Read Pashto (Nangahari) — د پښتو مقدس کتاب لاويان 19 Bible Online

لاويان 19 - Pashto (Nangahari) — د پښتو مقدس کتاب bible

لاويان 19

¹څښتن حضرت موسیٰ ته وفرمايل:

²”د اسرائيلو د ټول قوم سره خبرې وکړه او ورته ووايه: مقدس اوسئ ځکه چې زه ستاسو څښتن خدای مقدس يم.

³تاسو هر يو بايد د خپل مور او پلار احترام وکړئ او بايد د سبت د ورځې څخه پيروي وکړئ. زه ستاسو څښتن خدای يم.

⁴ما مه پرېږدئ او د بتانو عبادت مه کوئ. د فلزاتو څخه خدايان مه جوړوئ او عبادت يې مه کوئ. زه ستاسو څښتن خدای يم.

⁵کله چې تاسو د سلامتۍ د نذرانې دپاره څښتن ته يو حيوان قرباني کوئ، هغه په يوې داسې طريقې سره قرباني کړئ چې ستاسو په خاطر قبول شي.

⁶غوښه بايد په هماغه ورځ چې قرباني کوئ وخورئ يا په راتلونکې ورځ. هرڅه چې د دريمې ورځې پورې پاتې شي بايد وسوزول شي.

⁷که چېرې له هغې څخه لږه په دريمه ورځ وخوړل شي، هغه ناپاکه ده او دا نذرانه به قبوله نشي.

⁸هرڅوک چې هغه وخوري، هغه به ګناهکار وي ځکه چې هغه څه چې څښتن ته مقدس دي، هغه يې عادي ګڼلي دي. هغه نفر بايد د خدای له قوم څخه وشړل شي.

⁹کله چې تاسو د خپلې ځمکې حاصلات لو کوئ، نو هغه د پټي تر غاړو پورې مه لو کوئ او هغه وږي چې د لو څخه پاتې شوي وي هغه مه راټولوئ.

¹⁰خپل د انګورو باغ ته دوهم ځل مه ورځئ او هغه انګور مه راټولوئ چې رالويدلي وي. هغه غريبانو او بېګانه خلکو ته پرېږدئ. زه ستاسو څښتن خدای يم.

¹¹غلا مه کوئ. يو بل ته درواغ مه وايئ او يو بل مه غولوئ.

¹²زما په نوم په درواغو قسم مه خورئ او په دې ډول د خپل خدای نوم مه سپکوئ. زه ستاسو څښتن خدای يم.

¹³څوک مه لوټوئ او د چا څخه ګټه مه اخلئ. د يو مزدور اجوره حتیٰ د يوې شپې دپاره هم مه ځنډوئ.

¹⁴کڼو خلکو ته ښکنځلې مه کوئ او د ړندو په مخ کې داسې شی مه ږدئ چې هغوی ورباندې تيندک وخوري، مګر زما څخه ووېرېږئ. زه ستاسو څښتن خدای يم.

¹⁵عدالت تر پښو لاندې کوئ مه. د غريب پلوي مه کوئ او د لويانو خاطر مه کوئ، مګر د نورو سره په انصاف قضاوت وکړئ.

¹⁶د هيچا په باره کې درواغ مه خپروئ او کله چې يو نفر په محکمه کې په مرګ باندې محکوم وي نو ښکاره خبرې وکړئ، کېدای شي چې ستاسو شاهدي د هغه سره مرسته وکړي. زه څښتن يم.

¹⁷د خپل ورور سره په خپل زړه کې کينه مه ساتئ. هغه په ښکاره د خپلې ګناه په خاطر ورټئ ترڅو د هغه په ګناه کې شريک نشئ.

¹⁸د خپلو خلکو څخه د بدل اخيستلو پسې مه ګرځئ. د هغوی څخه کرکه مه کوئ، خو د نورو سره د خپل ځان په شان مينه کوئ. زه څښتن يم.

