خاطر چې ډېر مقدس ځای، د مقدسې خېمې پاتې برخې او د قربانۍ ځای پاک کړي او د کاهنانو او ټول قوم دپاره کفاره ادا کړي.

³⁴د اسرائيليانو د ټولو ګناهونو دپاره دې په کال کې يو ځل کفاره ادا شي. په دې مقرراتو باندې دې د تل دپاره عمل وشي.“ نو څنګه چې څښتن حضرت موسیٰ ته امر کړی ؤ، هماغسې وشول.