Read Pashto (Nangahari) — د پښتو مقدس کتاب لاويان 18 Bible Online

لاويان 18 - Pashto (Nangahari) — د پښتو مقدس کتاب bible

لاويان 18

¹څښتن حضرت موسیٰ ته وفرمايل:

²”د اسرائيلو د خلکو سره خبرې وکړه او ورته ووايه چې زه ستاسو څښتن خدای يم.

³د مصر د خلکو په شان کار مه کوئ چېرته چې يو وخت تاسو په کې اوسېدلئ، يا د کنعان د خلکو په شان کار مه کوئ چې زه اوس تاسو هلته بيايم.

⁴تاسو بايد زما قوانينو ته غاړه کېږدئ او زما د فرمانونو په مطابق عمل وکړئ. زه ستاسو څښتن خدای يم.

⁵زما په فرمانونو او قوانينو باندې عمل وکړئ، ځکه څوک چې هغو ته غاړه کېږدي د هغو په وسيله به ژوند وکړي. زه څښتن يم.

⁶هيڅوک دې د خپلو نژدې خپلوانو سره زنا نه کوي. زه څښتن يم.

⁷د خپلې مور سره په زنا کولو سره د خپل پلار سپکاوی مه کوئ. هغه ستاسو مور ده، د هغې سره زنا مه کوئ.

⁸د خپل پلار د نورو ښځو سره په زنا کولو سره د خپل پلار سپکاوی مه کوئ.

⁹د خپلې سکه يا ناسکه خور سره که هغه ستاسو د پلار لور وي يا د مور، که هغه ستاسو سره په يو کور کې زېږېدلې وي يا په بل ځای کې، د هغې سره زنا مه کوئ.

¹⁰د خپلې لمسۍ سره زنا مه کوئ، هغه به ستاسو دپاره سپکاوی وي.

¹¹د يوې ناسکه خور سره زنا مه کوئ، هغه هم ستاسو خور ده.

¹²د خپل پلار د خور سره زنا مه کوئ، هغه ستاسو د پلار نژدې خپلوانه ده.

¹³د خپلې مور د خور سره زنا مه کوئ، ځکه چې هغه ستاسو د مور نژدې خپلوانه ده.

¹⁴د خپل تره د ښځې سره په زنا کولو سره د خپل تره سپکاوی مه کوئ، هغه هم ستاسو نژدې خپلوانه ده.

¹⁵د خپلې انږور سره زنا مه کوئ. هغه ستاسو د زوی ښځه ده.

¹⁶د خپلې وريندار سره زنا مه کوئ، دا به ستاسو د ورور دپاره سپکاوی وي.

¹⁷که تاسو د يوې ښځې سره څملئ نو د هغې د لور يا د هغې د لمسۍ سره زنا مه کوئ. ځکه چې هغوی د هغې نژدې خپلوان دي. دا ډېر بد کار دی.

¹⁸ترڅو پورې چې ستاسو ښځې ژوندۍ وي، د خپلو ښينو سره د دوهمې ښځې په توګه واده مه کوئ او د هغوی سره زنا مه کوئ.

¹⁹د يوې ښځې سره د هغې د مياشتينۍ ناروغۍ په دوران کې مه يوځای کېږئ، ځکه چې هغه ناپاکه ده.

²⁰د بل سړي د ښځې سره زنا مه کوئ او په هغې باندې خپل ځان مه ناپاکه کوئ.

²¹د خپلو ماشومانو څخه هيڅ يو ماشوم مه ورکوئ چې د مولک د بت دپاره قرباني شي. زه ستاسو څښتن خدای يم او په دې کار به زما سپکاوی وشي.

²²هيڅ يو سړی دې د بل سړي سره بد کار نه کوي، له دې څخه خدای کرکه کوي.

²³د يو حيوان سره جنسي اړيکې مه ساتئ او په دې ډول په دې کار خپل ځان مه ناپاکه کوئ. يوه ښځه بايد يو حيوان ته د جنسي اړيکو په خاطر خپل ځان وړاندې نه کړي، دا ډېر بد کار دی.

²⁴په دې عملونو باندې خپل ځانونه مه ناپاکه کوئ، ځکه چې نورو قومونو په دې ډول خپل ځانونه ناپاکه کړل. دا هغه قومونه دي چې په دې خاوره کې اوسيږي او څښتن يې د دې په خاطر وباسي ترڅو تاسو وکولی شئ چې هغې خاورې ته ورننوزئ.

²⁵د هغوی عملونو هغه خاوره ناپاکه کړې ده، نو څښتن هغې خاورې ته سزا ورکوي او هغه مجبوروي چې خپل اوسېدونکي وشړي.

²⁶۲۶‏-۲۷ هغوی دا ټول بد کارونه وکړل او هغه خاوره يې ناپاکه کړه، خو تاسو بايد داسې ونه کړئ. تاسو ټول که هغه اسرائيليان وي يا هغه بېګانه خلک چې ستاسو سره اوسيږي د څښتن په قوانينو او حکمونو باندې عمل کوئ.

²⁸که چېرې تاسو دا ځمکه ناپاکه کړئ، نو هغه به تاسو ايسته وغورزوي لکه څنګه چې ستاسو څخه مخکې قومونه يې غورزولي ؤو.

²⁹نو هرڅوک چې د داسې کارونو څخه چې د کرکې وړ دي کوم کار وکړي، د خدای له قوم څخه به وشړل شي.“

³⁰څښتن وفرمايل: ”زما امرونو ته غاړه کېږدئ او د هغو ناوړه رواجونو څخه پيروي مه کوئ کوم چې ستاسو د راتګ څخه مخکې به کېدل او په هغو باندې خپل ځانونه مه ناپاکه کوئ. زه ستاسو څښتن خدای يم.“