¹⁹زما د فرمانونو څخه پيروي وکړئ. غير همجنس کورني حيوانات د نسل دپاره سره مه يوځای کوئ. په خپل پټي کې دوه قسمه تخمونه مه کرئ. داسې کالي مه اغوندئ چې له دوو مختلفو جنسونو څخه جوړ شوي وي.

²⁰که چېرې يو نفر د يوې داسې غلامې سره چې هغه د بل نفر سره کوژدن شوې وي زنا وکړي، که څه هم هغه بل نفر د هغې د آزادېدلو په خاطر پيسې نه وي ورکړې، نو بايد هغې غلامې او هغه نفر ته چې د هغې سره يې زنا کړې وه سزا ورکړل شي. خو هغوی دې ونه وژل شي ځکه چې هغه آزاده شوې نه ده.

²¹هغه سړی به د تاوان د نذرانې په توګه يو پسه د مقدسې خېمې د دروازې په خوله کې څښتن ته راوړي.

²²په هغه باندې به کاهن د څښتن په حضور کې د هغه د ګناه په خاطر کفاره ادا کړي او د هغه ګناه به وبخښل شي.

²³کله چې تاسو د کنعان خاورې ته ورننوزئ او د مېوې يوه ونه وکرئ، هغه مېوه د اولنيو دريو کلونو دپاره حرامه وګڼئ. په دې موده کې تاسو بايد هغه مېوه ونه خورئ.

²⁴په څلورم کال به هغه ټوله مېوه ما يعنې څښتن ته د شکرګذارۍ په خاطر وقف شي.

²⁵خو په پنځم کال به هغه مېوه تاسو ته حلاله وي. که چېرې تاسو دا ټول کارونه وکړئ، ستاسو ونې به زياته مېوه ونيسي. زه ستاسو څښتن خدای يم.

²⁶داسې غوښه مه خورئ چې وينه په کې وي. فال مه ګورئ او کوډې مه کوئ.

²⁷د خپلو شقيقو ويښتان مه خرايئ او ږيره مه لنډوئ.

²⁸د مړي په غم کې خپل بدنونه مه غوڅوئ او خالونه ورباندې مه جوړوئ. زه څښتن يم.

²⁹د خپلو لورګانو څخه فاحشې مه جوړوئ او هغوی مه شرموئ. که داسې وکړئ، نو دا خاوره به په فحاشۍ بدله شي او له بدکارۍ څخه به ډکه شي.

³⁰د سبت د ورځې څخه پيروي وکړئ او د هغه ځای احترام وکړئ چې زما عبادت په کې کيږي. زه څښتن يم.

³¹هغو خلکو ته مه ورځئ چې هغوی دعوه کوي چې دوی کولی شي چې د مړو سره خبرې وکړي. همدارنګه د فال کتونکو پسې مه ګرځئ، ځکه چې د هغوی په وسيله به تاسو ناپاک شئ. زه ستاسو څښتن خدای يم.

³²د سپين ږيرو په مخ کې پاڅېږئ، د مشرانو احترام کوئ او زما څخه وېرېږئ. زه څښتن يم.

³³د هغو بېګانه خلکو سره بده رويه مه کوئ چې ستاسو په خاوره کې اوسيږي.

³⁴د هغوی سره د يو اسرائيلي په شان رويه وکړئ او د خپلو ځانونو په شان ورسره مينه وکړئ. دا ياد ساتئ چې تاسو هم يو وخت د مصر په خاوره کې بېګانه وئ. زه ستاسو څښتن خدای يم.

³⁵کله چې تاسو يو شی اندازه کوئ يا هغه وزن کوئ نو غلطي په کې مه کوئ او هيڅوک مه غولوئ.

³⁶د صحيح تلو، صحيح وزنونو او صحيح اندازو څخه کار اخلئ. زه ستاسو څښتن خدای يم او ما تاسو د مصر څخه راوويستلئ.

³⁷زما د ټولو فرمانونو او قوانينو څخه پيروي کوئ. زه څښتن يم.“