Read Pashto (Nangahari) — د پښتو مقدس کتاب لاويان 17 Bible Online

لاويان 17 - Pashto (Nangahari) — د پښتو مقدس کتاب bible

لاويان 17

¹څښتن په حضرت موسیٰ باندې امر وکړ،

²چې هارون او د هغه زامنو او د اسرائيلو ټول قوم ته لانديني حکمونه ورکړي.

³۳‏-۴ که د اسرائيلو څخه يو څوک يو غويی يا يو وری يا يوه وزه څښتن ته د نذرانې په توګه د مقدسې خېمې د دروازې د خولې څخه پرته په بل هرځای کې حلال کړي، هغه به شريعت مات کړی وي. هغوی وينه توی کړې ده او د خدای له قوم څخه بايد وشړل شي.

⁵د دې حکم معنیٰ دا ده چې د اسرائيلو خلک به له همدې وخت څخه څښتن ته هغه حيوانات راوړي چې په صحرا کې يې حلالول. هغوی بايد هغه کاهن ته د مقدسې خېمې د دروازې خولې ته راولي او د سلامتۍ د نذرانو په توګه دې قرباني کړي.

⁶کاهن دې د مقدسې خېمې د دروازې په خوله کې هغه وينه د څښتن په قربانګاه باندې وشيندي او وازګه دې د يو داسې بوی په توګه وسوزوي چې په څښتن باندې ښه لګيږي.

⁷د اسرائيلو قوم بايد نور په صحرا کې د هغو پېريانو دپاره قرباني ونه کړي کوم چې د وزانو په شان ښکاري او په دې کار سره دې د څښتن سره بې وفايي نه کوي. د اسرائيلو قوم بايد تل ترتله په دې حکم باندې عمل وکړي.

⁸که چېرې کوم اسرائيلی يا بېګانه نفر چې د دوی په منځ کې اوسيږي سوزېدونکې نذرانه يا کومه بله قرباني

⁹څښتن ته د نذرانې په توګه د مقدسې خېمې د دروازې د خولې څخه بغير په بل هرځای کې وړاندې کړي، د خدای د قوم څخه به وشړل شي.

¹⁰که چېرې کوم اسرائيلی يا هغه بېګانه نفر چې د دوی په منځ کې اوسيږي کومه وينه وخوري، څښتن فرمايي چې د هغه په ضد به شي او د خپل قوم څخه به يې وشړي.

¹¹د هر ژوندي شي ژوند په وينه کې دی او څښتن هغه د اسرائيلو قوم ته ورکړې ده د دې په خاطر چې په قربانګاه باندې د ځان دپاره کفاره ادا کړي. دا وينه ده چې د يو چا د ژوند دپاره کفاره ادا کوي.

¹²په دې خاطر څښتن د اسرائيلو قوم ته فرمايلي دي چې نه به دوی او نه به هغه بېګانه نفر چې د دوی په منځ کې اوسيږي، وينه خوري.

¹³که چېرې کوم اسرائيلی يا بېګانه نفر چې د دوی په منځ کې اوسيږي يو داسې حيوان يا مرغۍ ښکار کړي چې هغه حلال وي، بايد د هغه وينه په ځمکه باندې توی کړي او په خاورو باندې دې پټه کړي.

¹⁴د هر ژوندي شي ژوند په وينه کې دی، نو په دې خاطر څښتن د اسرائيلو قوم ته فرمايلي دي چې بايد د هيڅ يو ژوندي شي وينه ونه خوري. هرڅوک چې هغه وخوري بايد د خدای د قوم څخه وشړل شي.

¹⁵هرڅوک، که هغه اسرائيلی يا بېګانه وي د يو داسې حيوان غوښه وخوري چې په خپل مرګ باندې مړ شوی وي يا د وحشي حيواناتو له خوا وژل شوی وي بايد خپل کالي ومينځي او غسل دې وکړي. هغه به تر ماښامه پورې ناپاک وي، بيا به پاک شي.

¹⁶مګر که چېرې هغه خپل کالي ونه مينځي او غسل ونه کړي، نو د خپلو بدو سزا به وويني.