Read Pashto (Nangahari) — د پښتو مقدس کتاب لاويان 2 Bible Online

لاويان 2 - Pashto (Nangahari) — د پښتو مقدس کتاب bible

لاويان 2

¹کله چې ستاسو څخه څوک څښتن ته د غلې دانې نذرانه وړاندې کوي، هغه نذرانه دې د ښو اوړو څخه وي. په هغې باندې دې د زيتونو تېل توی کړي، خوشبويي دې ورباندې واچوي

²او د هارون زامنو يعنې کاهنانو ته دې وروړي. کاهن به د ټولې خوشبويۍ سره د ښو اوړو څخه چې تېل ورسره ګډ دي يو موټی راواخلي او هغه به د يوې نمونې په توګه چې ټوله څښتن ته وړاندې کيږي، په قربانګاه باندې وسوزوي. دا يوه داسې نذرانه ده چې بوی يې په څښتن باندې ښه لګيږي.

³د غلې دانې پاتې نذرانه د کاهنانو ده، دا د هغو نذرانو يوه ډېره مقدسه برخه ده چې څښتن ته په اور باندې تياريږي.

⁴که چېرې نذرانه داسې ډوډۍ وي چې په تنور کې پخه شوې وي، بايد فطيره وي. هغه بايد د داسې ښو اوړو څخه جوړه شوې وي چې د زيتونو تېل ورسره ګډ وي يا نرۍ ډوډۍ چې د زيتونو تېل ورباندې سولول شوي وي.

⁵که چېرې نذرانه داسې ډوډۍ وي چې په تبۍ باندې پخه شوې وي، هغه دې له داسې ښو اوړو څخه جوړه شي چې د زيتونو تېل ورسره ګډ وي، مګر فطيره دې وي.

⁶هغه ټوټې ټوټې کړئ او نور تېل ورباندې واچوئ، دا د غلې دانې يوه نذرانه ده.

⁷که چېرې نذرانه داسې ډوډۍ وي چې په ارکاره باندې پخه شوې وي، هغه دې د ښو اوړو او د زيتونو د تېلو څخه جوړه شي.

⁸له دې شيانو څخه چې کومه د غلې دانې نذرانه جوړه شوې وي، هغه څښتن ته راوړئ او کاهن ته يې وړاندې کړئ، هغه به يې د قربانۍ ځای ته يوسي.

⁹کاهن به له هغې څخه يوه برخه واخلي او هغه به د يوې نمونې په توګه چې ټوله څښتن ته وړاندې کيږي، په قربانګاه باندې وسوزوي. دا يوه داسې نذرانه ده چې بوی يې په څښتن باندې ښه لګيږي.

¹⁰د غلې دانې پاتې نذرانه د کاهنانو ده. دا ډېره مقدسه ده. دا د هغو نذرانو يوه ډېره مقدسه برخه ده چې څښتن ته په اور باندې تياريږي.

¹¹هغه د غلې دانې نذرانې چې څښتن ته يې وړاندې کوئ، په هيڅ يوه کې دې خميره نه وي. تاسو بايد په هغو نذرانو کې چې څښتن ته په اور باندې تياريږي هيڅ خميره يا شات استعمال نه کړئ.

¹²بايد د اولينو غلو دانو څخه چې هر کال يې رېبئ څښتن ته يوه نذرانه راوړئ، خو هغه بايد په قربانګاه باندې ونه سوزول شي.

¹³د غلې دانې په هرې نذرانې باندې مالګه واچوئ، ځکه چې مالګه د خدای او ستاسو په منځ کې د لوظ استازيتوب کوي. (تاسو بايد په خپلو ټولو نذرانو باندې مالګه واچوئ.)

¹⁴کله چې تاسو څښتن ته د اولنيو رېبل شويو غلو دانو نذرانه راوړئ، نو نينې شوې دانې يا ميده اوړه ورته وړاندې کړئ.

¹⁵په هغې باندې د زيتونو تېل ورزيات کړئ او خوشبويي ورباندې واچوئ. دا د غلې دانې يوه نذرانه ده.

¹⁶کاهن به د ميده اوړو او تېلو يوه برخه د نمونې په توګه د ټولې خوشبويۍ سره يوځای د يوې نذرانې په توګه وسوزوي.